ജനുവരി മുതൽ ജൂലൈ വരെയുള്ള ഏറ്റവും ജനപ്രീയ സിനിമകളുടെ ലിസ്റ്റ് പുറത്തു വിട്ട് ഐഎംഡിബി. മലയാളത്തിൽ നിന്ന് ഒരേയൊരു ചിത്രമാണ് ലിസ്റ്റിൽ ഉള്ളത്. ഏറ്റവും കൂടുതൽ ബോളിവുഡിൽ നിന്നാണ്. 6 ചിത്രങ്ങളാണ് ബോളിവുഡിൽ നിന്ന് ലിസ്റ്റിൽ ഉൾപ്പെട്ടിട്ടുള്ളത്. തമിഴിൽ നിന്ന് മൂന്നു ചിത്രങ്ങൾ ഉൾപ്പെട്ടു. ഏറ്റവും ജനപ്രീതി നേടിയ 10 ഇന്ത്യന് ചിത്രങ്ങളുടെ ലിസ്റ്റ് ആണ് പുറത്തുവന്നിരിക്കുന്നത്. തിയേറ്ററിൽ വമ്പൻ വിജയമായ ‘തുടരും’ ലിസ്റ്റിൽ ഇടം നേടിയില്ല.
പൃഥ്വിരാജ് സുകുമാരന് സംവിധാനം ചെയ്ത്, മോഹന്ലാല് നായകനായ എമ്പുരാനാണ് മലയാളത്തില് നിന്നുള്ള ഒരേയൊരു എൻട്രി.ലിസ്റ്റിൽ ഏഴാം സ്ഥാനത്താണ് എമ്പുരാൻ ഇടം പിടിച്ചിരിക്കുന്നത്. ചിത്രം സമ്മിശ്ര പ്രതികരണങ്ങൾ ആണ് നേടിയതെങ്കിലും ആഗോള ബിസിനെസ്സിൽ 300 കോടിയോളം നേടിയിരുന്നു. ലൂസിഫറിന്റെ രണ്ടാം ഭാഗമായി, മുരളി ഗോപിയുടെ തിരക്കഥയില് ഒരുങ്ങിയ ചിത്രമാണ് എമ്പുരാൻ.
വിക്കി കൗശൽ നായകനായി എത്തിയ ‘ഛാവ’യാണ് ലിസ്റ്റിൽ ഒന്നാം സ്ഥാനത്ത്. ഇന്ത്യൻ ബോക്സ് ഓഫീസിൽ നിന്ന് 557 കോടിയാണ് സിനിമ നേടിയത്. മികച്ച പ്രതികരണം നേടിയ സിനിമയ്ക്ക് കളക്ഷനിൽ വലിയ മുന്നേറ്റമുണ്ടാക്കാൻ സാധിച്ചിരുന്നു. സിനിമയിലെ വിക്കി കൗശലിന്റെ പ്രകടനം ഏറെ ചർച്ചയായിരുന്നു. രശ്മിക മന്ദനയായിരുന്നു നായിക.
പ്രദീപ് രംഗനാഥൻ ചിത്രം ‘ഡ്രാഗൺ’ ആണ് രണ്ടാം സ്ഥാനത്ത്. അശ്വത് മാരിമുത്തു സംവിധാനം ചെയ്ത ചിത്രം ബോക്സ് ഓഫീസിൽ നിന്നും 100 കോടിക്കും മുകളിലാണ് നേടിയത്. റോഷൻ ആൻഡ്രൂസ് സംവിധാനം ചെയ്ത് ഷാഹിദ് കപൂർ നായകനായി എത്തിയ ‘ദേവ’ ജനപ്രീതിയിൽ മൂന്നാം സ്ഥാനം നേടി. ചിത്രം തിയേറ്ററിൽ പരാജയമായിരുന്നു.
ബോക്സ് ഓഫീസിൽ വലിയ വിജയം കൊയ്ത അജയ് ദേവ്ഗൺ ചിത്രം ‘റെയ്ഡ് 2’ നാലാം സ്ഥാനം നേടിയപ്പോൾ കാർത്തിക് സുബ്ബരാജ്-സൂര്യ ചിത്രം ‘റെട്രോ’ അഞ്ചാം സ്ഥാനത്തെത്തി. ദി ഡിപ്ലോമാറ്റ്, സിതാരെ സമീന് പര്, കേസരി ചാപ്റ്റര് 2, വിടാമുയര്ച്ചി എന്നിവയാണ് ലിസ്റ്റിലുള്ള മറ്റു സിനിമകൾ.