മലയാള സിനിമയ്ക്കും സംഗീതത്തിനും ഒരേസമയം ഭാവനയും പുതുമയും സമ്മാനിച്ച അപൂർവ പ്രതിഭകളിൽ ഒരാളാണ് വിനീത് ശ്രീനിവാസൻ. ഗായകനായും, അഭിനേതാവായും, സംവിധായകനായും, തിരക്കഥാകൃത്തായും, ഗാനരചയിതാവായും, പ്രൊഡ്യൂസറായും തന്റെ കഴിവുകൾ തെളിയിച്ച അദ്ദേഹം, മലയാള സിനിമയിലെ യുവതലമുറയുടെ പ്രതിനിധിയായി വളർന്നു. ഇന്ന് ജന്മദിനം ആഘോഷിക്കുന്ന വിനീത്, കഴിഞ്ഞ ഇരുപത് വർഷത്തിലേറെ കാലം മലയാള സിനിമയുടെ വിവിധ വേദികളിൽ സജീവമായിരിക്കുന്ന വിനീതിന് ഇന്ന് ജന്മദിനമാണ്. മലയാളത്തിന്റെ സ്വന്തം വിനീത് ശ്രീനിവാസന് സെല്ലുലോയിഡിന്റെ ഹൃദയം നിറഞ്ഞ ജന്മദിനാശംസകൾ.
1984 ഒക്ടോബർ 1-ന്, കണ്ണൂർ ജില്ലയിലെ തലശ്ശേരിയിൽ, പ്രശസ്ത ഹാസ്യനടനും സ്വഭാവനടനുമായ ശ്രീനിവാസന്റെയും വിമലയുടെയും മൂത്തമകനായി വിനീത് ജനിച്ചു. ബാല്യകാലം കൂത്തുപറമ്പ് ഗ്രാമത്തിൽ ചെലവഴിച്ച അദ്ദേഹം, സ്കൂൾ വിദ്യാഭ്യാസം നിർമ്മലഗിരി റാണി ജയ ഹയർസെക്കൻഡറി സ്കൂളിൽ പൂർത്തിയാക്കി. പിന്നീട് ചെന്നൈയിലെ KCG കോളേജിൽ മെക്കാനിക്കൽ എഞ്ചിനീയറിംഗിൽ ബിരുദം നേടി.
സിനിമാ കുടുംബത്തിൽ ജനിച്ചെങ്കിലും, വിനീതിന്റെ വഴിത്തിരിവ് സംഗീതത്തിലൂടെയാണ് ആരംഭിച്ചത്. ചെറുപ്പം മുതലേ സംഗീതത്തോടുള്ള പ്രത്യേക ഇഷ്ടവും ശീലവും അദ്ദേഹത്തെ പിന്നീട് മലയാളികളുടെ പ്രിയപ്പെട്ട ഗായകനാക്കി മാറ്റി.
2003-ൽ പുറത്തിറങ്ങിയ ‘കിളിച്ചുണ്ടൻ മാമ്പഴം’ എന്ന ചിത്രത്തിലൂടെ പശ്ചാത്തലഗായകനായി അരങ്ങേറ്റം കുറിച്ച വിനീത്, “കസവിന്റെ തട്ടമിട്ട്” എന്ന ഗാനത്തിലൂടെയാണ് ആദ്യമായി ശ്രദ്ധേയനായത്. പിന്നീടുള്ള വർഷങ്ങളിൽ “കരളേ കരളിന്റെ കരളേ” (ഉദയനാണു താരം), “ഓമനപ്പുഴ കടപ്പുറത്ത്” (ചാന്തുപൊട്ട്), “എന്റെ ഖൽബിലെ” (ക്ലാസ്മേറ്റ്സ്) തുടങ്ങി നിരവധി ഗാനങ്ങൾ അദ്ദേഹത്തെ യുവതലമുറയുടെ ഹൃദയത്തിലേക്ക് എത്തിച്ചു.
സംഗീതത്തിനൊപ്പം, “Malayalee” എന്ന മ്യൂസിക് ബാൻഡിന്റെ മുഖ്യഗായകനായും വിനീത് ജനശ്രദ്ധ നേടി. ആധുനിക സംഗീതത്തിന്റെയും മലയാളിയുടെ വികാരങ്ങളുടെയും ഇടയിലൊരു പാലമായിത്തീർന്ന അദ്ദേഹം, തന്റെ ശബ്ദത്തിലൂടെ പുതുമയും ആത്മാർത്ഥതയും പ്രേക്ഷകർക്ക് സമ്മാനിച്ചു.
2008-ൽ പുറത്തിറങ്ങിയ “സൈക്കിൾ” എന്ന ചിത്രത്തിലൂടെയാണ് വിനീത് നായകനായി മലയാള സിനിമയിൽ അരങ്ങേറ്റം കുടിക്കുന്നത്. ലളിതനായ യുവാവിന്റെ വേഷം അദ്ദേഹത്തിന് വലിയ സ്വീകരണമൊരുക്കി.
തുടർന്ന് “മകന്റെ അച്ഛൻ”, “ട്രാഫിക്”, “ചാപ്പാ കുരിശ്”, “ഓം ശാന്തി ഓശാന”, “ഒരു വടക്കൻ സെൽഫി”, “കുഞ്ഞിരാമായണം”, “ജേക്കബിന്റെ സ്വർഗ്ഗരാജ്യം”, “ഒരു മുത്തശ്ശി ഗദ” തുടങ്ങിയ ചിത്രങ്ങളിൽ വൈവിധ്യമാർന്ന കഥാപാത്രങ്ങളെ അവതരിപ്പിച്ചു. ഹാസ്യവും, വികാരവും, സ്വാഭാവികതയും കലർത്തിയ അഭിനയമാണ് വിനീതിന്റെ പ്രത്യേകത.
പ്രേക്ഷകർക്ക് ഏറെ ഓർമ്മയായ വേഷങ്ങളിൽ “കുഞ്ഞിരാമൻ” (കുഞ്ഞിരാമായണം)നും, “യൂസഫ് ഷാ” (ജേക്കബിന്റെ സ്വർഗ്ഗരാജ്യം)ക്കും മലയാളികളുടെ ഹൃദയത്തിൽ ഇന്നും പ്രത്യേക സ്ഥാനം ഉണ്ട്.
വിനീത് ശ്രീനിവാസൻ മലയാള സിനിമയിൽ കൂടുതൽ വിലപ്പെട്ട സ്ഥാനമുറപ്പിച്ചത് സംവിധാനത്തിലൂടെയാണ്. 2010 – മലർവാടി ആർട്സ് ക്ലബ് : നിവിൻ പോളിയും, ഭഗത് മാനുവലും, അജു വർഗീസും പോലുള്ള പുതിയ താരങ്ങളെ പരിചയപ്പെടുത്തിക്കൊടുത്ത ചിത്രം. യുവജനതയുടെ വികാരങ്ങൾ പുതുമയോടെ അവതരിപ്പിച്ച ചിത്രം വലിയ വിജയമായി.
2012 – തട്ടത്തിൻ മറയത്ത് : തലശ്ശേരിയിലെ പശ്ചാത്തലത്തിൽ ഒരുക്കിയ ഈ പ്രണയകഥ, മലയാള സിനിമയിലെ ഏറ്റവും ഹൃദയസ്പർശിയായ പ്രണയചിത്രങ്ങളിൽ ഒന്നായി മാറി.
2013 – തിര : അമ്മയും മകളും കേന്ദ്രീകരിച്ച സിനിമ. സ്ത്രീകളുടെ സുരക്ഷയെ ആസ്പദമാക്കി ഒരുക്കിയ സിനിമയ്ക്കു മികച്ച വിമർശക പ്രശംസ ലഭിച്ചു. ഒരു നീണ്ട ഇടവേളക്ക് ശേഷം ശോഭന മലയാളത്തിലേക്ക് വീണ്ടും എത്തിയ ചിത്രമായിരുന്നു ഇത്. കൂടാതെ സഹോദരൻ ധ്യാനിന്റെ ആദ്യ ചിത്രവും.
2016 – ജേക്കബിന്റെ സ്വർഗ്ഗരാജ്യം : കുടുംബത്തിന്റെയും ബന്ധങ്ങളുടെയും കഥ പറയുന്ന ചിത്രം. രഞ്ജി പണിക്കർ അവതരിപ്പിച്ച ജേക്കബ് കഥാപാത്രം ഇന്നും മലയാളികളുടെ പ്രിയപ്പെട്ടവനാണ്.
2022 – ഹൃദയം : പ്രണവ് മോഹൻലാൽ നായകനായെത്തിയ ഈ സിനിമ, ക്യാമ്പസ് ജീവിതത്തിന്റെ നൊസ്റ്റാൾജിയ മലയാളികൾക്ക് തിരികെ സമ്മാനിച്ചു. ഗാനങ്ങളും കഥയും ഒന്നുപോലെ ജനഹൃദയത്തിൽ പിടിമുറുക്കി.
2024 – വർഷങ്ങൾക്ക് ശേഷം : പ്രണവ് മോഹൻലാൽ, ധ്യാൻ ശ്രീനിവാസൻ, അജു വർഗീസ്, കല്യാണി പ്രിയദർശൻ, ബേസിൽ ജോസഫ് തുടങ്ങിയ താരങ്ങൾ ചേർന്ന ചിത്രം. ഏറെ പ്രതീക്ഷകൾ നിറക്കുന്ന വിനീതിന്റെ ഏറ്റവും പുതിയ സംരംഭം.
വിനീതിന്റെ സിനിമകൾക്ക് പൊതുവേ ലളിതമായ കഥ, ഹൃദയസ്പർശിയായ സംഭാഷണങ്ങൾ, മനോഹരമായ സംഗീതം എന്നിവയാണ് ശക്തി.
2012 ഒക്ടോബർ 18-ന് കണ്ണൂരിലെ പയ്യന്നൂർ സ്വദേശി ദിവ്യയെയാണ് വിനീത് വിവാഹം ചെയ്തത്. ഇരുവരും മലയാള സിനിമാ ലോകത്തിലെ ഏറ്റവും ജനപ്രിയ ദമ്പതികളിൽ ഒന്നാണ്. അവരുടെ കുടുംബജീവിതവും, ലളിതമായ ജീവിതശൈലിയുമാണ് ആരാധകരുടെ മനസിൽ വിനീതിനെ കൂടുതൽ അടുപ്പിക്കുന്നത്.
ബഹുമുഖ പ്രതിഭയാണ് വിനീത്, ഗായകൻ, നടൻ, സംവിധായകൻ, തിരക്കഥാകൃത്ത് – എല്ലായിടത്തും കഴിവ് തെളിയിച്ച വ്യക്തി. സിനിമകളിലും ഗാനങ്ങളിലും ഉണ്ടാകുന്ന ആ സത്യസന്ധതയാണ് വിനീതിന്റെ വലിയ ശക്തി.
മലയാള സിനിമയ്ക്ക് പുതുമയേകി, സംഗീതത്തിൻ്റെ ലോകത്ത് ആത്മാർഥത ചേർത്തു, പുതിയ തലമുറയെ സിനിമയുടെ ശക്തിയിൽ വിശ്വസിപ്പിച്ച കലാകാരനാണ് വിനീത് ശ്രീനിവാസൻ. ഇന്ന് തന്റെ 41-ാമത്തെ ജന്മദിനം ആഘോഷിക്കുന്ന വിനീതിന്, മലയാളികളും, സംഗീതപ്രേമികളും, സിനിമാപ്രേമികളും ചേർന്ന് ഹൃദയം നിറഞ്ഞ ആശംസകൾ നേർന്നു കൊണ്ടിരിക്കുന്നു.
“സിനിമകളിലും, ഗാനങ്ങളിലും, ജീവിതത്തിലും ഇനിയും അനേകം ഹൃദയങ്ങൾ തൊടാൻ അദ്ദേഹത്തിനാകട്ടെ.”
ഒരിക്കൽ കൂടി സെല്ലുലോയിഡിന്റെ ഹൃദയം നിറഞ്ഞ ജന്മദിനാശംസകൾ.