മലയാളത്തിലെ യുവ നടന്മാരിൽ ശ്രദ്ധേയനായ താരമാണ് നടൻ ഉണ്ണിമുകുന്ദൻ. മലയാളികളുടെ പ്രിയപ്പെട്ട ‘മല്ലു സിങ്ങായി വന്ന്’ , ചോര മണമുള്ള മാർക്കോയോളം അയാൾ നടന്നു കയറിയ ദൂരം അവിസ്മരണീയമാണ്. ഒരു നടനെന്ന നിലയിൽ നിന്നും ഒരു താരോദയത്തിലേക്കുള്ള നടന്നു കയറ്റമായിരുന്നു ആ ദൂരം. നടനായും, പ്രതിനായകനായും, സഹനടനായും, ലഭിക്കുന്ന വേഷങ്ങളൊക്കെ അത്രയും മനോഹരമാക്കി പ്രേക്ഷകരിലേക്കെത്തിക്കുന്നതിൽ ഉണ്ണി മുകുന്ദൻ എന്നും വിജയിച്ചിട്ടുണ്ട്. ഭാഷയുടെ അതിർ വരമ്പുകൾ ഭേദിച്ച് ഒരു നടനെന്ന നിലയിൽ അദ്ദേഹം ഉണ്ടാക്കിയെടുത്ത സ്റ്റാർടവും ചെറുതല്ല. ഇന്ന് മലയാള സിനിമാപ്രേമികളും, ഫിറ്റ്നസ് പ്രേമികളും, ക്രിക്കറ്റ് ആരാധകരും ഒരുപോലെ സ്വീകരിക്കുന്ന ഉണ്ണിമുകുന്ദന്റെ ജന്മദിനമാണ്. ‘മാളികപ്പുറ’ത്തിലെ ഭക്തനായ അയ്യപ്പദാസും, ‘മാർക്കോ’യിലെ ഭീകരവേഷവും, ‘മേപ്പടിയാ’നിലെ മനുഷ്യസ്നേഹിയും, ‘ജനത ഗാരേജി’ലെ ശക്തനായ വില്ലനും നിർമ്മാതാവുമായ ഉണ്ണി മുകുന്ദന് ഹൃദയം നിറഞ്ഞ ജന്മദിനാശംസകൾ.
1987 സെപ്റ്റംബർ 22-ന് തൃശൂരിലെ മഠത്തിപ്പറമ്പിലാണ് ഉണ്ണി മുകുന്ദന്റെ ജനനം. മുകുന്ദൻ നായരുടെയും റോജി മുകുന്ദന്റെയും മകനാണ്. ഗുജറാത്തിലെ അഹമ്മദാബാദിലാണ് ഉണ്ണിയുടെ ബാല്യം. സ്കൂൾ വിദ്യാഭ്യാസം പൂർത്തിയാക്കിയ ശേഷം, തൃശൂരിലെ പ്രജ്യോതി നികേതൻ കോളേജിൽ ഇംഗ്ലീഷ് സാഹിത്യത്തിലും പത്രപ്രവർത്തനത്തിലും ബിരുദം നേടി. സിനിമാ ലോകത്തേക്ക് കടക്കുന്നതിന് മുമ്പ്, “മോട്ടിഫ്” (ഇന്നത്തെ TTEC) എന്ന സ്ഥാപനത്തിൽ ജോലി ചെയ്തിരുന്നുവെന്നത് പലർക്കും അറിയാത്തൊരു വസ്തുതയാണ്.
തമിഴ് സിനിമയായ സീദാൻ (2011) വഴിയാണ് ഉണ്ണിയുടെ സിനിമാരംഗത്തേക്കുള്ള പ്രവേശനം. മലയാള സിനിമയിലെ ആദ്യ ചിത്രം ബാങ്കോക്ക് സമ്മറായിരുന്നു. ചിത്രം അഭിനയ മികവിനൊപ്പം പുതുമുഖത്തിനുള്ള അനവധി അവാർഡുകളും അദ്ദേഹത്തിന് നേടിക്കൊടുത്തു.
2012-ൽ വൈശാഖ് സംവിധാനം ചെയ്ത ‘മല്ലു സിംഗ്’ അദ്ദേഹത്തിന്റെ കരിയറിലെ ടേണിംഗ് പോയിന്റായി മാറി. ആ സമയത്ത് തന്നെ, വലിയ ആരാധകപിന്തുണ അദ്ദേഹം സ്വന്തമാക്കുകയും ചെയ്തു. തുടർന്ന് വിക്രമാദിത്യൻ (2014), കെഎൽ 10 പത്ത് (2015), സ്റ്റൈൽ (2016), ഒരു മുറൈ വന്തു പാർത്ഥായ (2016), അച്ചായൻസ് (2017) തുടങ്ങി നിരവധി ഹിറ്റുകൾ അദ്ദേഹത്തിന്റെ കരിയറിനെ ഉയർത്തി.
മലയാളത്തിനപ്പുറം, തെലുങ്ക്-തമിഴ് വ്യവസായങ്ങളിലും അദ്ദേഹം സ്വന്തം സ്ഥാനം ഉറപ്പിച്ചിട്ടുണ്ടായിരുന്നു. 2016-ലെ ‘ജനത ഗാരേജ്’ (മോഹൻലാലിനൊപ്പം), 2018-ലെ ‘ഭാഗമതി’, 2024-ലെ ‘ഗരുഡൻ’ തുടങ്ങിയവയിലൂടെ തെക്കേന്ത്യൻ സിനിമാപ്രേമികളുടെ മനസ്സിൽ ഇടം നേടി. വില്ലൻ വേഷങ്ങൾ പോലും ശക്തമായ സ്ക്രീൻ പ്രസൻസ് കൊണ്ട് അദ്ദേഹം ആരാധകരെ സ്വന്തമാക്കി.
2020-ൽ Unni Mukundan Films (UMF) സ്ഥാപിച്ച്, സ്വതന്ത്രമായൊരു നിർമ്മാതാവായി. മേപ്പടിയാൻ (2022) മാത്രമല്ല, ഷെഫീക്കിന്റെ സന്തോഷം (2022), ജയ് ഗണേശ് (2024) എന്നിവയും UMF ബാനറിൽ പുറത്തിറങ്ങി. മേപ്പടിയാൻക്ക് ദേശീയ ചലച്ചിത്ര അവാർഡും അദ്ദേഹത്തിന് ലഭിച്ചു. ഒരു നടനായും, നിർമ്മാതാവായും സിനിമയോടുള്ള ഉത്തരവാദിത്വവും ബോധവും അദ്ദേഹം തെളിയിച്ചു.
‘മോളിവുഡിലെ മസിൽ മാൻ’ എന്ന് ആരാധകർ വിളിക്കുന്ന ഉണ്ണി, ഫിറ്റ്നസിനോടുള്ള സമർപ്പണത്തിലൂടെ മലയാളത്തിൽ ഒരു പുതിയ ട്രെൻഡ് സൃഷ്ടിച്ചു. മാർക്കോയിലെ രക്തമൂടിയ കരുത്തനായ കഥാപാത്രത്തിന്റെ പിറവിക്ക് പിന്നിൽ, മണിക്കൂറുകളോളം ജിമ്മിൽ ഒഴുക്കിയ വിയർപ്പിന്റെ കഥയും പ്രചോദനമാണ്. ആരാധകർക്കായി അദ്ദേഹം പലപ്പോഴും തന്റെ ഫിറ്റ്നസ് ടിപ്പുകൾ പങ്കുവയ്ക്കാറുണ്ട്.
അഭിനയത്തിനപ്പുറം, ഗായകനായും ഗാനരചയിതാവായും അദ്ദേഹം ശ്രദ്ധിക്കപ്പെട്ടു. അച്ചായൻസ് (2017) എന്ന ചിത്രത്തിലെ “അനുരാഗം പുതുമഴ പോലെ” എന്ന ഗാനത്തിലൂടെയാണ് പിന്നണി ഗായകനായി അരങ്ങേറ്റം. തുടർന്ന് ‘ചാണക്യതന്ത്രം, ഷെഫീക്കിന്റെ സന്തോഷം’ തുടങ്ങി നിരവധി ചിത്രങ്ങളിൽ ഗാനങ്ങൾ ആലപിച്ചു.
ഉണ്ണി മുകുന്ദൻ അഭിനയത്തിലോ നിർമ്മാണത്തിലോ ഒതുങ്ങുന്നില്ല. റോഡ് സുരക്ഷാ ക്യാംപെയിനുകളിലൂടെയും വിവിധ സാമൂഹിക പ്രവർത്തനങ്ങളിലൂടെയും അദ്ദേഹം പങ്കാളിയാകുന്നു. ആരാധകരെ എന്നും പോസിറ്റീവ് സന്ദേശങ്ങളിലൂടെ പ്രചോദിപ്പിക്കുന്ന ഒരാള് കൂടിയാണ് അദ്ദേഹം.
സിനിമയ്ക്കപ്പുറം, ക്രിക്കറ്റാണ് ഉണ്ണിയുടെ മറ്റൊരു വലിയ പാഷൻ. 2025-ലെ സെലിബ്രിറ്റി ക്രിക്കറ്റ് ലീഗിൽ (CCL) കേരള സ്ട്രൈക്കേഴ്സിന്റെ ക്യാപ്റ്റൻ ആയി അദ്ദേഹത്തെ പ്രഖ്യാപിച്ചിട്ടുണ്ട്. 2011 മുതൽ തന്നെ കേരള സ്ട്രൈക്കേഴ്സിനൊപ്പം അദ്ദേഹം കളിച്ചു വരികയാണ്.
ഓരോ ചിത്രത്തിലും കഥാപാത്രത്തെ സ്വന്തം ശരീരത്തിലും മനസ്സിലും ഏറ്റെടുത്താണ് അദ്ദേഹം അഭിനയിക്കുന്നത്. അതുകൊണ്ടുതന്നെ, കുടുംബ സിനിമകളിൽ നിന്നും മാസ് ആക്ഷൻ ചിത്രങ്ങളിലേക്കും, പോസിറ്റീവ് കഥാപാത്രങ്ങളിൽ നിന്നും വില്ലൻ വേഷങ്ങളിലേക്കും, എല്ലാ മേഖലകളിലും അദ്ദേഹം വിജയകരമായി സഞ്ചരിക്കുന്നു.
ഏഷ്യാനെറ്റ് ഫിലിം അവാർഡ് (പുതുമുഖം – 2011), SIIMA Award (Best Debut – Malayalam), രാമു കാര്യാട്ട് അവാർഡുകൾ (മികച്ച നടൻ, മികച്ച രണ്ടാമത്തെ നടൻ), ദേശീയ ചലച്ചിത്ര അവാർഡ് (നിർമ്മാതാവ് – മേപ്പടിയാൻ, 2021), തുടങ്ങിയ അവാർഡുകൾ അദ്ദേഹം സ്വന്തമാക്കിയിട്ടുണ്ട്.
സ്വകാര്യ ജീവിതത്തിൽ അദ്ദേഹം ആരാധകരോട് തുറന്നു സംസാരിക്കുന്നതും, സോഷ്യൽ മീഡിയയിലൂടെ അവരുടെ സ്നേഹം ഏറ്റുവാങ്ങുന്നതും പതിവാണ്. അദ്ദേഹം ജീവിതത്തോട് കാണിക്കുന്ന പോസിറ്റീവ് സമീപനമാണ് യുവാക്കളിൽ പ്രചോദനമായിത്തീർന്നിരിക്കുന്നത്, .
ജീവിതത്തിലെ ഓരോ കഥാപാത്രത്തിലും, ഓരോ തീരുമാനത്തിലും, ഓരോ വേഷത്തിലും അദ്ദേഹം സൃഷ്ടിച്ച വ്യത്യസ്തമായൊരു മുദ്ര, ഇനി വരുന്ന വർഷങ്ങളിലും അദ്ദേഹം തുടരുമെന്നുറപ്പ് പ്രതീക്ഷിക്കട്ടെ. നിരവധി കഥാപാത്രങ്ങളിലൂടെ ഇനിയും നമ്മളെ വിസ്മയിപ്പിക്കാൻ അദ്ദേഹത്തിന് കഴിയട്ടെ എന്നാശംസിക്കുന്നു. ഒരിക്കൽ കൂടി ഉണ്ണി മുകുന്ദന് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.