അഭിനയം കൊണ്ടും ശബ്ദം കൊണ്ടും പ്രേക്ഷകരുടെ ഹൃദയം കവർന്ന നായികയാണ് ‘രമ്യ നമ്പീശൻ’. വളരെ ചുരുങ്ങിയ ചിത്രങ്ങൾ കൊണ്ട് തന്നെ തന്റേതായൊരിടം മലയാള സിനിമയിൽ എഴുതി ചേർക്കാൻ രമ്യക്കായിട്ടുണ്ട്. മലയാളത്തിന് പുറമെ തമിഴിലും, തെലുങ്കിലും, കന്നടയിലും സജീവമാണ് താരം. ഇന്ന് രമ്യയുടെ ജന്മദിനമാണ്. മലയാളത്തിന്റെ പ്രിയപ്പെട്ട കലാകാരിക്ക് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.
1986 ജനുവരി 1-ന് എറണാകുളം ജില്ലയിലെ ചോറ്റാനിക്കരയിൽ, ശ്രീനിലയം എന്ന വീട്ടിൽ, സുബ്രഹ്മണ്യൻ ഉണ്ണിയുടെയും ജയശ്രീയുടെയും മകളായാണ് രമ്യ നമ്പീശന്റെ ജനനം. കല അവർക്കൊരു അന്യമായ അനുഭവമല്ലായിരുന്നു. അച്ഛൻ സുബ്രഹ്മണ്യൻ ഉണ്ണി മുൻ നാടക കലാകാരനായിരുന്നു; “ജൂബിലി”, “ഹരിശ്രീ” തുടങ്ങിയ പ്രമുഖ നാടകസംഘങ്ങളിൽ സജീവ സാന്നിധ്യമായിരുന്നു അദ്ദേഹം. അങ്ങനെ കലയും സംസ്കാരവും നിറഞ്ഞ ഒരു കുടുംബാന്തരീക്ഷത്തിലാണ് രമ്യ വളർന്നത്.
ചോറ്റാനിക്കരയ്ക്കടുത്തുള്ള അമ്പാടിമലയിലെ മഹാത്മാഗാന്ധി പബ്ലിക് സ്കൂളിലാണ് രമ്യയുടെ പ്രാഥമിക വിദ്യാഭ്യാസം. തുടർന്ന് എറണാകുളം സെന്റ് തെരേസാസ് കോളേജിൽ നിന്ന് കമ്മ്യൂണിക്കേറ്റീവ് ഇംഗ്ലീഷിൽ ബിരുദം നേടി. അക്കാദമിക് വിദ്യാഭ്യാസത്തിനൊപ്പം തന്നെ ഭരതനാട്യത്തിലും ശാസ്ത്രീയ സംഗീതത്തിലും പരിശീലനം നേടിയിരുന്നു. ഈ പരിശീലനങ്ങളാണ് പിന്നീട് അഭിനയത്തിലും ഗാനത്തിലും അവർക്കുള്ള ആത്മവിശ്വാസത്തിന്റെയും കൃത്യതയുടെയും അടിത്തറയായി മാറിയത്. ഒൻപതാം ക്ലാസ് വിദ്യാർത്ഥിനിയായിരിക്കെ ‘സായാഹ്നം’ എന്ന ചിത്രത്തിലൂടെ രമ്യ സിനിമാരംഗത്തേക്ക് കടന്നുവന്നു. എന്നാൽ 2000-കളുടെ തുടക്കത്തിൽ ബാലതാരമായും സഹനടിയായും ചെയ്ത വേഷങ്ങളിലൂടെയാണ് അവർ ശ്രദ്ധ നേടുന്നത്. സത്യൻ അന്തിക്കാട് സംവിധാനം ചെയ്ത ‘നരേന്ദ്രൻ മകൻ ജയകാന്തൻ വക’ (2001), ‘ഗ്രാമഫോൺ’ (2003) തുടങ്ങിയ ചിത്രങ്ങളിൽ ചെറിയ വേഷങ്ങളിലൂടെ തന്നെ രമ്യ തന്റെ സാന്നിധ്യം ഉറപ്പിച്ചു. ശലഭം, പെരുമഴക്കാലം, പന്തയക്കോഴി, അന്തിപ്പൊൻവെട്ടം, ചങ്ങാതിപ്പൂച്ച തുടങ്ങിയ ചിത്രങ്ങളിലും അവർ അഭിനയിച്ചു.
2006-ൽ പുറത്തിറങ്ങിയ ‘ആനച്ചന്തം’ എന്ന ചിത്രത്തിലൂടെയാണ് രമ്യ ആദ്യമായി നായികാ വേഷം കൈകാര്യം ചെയ്യുന്നത്. ഒരു ധീരയായ നൃത്താധ്യാപികയുടെ വേഷം അവതരിപ്പിച്ച ഈ ചിത്രം, രമ്യയ്ക്ക് ഒരു നടിയെന്ന നിലയിൽ വ്യക്തമായ തിരിച്ചറിവ് നൽകി. അതിനുശേഷം മലയാള സിനിമയിൽ ശ്രദ്ധേയമായ നിരവധി കഥാപാത്രങ്ങളാണ് അവർ അവതരിപ്പിച്ചത്. ജയറാമായിരുന്നു ചിത്രത്തിലെ നായകൻ.
‘ചോക്ലേറ്റ്’, ‘ട്രാഫിക്’, ‘ചാപ്പ കുരിശ്’ തുടങ്ങിയ ചിത്രങ്ങളിലെ കഥാപാത്രങ്ങൾ രമ്യയുടെ അഭിനയജീവിതത്തിലെ പ്രധാന വഴിത്തിരിവുകളായി. ഗ്ലാമറിനേക്കാൾ പ്രകടനത്തിന് പ്രാധാന്യം നൽകുന്ന കഥാപാത്രങ്ങൾ തിരഞ്ഞെടുക്കുന്ന നടിയെന്ന നിലയിൽ അവർ ശ്രദ്ധിക്കപ്പെട്ടു. ‘ബാച്ചിലർ പാർട്ടി’, ‘ഇവൻ മേഘരൂപൻ’, ‘ഹസ്ബൻഡ്സ് ഇൻ ഗോവ’, ‘ഒരു യാത്രയിൽ’ തുടങ്ങിയ സിനിമകളിലും അതിഥി വേഷങ്ങളിലൂടെയും സഹവേഷങ്ങളിലൂടെയും അവർ വ്യത്യസ്ത നിറങ്ങൾ തെളിയിച്ചു.
മലയാളത്തിന് പുറമെ തമിഴ് സിനിമയിലും രമ്യ ശക്തമായ സാന്നിധ്യം രേഖപ്പെടുത്തി. ‘രാമൻ തേടിയ സീതൈ’, കരുണാനിധിയുടെ തിരക്കഥയിൽ പുറത്തിറങ്ങിയ ‘ഇളൈഞ്ജൻ’, ‘കുള്ളനാറിക്കൂട്ടം’, ‘ആട്ടനായകൻ’ തുടങ്ങിയ ചിത്രങ്ങളിലെ നായികാ വേഷങ്ങൾ തമിഴ് സിനിമയിൽ അവർക്കൊരു ഉറച്ച സ്ഥാനം നൽകുകയും ചെയ്തു. തെലുങ്ക്, കന്നഡ ഭാഷാ ചിത്രങ്ങളിലേക്കും അവരുടെ അഭിനയയാത്ര വ്യാപിച്ചു.
നടിയെന്നതിലുപരി, രമ്യ നമ്പീശനെ വ്യത്യസ്തയാക്കുന്നത് അവരുടെ ശബ്ദമാണ്. സിനിമയിൽ അഭിനയിക്കുന്നതിന് മുമ്പ് തന്നെ അവർ ഒരു ടെലിവിഷൻ അവതാരകയായി ശ്രദ്ധ നേടിയിരുന്നു. കൈരളി ടിവിയിലെ ‘ഹലോ ഗുഡ് ഈവനിംഗ്’ എന്ന പരിപാടിയുടെ അവതാരകയായി ടെലിവിഷൻ രംഗത്തേക്ക് എത്തിയ രമ്യ, പിന്നീട് ഭക്തിഗാന ആൽബങ്ങളിലൂടെയും സംഗീതലോകത്ത് സജീവമായി.
2012-ൽ ‘ഇവൻ മേഘരൂപൻ’ എന്ന ചിത്രത്തിലെ കാവാലത്തിന്റെ നാടൻ ഗാനം “ആണ്ടേ ലോണ്ടേ” പാടിക്കൊണ്ടാണ് രമ്യ പിന്നണി ഗാനരംഗത്തേക്ക് ഔദ്യോഗികമായി പ്രവേശിച്ചത്. സംഗീത സംവിധായകൻ ശരത്ത് ഈണം ഒരുക്കിയ ഈ ഗാനം, രമ്യയുടെ ശബ്ദത്തിന്റെ സ്വാഭാവികതയും നാടൻ ചായവും പ്രേക്ഷകർക്ക് പരിചയപ്പെടുത്തി. അതിന് പിന്നാലെ ‘തട്ടത്തിൻ മറയത്ത്’ എന്ന ചിത്രത്തിലെ “മുത്തുച്ചിപ്പി പോലൊരു” എന്ന ഗാനം വൻ ഹിറ്റായി മാറി. ഈ ഗാനത്തോടെ രമ്യ ഒരു ഗായികയായി മലയാളികളുടെ മനസ്സിൽ സ്ഥിരം ഇടം നേടി.
പിന്നീട് ‘ആമേൻ’, ‘സൈക്കിൾ തീവ്സ്’, ‘ഓം ശാന്തി ഓശാന’, അടി കപ്യാരെ കൂട്ടമണി’, ‘ആകാശവാണി’, ‘അച്ചായന്മാർ’, ‘ആനും പെണ്ണും’, ‘പുഷ്പ: ദി റൈസ്’ (മലയാളം ഡബ്ബ് പതിപ്പ്) തുടങ്ങി നിരവധി ചിത്രങ്ങളിൽ അവർ ശബ്ദം നൽകി. തമിഴിലും തെലുങ്കിലും പാടിയ ഗാനങ്ങൾക്കും മികച്ച സ്വീകാര്യത ലഭിച്ചു. ‘പാണ്ഡ്യനാട്’ എന്ന തമിഴ് ചിത്രത്തിലെ “ഫൈ ഫൈ ഫൈ കലാച്ചിഫൈ” എന്ന ഗാനത്തിന് SIIMA അവാർഡിലേക്കുള്ള നാമനിർദ്ദേശവും ലഭിച്ചു.
രമ്യയുടെ കലാപ്രയത്നങ്ങൾക്ക് നിരവധി പുരസ്കാരങ്ങളും അംഗീകാരങ്ങളും ലഭിച്ചിട്ടുണ്ട്. 2012-ൽ വനിത ഫിലിം അവാർഡ്സിൽ മികച്ച സഹനടിക്കുള്ള പുരസ്കാരം നേടി. 2013-ൽ അമൃത ഫിലിം അവാർഡ്സിലും വനിത ഫിലിം അവാർഡ്സിലും മികച്ച ഗായികയായി തിരഞ്ഞെടുക്കപ്പെട്ടു. 2014-ൽ ജയ്ഹിന്ദ് ടിവി അവാർഡ്സിൽ മികച്ച ജനപ്രിയ നടി (അഭിനേത്രി-ഗായിക) എന്ന ബഹുമതിയും അവർക്ക് ലഭിച്ചു. ഈ അംഗീകാരങ്ങൾ, അഭിനയത്തിലും ഗാനത്തിലും ഒരുപോലെ മികവ് തെളിയിച്ച കലാകാരിയെന്ന നിലയിൽ രമ്യയുടെ സ്ഥാനം ഉറപ്പിക്കുന്നു.
സ്വന്തം ബാൻഡും ആരംഭിച്ച് സംഗീതത്തിൽ കൂടുതൽ സജീവമാകാനുള്ള ശ്രമങ്ങളും രമ്യ നടത്തിയിട്ടുണ്ട്. സിനിമയ്ക്ക് പുറത്ത്, കലാപരമായ സ്വതന്ത്ര പരീക്ഷണങ്ങൾ നടത്താൻ അവർ കാണിക്കുന്ന താത്പര്യം, അവരുടെ കലാപ്രേമത്തിന്റെ ആഴം വ്യക്തമാക്കുന്നു. ലളിതമായ ജീവിതശൈലിയും ആത്മാർത്ഥമായ പെരുമാറ്റവുമാണ് ആരാധകർക്ക് രമ്യയെ കൂടുതൽ പ്രിയങ്കരയാക്കുന്നത്. നടി, ഗായിക, അവതാരക ഈ മൂന്നു മേഖലകളിലും ഒരുപോലെ തിളങ്ങാൻ കഴിഞ്ഞ രമ്യ നമ്പീശൻ, സമകാലിക ഇന്ത്യൻ സിനിമയിലെ ഒരു ബഹുമുഖ പ്രതിഭയാണ്. 70-ലധികം സിനിമകളിലൂടെയും അനവധി ഗാനങ്ങളിലൂടെയും അവർ സമ്മാനിച്ച കലാനുഭവങ്ങൾ മലയാളി ഒരുപോലെ നെഞ്ചിലേറ്റിയിട്ടുണ്ട്. ഈ ജന്മദിനത്തിൽ, രമ്യ നമ്പീശന് ആരോഗ്യവും സന്തോഷവും സൃഷ്ടിപരമായ ഊർജവും നിറഞ്ഞ ഒരു പുതുവർഷം ആശംസിക്കാം. ഇനിയും നിരവധി മികച്ച കഥാപാത്രങ്ങളിലൂടെയും ഹൃദയസ്പർശിയായ ഗാനങ്ങളിലൂടെയും അവർ പ്രേക്ഷകരെ അത്ഭുതപ്പെടുത്തട്ടെ.