മലയാളം തമിഴ് സിനിമകളിലും ടെലിവിഷൻ പാരമ്പരകളിലും സജീവമായൊരു നടനാണ് അജയ് കുമാർ എന്ന”ഗിന്നസ് പക്രു”. തന്റെ കലാജീവിതം, പ്രതിഭ, ഉറച്ച മനസ്സ് എന്നിവകൊണ്ട് കോടിക്കണക്കിന് മലയാളികളുടെ ഹൃദയത്തിൽ അദ്ദേഹം ഇടം നേടിയിട്ടുണ്ട്. തന്റെ കുറവുകളെ കരുത്താക്കി ആ പ്രതിഭ മലയാള സിനിമക്ക് നൽകിയ സംഭാവനകൾ ചെറുതല്ല. “അമ്പിളി അമ്മാവൻ” മുതൽ 916 കുഞ്ഞൂട്ടൻ വരെ ഗിന്നസ് പക്രു അനശ്വരമാക്കിയ കഥാപാത്രങ്ങളുടെ വലിപ്പം അദ്ദേഹത്തിൻറെ ഹൃദയ വിശാലതയോളം പോന്നതാണ്. മലയാളത്തത്തിന്റെ സ്വന്തം ഗിന്നസ് പക്രു വിന് ഹൃദയം നിറഞ്ഞ ജന്മദിനാശംസകൾ.
കൊല്ലം ജില്ലയിലെ ഈസ്റ്റ് കല്ലടയിലാണ് ഗിന്നസ് പക്രുവിന്റെ ജനനം. അച്ഛൻ രാധാകൃഷ്ണപിള്ള, അമ്മ അംബുജാക്ഷിയമ്മ. അച്ഛൻ ഒരു ഓട്ടോ ഡ്രൈവറായും അമ്മ എൽഐസി ഏജന്റായും ജോലി ചെയ്തിരുന്നു. കുടുംബം പിന്നീട് കോട്ടയത്തേക്ക് താമസം മാറി. അമ്മയ്ക്ക് പലപ്പോഴും ജോലി സ്ഥലമാറ്റം ലഭിച്ചതിനാൽ, കുടുംബം പല സ്ഥലങ്ങളിലും താമസിച്ച ശേഷം അയ്മനത്തെ പാണ്ഡവത്തിൽ സ്ഥിരതാമസമാക്കി. പക്രുവിന് രണ്ട് ഇളയ സഹോദരിമാരുണ്ട് – കവിതയും സംഗീതയും. പഠനത്തിൽ അദ്ദേഹം കഴിവുറ്റ വിദ്യാർത്ഥിയായിരുന്നു. ചാലുകുന്നിലെ CMS എൽപി സ്കൂളിൽ ആരംഭിച്ച പഠനം, പിന്നീട് ഒലസ്സ CMS ഹൈസ്കൂൾ വരെയെത്തി. തുടർന്ന് കോട്ടയം ബസേലിയസ് കോളേജിൽ ചേർന്ന് പ്രീഡിഗ്രിയും സാമ്പത്തിക ശാസ്ത്രത്തിൽ ബിരുദവും നേടി. കമ്പ്യൂട്ടർ സയൻസിൽ ഡിപ്ലോമയും പൂർത്തിയാക്കിയിട്ടുണ്ട്.
പക്രുവിന്റെ കലാപ്രതിഭ ബാല്യകാലം മുതലേ പ്രകടമായിരുന്നു. കോളേജ് ജീവിതം പൂർത്തിയാക്കിയ ശേഷം അദ്ദേഹം കഥാപ്രസംഗം അവതരിപ്പിച്ചു തുടങ്ങി. കേരളം മുഴുവൻ നടത്തിയ പര്യടനങ്ങൾ വഴി അദ്ദേഹത്തിന് വലിയ ജനശ്രദ്ധ ലഭിച്ചു . കഥാപ്രസംഗത്തിനൊപ്പം മിമിക്രിയും അവതരിപ്പിച്ചപ്പോൾ, അദ്ദേഹത്തിന്റെ പരിപാടികൾ കൂടുതൽ ജനപ്രിയമായി. പ്രശസ്ത നടൻ സലിം കുമാർ അദ്ദേഹത്തെ പ്രോത്സാഹിപ്പിച്ചവരിലൊരാളായിരുന്നു. തുടർന്ന് പക്രു കോട്ടയം നസീറിന്റെ “മംഗളം മിമിക്സ്” ട്രൂപ്പിലും പിന്നീട് “കൊച്ചിൻ ഡിസ്കവറി” ട്രൂപ്പിലും ചേർന്നു. ജയസൂര്യ പോലുള്ള കലാകാരന്മാരുമായി ഒരുമിച്ച് പരിപാടികൾ അവതരിപ്പിച്ച കാലം അദ്ദേഹത്തിന് വലിയ അനുഭവങ്ങൾ നൽകി. ഈ വേദി വിജയങ്ങളാണ് അദ്ദേഹത്തെ ടെലിവിഷൻ പരിപാടികളിലേക്ക് എത്തിച്ചത്. “സിനിമാല”, “ഒരു വടക്കൻ ഹാസ്യഗാഥ” പോലുള്ള പരിപാടികളിലൂടെയാണ് അദ്ദേഹം ടെലിവിഷനിൽ ശ്രദ്ധ നേടുന്നത്.
1984-ൽ പുറത്തിറങ്ങിയ “അമ്പിളി അമ്മാവൻ” എന്ന ചിത്രത്തിലൂടെ ബാലതാരമായിട്ടാണ് പക്രു സിനിമയിൽ അരങ്ങേറ്റം കുറിച്ചത്. പിന്നീട് നിരവധി ചിത്രങ്ങളിൽ ചെറു വേഷങ്ങളിലൂടെ തുടർന്നു. 2005-ൽ വിനയൻ സംവിധാനം ചെയ്ത “അത്ഭുത ദ്വീപ്” എന്ന സിനിമയാണ് അദ്ദേഹത്തിന്റെ കരിയറിൽ വലിയ മാറ്റം സൃഷ്ടിച്ചത്. കുള്ളന്മാർ മാത്രം വസിക്കുന്ന ഒരു ദ്വീപിൽ കുടുങ്ങിയ മനുഷ്യരുടെ കഥ പറഞ്ഞ ഈ ചിത്രത്തിൽ, പ്രിൻസ് ഗജേന്ദ്രൻ എന്ന കഥാപാത്രത്തെ അവതരിപ്പിച്ച പക്രു, പ്രേക്ഷകരുടെ മനസിൽ നിറഞ്ഞു നിന്നു. ഈ വേഷം അദ്ദേഹത്തിന് കേരള സംസ്ഥാന ചലച്ചിത്ര അവാർഡ് – പ്രത്യേക പരാമർശം നേടിക്കൊടുത്തു.
പക്രുവിന്റെ ഏറ്റവും വലിയ നേട്ടം അദ്ദേഹത്തിന്റെ ഗിന്നസ് വേൾഡ് റെക്കോർഡ് ആണ്. 2008-ൽ, “അത്ഭുത ദ്വീപ്” എന്ന ചിത്രത്തിലെ മുഖ്യകഥാപാത്രമായി അഭിനയിച്ചതിന്റെ അടിസ്ഥാനത്തിൽ, ‘മുതിർന്നവരുടെ പ്രധാന വേഷത്തിലെ ഏറ്റവും ഉയരം കുറഞ്ഞ നടൻ’ എന്ന ഗിന്നസ് വേൾഡ് റെക്കോർഡ് അദ്ദേഹത്തിന് ലഭിച്ചു. 2 അടി 6 ഇഞ്ച് (76 സെ.മീ) ഉയരമുള്ള നടനായിട്ടാണ് അദ്ദേഹം ലോക റെക്കോർഡ് സ്വന്തമാക്കിയത്.
പിന്നീട്, 2013-ൽ പുറത്തിറങ്ങിയ “കുട്ടീം കോലും” എന്ന ചിത്രത്തിലൂടെ, ലോകത്തിലെ ഏറ്റവും പൊക്കം കുറഞ്ഞ സംവിധായകൻ എന്ന ബഹുമതിയും സ്വന്തമാക്കി. 2018 ഏപ്രിൽ 21-ന്, ലിംഗ ബുക്ക് ഓഫ് റെക്കോർഡ്സ്, യൂണിവേഴ്സൽ റെക്കോർഡ് ഫോറം, ബെസ്റ്റ് ഓഫ് ഇന്ത്യ എന്നീ മൂന്ന് സംഘടനകളിൽ നിന്ന് കൂടി അദ്ദേഹം അംഗീകാരങ്ങൾ നേടി.
മലയാളത്തിനപ്പുറം പക്രുവിന്റെ കഴിവുകൾ തമിഴ് സിനിമാലോകവും തിരിച്ചറിഞ്ഞു. “ദിഷ്യം” (2006) എന്ന ചിത്രത്തിലൂടെ തമിഴിൽ അരങ്ങേറ്റം കുറിച്ച അദ്ദേഹം, മികച്ച പ്രകടനത്തിന് തമിഴ്നാട് സംസ്ഥാന ചലച്ചിത്ര അവാർഡ് – പ്രത്യേക സമ്മാനം നേടി. തുടർന്ന് “അർപ്പുത തീവു”, “കാവലൻ”, “7 ഓം അറിവ്”, “ബഗീര” തുടങ്ങി പല ചിത്രങ്ങളിലും അഭിനയിച്ചു.
2013-ൽ പുറത്തിറങ്ങിയ “കുട്ടീം കോലും” എന്ന ചിത്രത്തിലൂടെയാണ് പക്രു സംവിധായകനായി മാറിയത്. ഈ ചിത്രത്തിൽ അദ്ദേഹം പ്രധാന വേഷവും ചെയ്തു. പിന്നാലെ “ഫാൻസി ഡ്രസ്” (2019) എന്ന ചിത്രത്തിൽ അദ്ദേഹം നിർമ്മാതാവായും സാന്നിധ്യം ഉറപ്പിച്ചു. പക്രു മലയാള ടെലിവിഷൻ ലോകത്തും ഏറെ സജീവമാണ്. നിരവധി കോമഡി ഷോകളിൽ ജഡ്ജ് ആയി, പ്രസന്റർ ആയി, പങ്കാളി ആയി അദ്ദേഹം പങ്കെടുത്തു.
“സവാരി ഗിരി ഗിരി”, “വല്ലഭൻ C/O വല്ലഭൻ”, “സിനിമാല”, “കോമഡി ഉത്സവം”, “കുട്ടിക്കലവറ”, “കോമഡി മാസ്റ്റേഴ്സ്” എന്നിവ ഉൾപ്പെടെ നിരവധി പരിപാടികളിലൂടെ അദ്ദേഹം പ്രേക്ഷകരുടെ പ്രിയങ്കരനായി മാറി. 2006 മാർച്ച് 9-ന് പക്രു ഗായത്രി മോഹനെ വിവാഹം കഴിച്ചു. ഗായത്രിക്ക് സാധാരണ ഉയരമുണ്ട്, അവരുടെ വിവാഹം വലിയ മാധ്യമ ശ്രദ്ധ നേടിയിരുന്നു. ഇവർക്കു രണ്ടു മക്കളുണ്ട്. കുടുംബജീവിതത്തിലും അദ്ദേഹം സന്തോഷകരമായ മാതൃകയാണ്.
മലയാള സിനിമയിലെ കോമഡി താരങ്ങളിൽ ഒരാളായിട്ടാണ് പക്രുവിനെ ആദ്യം കണ്ടു തുടങ്ങിയത്. പക്ഷേ, അതിൽ ഒതുങ്ങാതെ അദ്ദേഹം സീരിയസായ കഥാപാത്രങ്ങളും, വേദിയിലൂടെയുള്ള പ്രഭാഷണങ്ങളും, സംവിധാനവും, ടെലിവിഷൻ സാന്നിധ്യവും വഴി തന്റെ കഴിവുകൾ തെളിയിച്ചു. അദ്ദേഹത്തിന്റെ വ്യക്തിത്വം, പോസിറ്റീവ് മനോഭാവം, ആത്മവിശ്വാസം എന്നിവയാണ് അദ്ദേഹത്തെ പ്രത്യേകതയുള്ള കലാകാരനാക്കുന്നത്.
മലയാള സിനിമയുടെ ചരിത്രത്തിൽ ഒരിക്കലും മറക്കാനാവാത്ത പേരാണ് ഗിന്നസ് പക്രു. ശരീരത്തിന്റെ ഉയരം കൊണ്ട് അല്ല, തന്റെ കലയുടെ ഉയരംകൊണ്ടാണ് അദ്ദേഹം ലോകം കീഴടക്കിയത്. അഭിനയത്തിലൂടെയും സംവിധാനത്തിലൂടെയും റെക്കോർഡുകളിലൂടെയും അദ്ദേഹം തെളിയിച്ചത്. പരിമിതികളല്ല കരുത്ത് ഉണ്ടെങ്കിൽ എന്തും സാധ്യമാകുമെന്നാണ്. ഉയരമില്ലാത്ത ഉയരങ്ങൾ കീഴടക്കിയ അതുല്യ കലാകാരന് ഒരിക്കൽ കൂടി ഹൃദയം നിറഞ്ഞ ജന്മദിനാശംസകൾ.