അനുരാജ് മനോഹറിന്റെ സംവിധാനത്തിൽ ടൊവിനോ തോമസ് നായകനാകുന്ന പൊളിറ്റിക്കൽ ഡ്രാമ ചിത്രം ‘നരിവേട്ട’യിലെ ആദ്യ ഗാനം റിലീസ് ചെയ്തു. ‘മിന്നൽ വള’ എന്ന പ്രണയഗാനം സോണി മ്യൂസിക് സൗത്തിന്റെ ഔദ്യോഗിക യൂട്യൂബ് ചാനലിലൂടെയാണ് പുറത്തിറക്കിയത്. ഗാനം ആലപിച്ചിരിക്കുന്നത് പ്രശസ്ത ഗായകർ സിദ് ശ്രീറാമും സിത്താര കൃഷ്ണകുമാറുമാണ്. സംഗീത സംവിധാനം നിർവഹിച്ചിരിക്കുന്നത് ജെക്ക്സ് ബിജോയ്, വരികൾ എഴുതിയിരിക്കുന്നത് കൈതപ്രം ദാമോദരൻ നമ്പൂതിരിയുമാണ്.
ചിത്രത്തിൽ ടൊവിനോയുടെ നായികയായി എത്തുന്നത് പ്രിയംവദ കൃഷ്ണനാണ്. പ്രിയംവദയുടെ അരങ്ങേറ്റ ചിത്രം കൂടിയാണിത്. ‘ചിത്രത്തിൽ പോലീസ് വേഷത്തിലാണ് ടൊവിനോ എത്തുന്നത്. ഒപ്പം സുരാജ് വെഞ്ഞാറമ്മൂട്, തമിഴ് നടൻ ചേരൻ, ഇന്ദ്രൻസ്, അൽതാഫ് സലിം, ബാലു വർഗീസ്, ധ്യാൻ ശ്രീനിവാസൻ, ദിവ്യ പിള്ള, രഞ്ജിത്ത്, ഷൈൻ ടോം ചാക്കോ, ലാൽ, സൗബിൻ ഷാഹിർ തുടങ്ങിയ പ്രമുഖരും അഭിനയിക്കുന്നു.
മെയ് 16ന് തിയേറ്ററുകളിലെത്തുന്ന ചിത്രത്തിന്റെ ട്രെയ്ലറോ ടീസറോ ഇതുവരെ പുറത്തിറങ്ങിയിട്ടില്ല. വിജയ് ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിങ്ങ് ഷമീർ മുഹമ്മദ് ആണ് കൈകാര്യം ചെയ്യുന്നത്. ഇന്ത്യൻ ഫിലിം കമ്പനിയുടെ ബാനറിൽ ടിപ്പു ഷായും ഷിയാസ് ഹസ്സനും ചേർന്നാണ് ചിത്രം നിർമ്മിക്കുന്നത്.