നടൻ സുരേഷ് ഗോപിയുടെ കഴുത്തിലുള്ള മാലയിൽ പുലിപ്പല്ലുണ്ടെന്ന പരാതി നൽകിയ മുഹമ്മദ് ഹാഷിമിന് പട്ടിക്കാട് റേഞ്ച് ഫോറസ്റ്റ് ഓഫീസർക്ക് മുന്നിൽ ഹാജരാകാൻ വനം വകുപ്പ് നോട്ടീസയച്ചു. ഈ മാസം 21 നാണ് ഹാജരാകേണ്ടത്. പരാതിയിൽ വനം വകുപ്പ് പ്രാഥമിക അന്വേഷണം ആരംഭിച്ച സാഹചര്യത്തിൽ മുഹമ്മദിന്റെ മൊഴി രേഖപ്പെടുത്തും. വാടാനപ്പള്ളി സ്വദേശിയും ഐഎന്ടിയുസി യുവജന വിഭാഗം സംസ്ഥാന ജനറല് സെക്രട്ടറിയുമാണ് മുഹമ്മദ് ഹാഷിം.
പുലിപ്പല്ല് മാല ധരിച്ച് നടക്കുന്ന സുരേഷ് ഗോപിയുടെ ദൃശ്യങ്ങള് സഹിതം സംസ്ഥാന പോലീസ് മേധാവിക്കാണ് ഹാഷിം പരാതി നല്കിയിരുന്നത്. ഈ പരാതി പിന്നീട് വനംവകുപ്പിന് കൈമാറുകയായിരുന്നു. സുരേഷ് ഗോപി ചെയ്തത് വന്യജീവി സംരക്ഷണ നിയമത്തിന്റെ ലംഘനമാണെന്ന് പരാതിയില് ചൂണ്ടിക്കാണിച്ചിട്ടുണ്ട്. റാപ്പര് വേടന് (ഹിരണ്ദാസ്) പുലിപ്പല്ല് കേസില് അറസ്റ്റിലായതിന് പിന്നാലെയാണ് സുരേഷ് ഗോപിയുമായി ബന്ധപ്പെട്ട വിഷയവും ഉയര്ന്നുവന്നത്.
വനം-വന്യജീവി സംരക്ഷണ നിയമപ്രകാരം ഷെഡ്യൂള് ഒന്നില് രണ്ടാംഭാഗത്തിലാണ് പുലി ഉള്പ്പെട്ടിട്ടുള്ളത്. പാരമ്പര്യമായി കൈമാറി ലഭിച്ചതാണെങ്കിലും പുലിപ്പല്ല് സൂക്ഷിക്കാന് പാടില്ലാത്ത സാഹചര്യത്തിൽ പുലിപ്പല്ല് മാല എങ്ങനെ ലഭിച്ചെന്ന് സുരേഷ് ഗോപി വ്യക്തമാക്കണമെന്നും നിയമം സംരക്ഷിക്കാന് സത്യപ്രതിജ്ഞ ചെയ്ത് അധികാരമേറ്റ സുരേഷ് ഗോപിയുടെ നിയമലംഘനം ഭരണഘടനാലംഘനവും ഗുരുതരമായ കൃത്യവിലോപവുമാണെന്നും പരാതിക്കാരന് ആരോപിച്ചിരുന്നു.