കെഎസ്ആർടിസിയുടെ പുതിയ ബസുകളിലൊന്നായ വോൾവോ ബസ് സന്ദർശിച്ച് നടൻ മോഹൻലാൽ. കെഎസ്ആർടിസിയുടെ ‘ഓർമ എക്സ്പ്രസിന്റെ’ ഭാഗമായാണ് സന്ദർശനം. കെഎസ്ആർടിസിയുടെ റീബ്രാൻഡിങ്ങിന്റെ ഭാഗമായാണ് ഓർമകളിലേക്കുള്ള യാത്രകൾക്കായി ‘ഓർമ എക്സ്പ്രസ്’ കെഎസ്ആർടിസി അവതരിപ്പിച്ചത്. ബുധനാഴ്ച നടന്ന ആദ്യ യാത്രയിൽ സംവിധായകൻ പ്രിയദർശൻ, നടനും നിർമ്മാതാവുമായ മണിയൻ പിള്ള രാജു, നടൻ നന്ദു, ഹരി പത്തനാപുരം എന്നിവരും ഗതാഗതമന്ത്രി ഗണേഷ് കുമാറിനോടൊപ്പം സഞ്ചരിച്ചിരുന്നു.
കേരളത്തിലെ ഗതാഗതസംവിധാനം ഗംഭീരമായി മാറുകയാണെന്ന് പുതിയ ബസുകൾ സന്ദർശിച്ച മോഹൻലാൽ പറഞ്ഞു. കൂടാതെ മികച്ച ഗതാഗത സംവിധാനങ്ങൾ കേരളത്തിൽ കൊണ്ടുവരാൻ ഗണേഷ്കുമാറിന് സാധിച്ചുവെന്നും താരം പ്രശംസിച്ചു. ഒപ്പം തന്നെ പഠിക്കുന്നകാലത്ത് തിരുവനന്തപുരം നഗരത്തിലൂടെ കെഎസ്ആർടിസി ബസിൽ യാത്രചെയ്തതിന്റെ ഓർമകളും അദ്ദേഹം പങ്കുവച്ചു. ആക്കുളത്തുനിന്ന് കുറച്ചുദൂരം മോഹൻലാൽ യാത്രചെയ്യുമെന്ന് അറിയിച്ചിരുന്നെങ്കിലും സുരക്ഷാ ക്രമീകരണങ്ങളുടെ ഭാഗമായി യാത്ര മാറ്റിവച്ചു.