സൂര്യയുടെ കരിയറിലെ 49-ാമത്തെ ചിത്രമായി ഒരുങ്ങുന്ന പുതിയ പ്രോജക്ടിനെക്കുറിച്ചുള്ള സൂചനകൾ പുറത്ത്. ‘മണ്ടാടി’ എന്ന ചിത്രത്തിലൂടെ ശ്രദ്ധേയനായ സംവിധായകൻ മതി മാരൻ പുകഴേന്തിക്കൊപ്പം സൂര്യ ഒന്നിക്കുന്നുവെന്നാണ് സിനിമാ മാധ്യമങ്ങളിൽ നിന്നുള്ള പുതിയ റിപ്പോർട്ടുകൾ. എംജിആറിന്റെ പഴയ ചിത്രത്തിന്റെ പേരായ ‘പടകോട്ടി’ ഈ സിനിമയ്ക്കായി പരിഗണിക്കുന്നതായും സൂചനയുണ്ട്.
എന്നാൽ ചിത്രത്തിന്റെ പേരോ മറ്റ് വിവരങ്ങളോ അണിയറപ്രവർത്തകർ ഔദ്യോഗികമായി സ്ഥിരീകരിച്ചിട്ടില്ല. വലൈ പേച്ചു ഉൾപ്പെടെയുള്ള സിനിമാ മാധ്യമങ്ങളാണ് സൂര്യയും മതി മാരനും ഒന്നിക്കുന്നതിനെക്കുറിച്ചുള്ള വിവരങ്ങൾ പുറത്തുവിട്ടത്
തീരദേശ മേഖലകളിലെ ജനജീവിതവും അവിടുത്തെ പശ്ചാത്തലവും പ്രമേയമാകുന്ന ഈ ചിത്രം വലിയ കാൻവാസിൽ ഒരുങ്ങുന്ന ഒരു ആക്ഷൻ ഡ്രാമയായിരിക്കുമെന്നാണ് വിവരം. പ്രശസ്ത നിർമാതാവ് കലൈപ്പുലി എസ്. താണു ചിത്രത്തിന്റെ നിർമാണം ഏറ്റെടുത്തേക്കുമെന്നും റിപ്പോർട്ടുകൾ വ്യക്തമാക്കുന്നു. അതേസമയം, ചിത്രത്തിന്റെ ഔദ്യോഗിക സ്ഥിരീകരണം ഇതുവരെ അണിയറപ്രവർത്തകരുടെ ഭാഗത്തുനിന്നും ഉണ്ടായിട്ടില്ല.
നിലവിൽ കാർത്തിക് സുബ്ബരാജ് ചിത്രമായ ‘സൂര്യ 44’, ടി.ജെ. ജ്ഞാനവേൽ സംവിധാനം ചെയ്യുന്ന ഹോംബാലെ ഫിലിംസ് ചിത്രം എന്നിവയുൾപ്പെടെയുള്ള പ്രൊജക്റ്റുകളുടെ തിരക്കിലാണ് സൂര്യ. അതേസമയം, ജിത്തു മാധവൻ സംവിധാനം ചെയ്യുന്ന ‘സീൻ’ മികച്ച പ്രതികരണങ്ങളോടെ തിയേറ്ററിൽ പ്രദർശനം തുടരുകയാണ്. നസ്രിയ നസീം ഫഹദ്, നസ്ലെൻ എന്നിവരും പ്രധാന വേഷങ്ങളിലെത്തുന്ന ചിത്രം നവംബർ ആറിനാണ് റിലീസ് ചെയ്തത്. ജ്യോതികയും സൂര്യയും ചേർന്നാണ് ചിത്രം നിർമിച്ചത്.
മതി മാരൻ സംവിധാനം ചെയ്ത ‘മണ്ടാടി’ തീരദേശ പശ്ചാത്തലത്തിൽ ഒരുക്കിയ സ്പോർട്സ് ആക്ഷൻ ഡ്രാമയായിരുന്നു. സൂരിയുടെ നായകവേഷത്തിലെത്തിയ ചിത്രം പരമ്പരാഗത വള്ളംകളി മത്സരങ്ങളുടെ പശ്ചാത്തലത്തിൽ സൗഹൃദം, പോരാട്ടം, പ്രാദേശിക അഭിമാനം തുടങ്ങിയ വിഷയങ്ങളാണ് അവതരിപ്പിച്ചത്. സൂര്യയും മതി മാരനും ഒന്നിക്കുന്ന പുതിയ ചിത്രത്തിന്റെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ് ആരാധകർ.