തീയേറ്ററുകളിൽ വലിയ വിജയം നേടിയ നിവിൻ പോളി – മമിത ബൈജു കൂട്ടുകെട്ടിന്റെ ‘ബെത്‌ലഹേം കുടുംബ യൂണിറ്റ്‘ ഒടിടി റിലീസിലും ചരിത്രനേട്ടത്തിലേക്ക്. ഒക്ടോബർ ആദ്യവാരം ഡിസ്നി+ ഹോട്ട്സ്റ്റാറിലൂടെ സ്ട്രീമിംഗ് ആരംഭിച്ച് ദിവസങ്ങൾക്കകം ഇന്ത്യയൊട്ടാകെ ഏറ്റവും കൂടുതൽ കാഴ്ചക്കാരെ നേടിയ മലയാള ചിത്രങ്ങളിൽ ഒന്നാമതായി ഈ ഫീൽ ഗുഡ് ചിത്രം മാറി.
ഗിരീഷ് എ.ഡി. സംവിധാനം ചെയ്ത ചിത്രം നിലവിൽ ഹോട്ട്സ്റ്റാർ ഇന്ത്യയുടെ ട്രെൻഡിംഗ് ലിസ്റ്റിൽ ഒന്നാം സ്ഥാനത്ത് തുടരുകയാണ്. റിലീസ് ചെയ്ത ആദ്യ ദിനങ്ങളിൽ തന്നെ ദശലക്ഷക്കണക്കിന് വ്യൂസ് നേടി ഡിജിറ്റൽ പ്ലാറ്റ്‌ഫോമിൽ വൻ കുതിപ്പാണ് ചിത്രം നടപ്പിലാക്കുന്നത്. ഭാവന സ്റ്റുഡിയോസിന്റെ ബാനറിൽ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്ന് നിർമ്മിച്ച ഈ റൊമാന്റിക് കോമഡി ചിത്രത്തിൽ ജസ്റ്റിൻ എന്ന കഥാപാത്രമായി നിവിൻ പോളിയും ആഷ്‌ലിയായി മമിത ബൈജുവുമാണ് എത്തിയത്.
സുരേഷ് കൃഷ്ണ, സംഗീത് പ്രതാപ്, വിനയ് ഫോർട്ട്, ബിന്ദു പണിക്കർ തുടങ്ങിയ പ്രമുഖ താരങ്ങളും ചിത്രത്തിൽ പ്രധാന വേഷങ്ങൾ കൈകാര്യം ചെയ്തിട്ടുണ്ട്. തീയേറ്ററുകളിൽ കുടുംബപ്രേക്ഷകരും യുവാക്കളും ഒരുപോലെ ഏറ്റെടുത്ത ചിത്രം, വിവിധ ഭാഷകളിൽ ഒടിടിയിൽ ലഭ്യമായതോടെ മറ്റ് സംസ്ഥാനങ്ങളിലെ പ്രേക്ഷകർക്കിടയിലും വലിയ തരംഗമായി മാറുകയാണ്.