ദുൽഖർ സൽമാന്റെ ഒടുവിൽ പുറത്തിറങ്ങിയ ‘ഐ ആം ഗെയിം’ എന്ന ചിത്രം ബോക്സ് ഓഫീസിൽ പ്രതീക്ഷിച്ച വിജയം നേടാത്തതിൽ നിർമാണക്കമ്പനിയെ കുറ്റപ്പെടുത്തിയ ആരാധകന് താരത്തിന്റെ ശക്തമായ മറുപടി. ചിത്രത്തിന്റെ പ്രകടനത്തിൽ ആരെയെങ്കിലും കുറ്റപ്പെടുത്തണമെങ്കിൽ അത് തന്നെ മാത്രമാണെന്ന് ദുൽഖർ എക്സിൽ വ്യക്തമാക്കി. ലോക സിനിമയിൽ ഒരു നിർമാണക്കമ്പനിയും നടനും ബോധപൂർവം തെറ്റുകൾ വരുത്തില്ലെന്നും അദ്ദേഹം കൂട്ടിച്ചേർത്തു.
പിറന്നാൾ ദിനത്തിൽ ആശംസകൾ നേർന്ന ആരാധകന് മറുപടി നൽകിയതിന് താഴെ, ‘നിങ്ങളുടെ കരിയർ തന്നെ വേഫെറർ നശിപ്പിച്ചു’ എന്ന് മറ്റൊരു ആരാധകൻ കമന്റ് ചെയ്തിരുന്നു. ചിത്രത്തിന്റെ റിലീസിലെ പോരായ്മകൾ ചൂണ്ടിക്കാണിച്ചുള്ള ഈ കമന്റിനുള്ള മറുപടിയായാണ് ദുൽഖർ ദീർഘമായ വിശദീകരണം നൽകിയത്. മികച്ച ഉദ്ദേശ്യത്തോടെ പ്രൊഡക്ഷൻ ഹൗസുകൾ ചെയ്യുന്ന കാര്യങ്ങൾ പോലും ചിലപ്പോൾ കൈയിൽ നിൽക്കാതെ പോകാമെന്നും എന്നാൽ മികച്ചത് നൽകാനുള്ള ശ്രമം തുടരുമെന്നും താരം വ്യക്തമാക്കി.
സിനിമയുടെ അന്തിമഫലം വിശകലനം ചെയ്യാൻ എളുപ്പമാണെങ്കിലും, ഒരു സിനിമ നിർമിക്കാൻ ഇരുനൂറിലധികം പേരുടെ അധ്വാനമുണ്ടെന്ന് ദുൽഖർ ഓർമിപ്പിച്ചു. ബാഹ്യഘടകങ്ങൾ കാരണം ചിലപ്പോൾ കാര്യങ്ങൾ കീഴ്‌മേൽ മറിയാമെന്നും, താൻ എപ്പോഴും തന്റെ ടീമിനൊപ്പം ഉറച്ചുനിൽക്കുമെന്നും അദ്ദേഹം കൂട്ടിച്ചേർത്തു.
‘നിങ്ങളുടെ കരുതലിൽ സന്തോഷം. എന്നാൽ, നിങ്ങൾക്ക് അറിയാത്ത പലകാര്യങ്ങളും ഇതിനിടയിൽ നടക്കുന്നുണ്ട്. ചിലപ്പോൾ ഏറ്റവും മികച്ച ഉദ്ദേശ്യത്തോടെ പ്രൊഡക്ഷൻ ഹൗസുകൾ ചെയ്യുന്ന കാര്യം പോലും കൈയിൽ നിൽക്കാതെ പോവും. എന്തായാലും ഏറ്റവും മികച്ചത് മാത്രം നൽകാനുള്ള ശ്രമം തുടരും’, ദുൽഖർ കുറിച്ചു.
‘നിങ്ങളുടെ വിലയിരുത്തൽ തെറ്റാണെന്ന് ഞാൻ പറയുന്നില്ല. ഏറെക്കുറെ ശരിയുമായിരുന്നു. എന്നെ വിശ്വസിക്കൂ, ഇക്കാര്യങ്ങളൊക്കെ ഞങ്ങൾക്ക് അറിയാമായിരുന്നു. എന്നാൽ, ഞങ്ങളുടെ ഭാഗത്ത് എല്ലാം ശരിയായി ചെയ്താലും, ചില ബാഹ്യഘടങ്ങൾ കാരണം അത് കീഴ്‌മേൽ മറിയാം. ഒരു സിനിമയുടെ അന്തിമഫലത്തെക്കുറിച്ച് വിശകലനം ചെയ്യുന്നത് എളുപ്പമാണ്. എന്നാൽ, ഒരു സിനിമ നിർമിക്കാൻ ഇരുനൂറോ മുന്നൂറോപേരുടെ അധ്വാനമുണ്ട്. അതൊരിക്കലും എളുപ്പമോ ലളിതമോ ആയിരുന്നില്ല. എന്തെങ്കിലും ഫോർമുലകളോ അക്കാദമിക്‌സോ ഉപയോഗിക്കാൻ പറ്റില്ല. ലോക സിനിമയിൽ ഒരു നിർമാണക്കമ്പനിയും നടനും ബോധപൂർവം തെറ്റുചെയ്യുകയോ മോശം സിനിമയുണ്ടാക്കുകയോ ചെയ്യില്ല. ജീവിതത്തിൽ നിങ്ങൾ പ്രതീക്ഷിക്കുന്നപോലെ കാര്യങ്ങൾ നീങ്ങുമോ? അപ്പോൾ അകത്തും പുറത്തുനിന്നുമായി ഒട്ടേറെ സംഘങ്ങളായി പ്രവർത്തിക്കുന്ന ഒരു സംവിധാനത്തെക്കുറിച്ച് ആലോചിച്ച് നോക്കൂ. ഞാനെപ്പോഴും എന്റെ ടീമിനൊപ്പം നിൽക്കും. ആരെയെങ്കിലും നിങ്ങൾക്ക് കുറ്റപ്പെടുത്തണമെങ്കിൽ അതെന്നെയാവാം’, താരം കൂട്ടിച്ചേർത്തു.
നഹാസ് ഹിദായത്ത് സംവിധാനം ചെയ്ത ഫാന്റസി-ആക്ഷൻ ചിത്രമാണ് ‘ഐ ആം ഗെയിം’. ഓണം റിലീസായി പ്രഖ്യാപിച്ച ചിത്രം പിന്നീട് സെപ്റ്റംബർ മൂന്നിനാണ് തിയേറ്ററിലെത്തിയത്. ചിത്രത്തിന് മികച്ച പ്രതികരണങ്ങൾ ലഭിച്ചെങ്കിലും ബോക്സ് ഓഫീസ് കണക്കുകളിൽ പ്രതീക്ഷിച്ച മുന്നേറ്റമുണ്ടാക്കാൻ കഴിഞ്ഞിരുന്നില്ല. വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്നാണ് ചിത്രം നിർമിച്ചത്. ദുൽഖറിന് പുറമെ ആന്റണി വർഗീസ്, മിഷ്‌കിൻ, കതിർ, വിനയ് ഫോർട്ട്, കയാദു ലോഹർ, സംയുക്ത വിശ്വനാഥൻ തുടങ്ങിയവരും ചിത്രത്തിൽ പ്രധാന വേഷങ്ങളിൽ എത്തിയിരുന്നു.