പ്രേക്ഷകരുടെ സ്നേഹത്തിന് മികച്ച സിനിമകളിലൂടെ തിരികെ നൽകുമെന്നും ‘കംബാക്ക്’ എന്നത് ഇപ്പോൾ തന്റെ പേരിന്റെ ഭാഗമായി മാറിയിരിക്കുകയാണെന്നും നടൻ നിവിൻ പോളി. റാം സംവിധാനം ചെയ്യുന്ന ‘യേഴു കടൽ യേഴു മലൈ’ എന്ന പുതിയ തമിഴ് ചിത്രത്തിന്റെ പ്രീ-റിലീസ് ചടങ്ങിലാണ് നിവിൻ പോളിയുടെ പരാമർശം.
തന്റെ പുതിയ ചിത്രമായ ‘മലയാളത്തിലെ ഒരു സിനിമയുടെ പേര്’ തിയറ്ററുകളിൽ മികച്ച വിജയം നേടിയതിൽ സന്തോഷമുണ്ടെന്നും, ഇത്തരത്തിലുള്ള വിജയങ്ങൾ സിനിമയോടും പ്രേക്ഷകരോടുമുള്ള ഉത്തരവാദിത്വം വർധിപ്പിക്കുന്നുണ്ടെന്നും അദ്ദേഹം പറഞ്ഞു. തനിക്ക് ലഭിക്കുന്ന സ്നേഹത്തിന് നല്ല സിനിമകൾ സമ്മാനിക്കുകയാണ് വേണ്ടതെന്നും നിവിൻ കൂട്ടിച്ചേർത്തു.
നീണ്ട നാളുകളായി സിനിമയിൽ ‘കംബാക്ക്’ എന്ന് കേട്ട് തന്റെ പേര് തന്നെ ആ രീതിയിലായി മാറിയെന്ന് തമാശരൂപേണ അദ്ദേഹം പ്രതികരിച്ചു. തമിഴ് സിനിമയിലേക്കുള്ള ഈ തിരിച്ചുവരവും മറ്റൊരു കംബാക്ക് ആയി കണക്കാക്കാം എന്നും അദ്ദേഹം പറഞ്ഞു. സംവിധായകൻ റാമിന്റെ മുൻചിത്രമായ ‘പേരൻപ്’ കണ്ടതിന് ശേഷമാണ് അദ്ദേഹത്തിനൊപ്പം പ്രവർത്തിക്കാൻ ആഗ്രഹം പ്രകടിപ്പിച്ചതെന്നും, എന്നാൽ അത് യാഥാർത്ഥ്യമാകുമെന്ന് കരുതിയിരുന്നില്ലെന്നും നിവിൻ വ്യക്തമാക്കി. ചിത്രത്തിന്റെ കഥ പറയാൻ എത്തിയപ്പോൾ റാം വളരെ രസകരമായാണ് കാര്യങ്ങൾ അവതരിപ്പിച്ചതെന്നും സൂരിയും താനും തമ്മിലുള്ള കോമ്പിനേഷൻ സീനുകൾ സിനിമയുടെ പ്രത്യേകതയാണെന്നും അദ്ദേഹം കൂട്ടിച്ചേർത്തു. ചിത്രത്തിൽ ഒരു എലിയും പ്രധാനപ്പെട്ട കഥാപാത്രമായി എത്തുന്നുണ്ട്.
നിവിൻ പോളിയുടെ വാക്കുകൾ;
“ബെത്ലഹേം കുടുംബ യൂണിറ്റ്’ തിയറ്ററുകളിൽ നല്ല രീതിയിൽ ഓടിയതിൽ സന്തോഷമുണ്ട്. ഇതുപോലെ ഒരു വിജയമൊക്കെ വരുമ്പോൾ നമ്മൾ നല്ല സന്തോഷത്തിലായിരിക്കുമല്ലോ. കുറച്ചു കൂടി നമ്മൾ സിനിമയോടും പ്രേക്ഷകരോടും ഉത്തരവാദിത്വമുള്ളവരാകും. നമുക്കാ സ്നേഹം തരുന്നത് പ്രേക്ഷകരാണ്. അവർക്ക് വേണ്ടി നല്ല സിനിമകൾ ചെയ്യണമെന്നാണ് ആഗ്രഹം. അങ്ങനെ നടക്കട്ടെ.
കുറേ നാളായി കംബാക്ക്… കംബാക്ക്… എന്ന് കേട്ട് കേട്ട് ഇപ്പോൾ എന്റെ പേരും അങ്ങനെയായിട്ടുണ്ട്, നിവിൻ പോളി കംബാക്ക് എന്ന്. ഒന്നും വേർതിരിച്ച് പറയണ്ട, എല്ലാ സിനിമകളും കംബാക്ക് തന്നെയാണ്. ഈ സിനിമയെക്കുറിച്ചും കംബാക്ക് എന്ന് പറയുന്നുണ്ട്. കംബാക്ക് ടു തമിഴ് സിനിമ എന്ന്. ഇരിക്കട്ടേ ഒരു കംബാക്ക് കൂടെ”.-
‘പേരൻപ്’ കണ്ടതിന് ശേഷം റാം സാറിനൊപ്പം വർക്ക് ചെയ്യണമെന്ന് അദ്ദേഹത്തെ കണ്ടപ്പോൾ ഞാൻ പറഞ്ഞിരുന്നു. എന്നാൽ അത് നടക്കുമെന്ന് ഞാൻ വിചാരിച്ചതേയില്ല. ഞങ്ങൾ തമ്മിൽ കണ്ട് കുറച്ചു മാസങ്ങൾക്ക് ശേഷമാണ് ഈ പടത്തിന്റെ ഒരു ഐഡിയ സാർ എന്നോട് പറഞ്ഞത്.
അത് ഭയങ്കര രസമായിരുന്നു. റാം സാറിന്റെ പടം ഭയങ്കര സീരിയസ് ആയിരിക്കുമെന്നാണ് ഞാൻ വിചാരിച്ചു കൊണ്ടിരുന്നത്. പക്ഷേ അദ്ദേഹം എന്നോട് കഥ പറയാൻ വന്നപ്പോൾ ഹ്യൂമറോടു കൂടിയാണ് പറഞ്ഞത്. എന്റെയും സൂരിയുടെയും കഥാപാത്രങ്ങൾ തമ്മിൽ പറയുന്ന കൗണ്ടറുകളും എല്ലാം കൂട്ടിച്ചേർത്ത് തമാശയായാണ് അദ്ദേഹം അത് പറഞ്ഞു തന്നത്. വളരെ പെട്ടെന്നാണ് പിന്നെ വലിയൊരു ടീമായി മാറിയത്. എല്ലാവരും തിയറ്ററിൽ വന്നു തന്നെ കാണണം. ഈ സിനിമയിൽ എലിയും ഒരു പ്രധാന കഥാപാത്രമാണ്”.