രണ്ടാമതൊരു പെൺകുഞ്ഞിന് ജന്മം നൽകി നടി ദീപിക പദുക്കോൺ. സെപ്റ്റംബർ 19-നാണ് കുഞ്ഞ് ഉണ്ടായത്. തങ്ങൾക്ക് പെൺകുഞ്ഞ് ജനിച്ച സന്തോഷവാർത്ത ഇരുവരും ഔദ്യോഗിക സോഷ്യൽ മീഡിയ അക്കൗണ്ടുകളിലൂടെ ആരാധകരുമായി പങ്കുവെച്ചു. ഒരു കുഞ്ഞിന്റെ കാൽപ്പാടുകളുടെ ചിത്രവും അതിനുതാഴെ ദുവ, ദീപിക, രൺവീർ എന്നിവരുടെ പേരുകളും 19/9/2026 എന്ന തീയതിയും ഉൾപ്പെടുന്നതാണ് പോസ്റ്റ്.
ദമ്പതികളുടെ ആദ്യ മകളായ ദുവയുടെ പേരിനൊപ്പം പുതിയ അതിഥിയെയും വരവേറ്റതിന്റെ ആവേശത്തിലാണ് ആരാധകരും സിനിമാലോകവും. ഈ വർഷം ഏപ്രിൽ 19-നാണ് ദീപികയും രൺവീറും തങ്ങൾ രണ്ടാമതും മാതാപിതാക്കളാകാൻ പോകുന്ന സന്തോഷവാർത്ത ഇൻസ്റ്റാഗ്രാമിലൂടെ പുറത്തുവിട്ടത്. കുഞ്ഞിന്റെ ജനനത്തിന് മുന്നോടിയായി ഇരുവരും മുംബൈയിലെ പ്രശസ്തമായ സിദ്ധിവിനായക ക്ഷേത്രം സന്ദർശിച്ച് ദൈവാനുഗ്രഹം തേടിയിരുന്നു.
അമ്മയായതിനു ശേഷം തന്റെ ജീവിതത്തിലുണ്ടായ മാറ്റങ്ങളെക്കുറിച്ച് ദീപിക മുൻപ് സംസാരിച്ചിട്ടുണ്ട്. 2025 ഒക്ടോബറിൽ സിഎൻബിസി-ടിവി18-ന് നൽകിയ അഭിമുഖത്തിൽ, മാതൃത്വം തന്റെ മുൻഗണനകളെയും വ്യക്തിത്വത്തെയും എങ്ങനെ പുനർനിർമ്മിച്ചുവെന്ന് താരം വ്യക്തമാക്കിയിരുന്നു. മാതൃത്വം സഹനശക്തിയും വൈകാരികമായ ആഴവും വർദ്ധിപ്പിച്ചുവെന്നും, തന്നെ കംഫർട്ട് സോണിൽ നിന്ന് പുറത്തുകൊണ്ടുവന്ന് കൂടുതൽ സാമൂഹിക ഇടപെടലുകൾ നടത്താൻ പ്രേരിപ്പിച്ചുവെന്നും ദീപിക വെളിപ്പെടുത്തി.
അതേ സമയം സിദ്ധാർത്ഥ് ആനന്ദ് സംവിധാനം ചെയ്യുന്ന ‘കിംഗ്’ എന്ന ചിത്രത്തിൽ ഷാരൂഖ് ഖാനൊപ്പവും, അറ്റ്ലീ ചിത്രമായ ‘രാക്ക’യിൽ അല്ലു അർജുനൊപ്പവും അഭിനയിക്കാനുള്ള തയ്യാറെടുപ്പിലാണ് ദീപിക. ‘ധുരന്ധർ: ദി റിവെഞ്ച്’ എന്ന ചിത്രത്തിലാണ് രൺവീർ അവസാനമായി വേഷമിട്ടത്. പോസ്റ്റ്-അപ്പോക്കലിപ്റ്റിക് ത്രില്ലർ ചിത്രമായ ‘പ്രളയ്’ ആണ് രൺവീറിന്റേതായി വരാനിരിക്കുന്ന പ്രധാന പ്രൊജക്റ്റ്.