നിവിൻ പോളി ചിത്രം ‘ബെത്ലഹേം കുടുംബ യൂണിറ്റ്’ മലയാള സിനിമയുടെ എക്കാലത്തെയും വലിയ ബോക്സ് ഓഫീസ് റെക്കോർഡ് തകർത്ത് മുന്നേറുമ്പോൾ, ചിത്രത്തിന് അഭിനന്ദനവുമായി നടി കല്യാണി പ്രിയദർശൻ. ഗിരീഷ് എ.ഡി ഒരുക്കിയ ഈ കുടുംബചിത്രം, കല്യാണി നായികയായ ‘ലോക ചാപ്റ്റർ 1: ചന്ദ്ര’യുടെ റെക്കോർഡാണ് മറികടന്നത്. ഈ വലിയ വിജയത്തിൽ തനിക്ക് അതിയായ സന്തോഷമുണ്ടെന്ന് കല്യാണി വ്യക്തമാക്കി.
വലിയ ആക്ഷൻ ചിത്രങ്ങൾക്ക് മാത്രമേ ബോക്സ് ഓഫീസിൽ ഇത്രയധികം നേട്ടങ്ങൾ ഉണ്ടാക്കാൻ സാധിക്കൂ എന്ന ധാരണയാണ് ബി.കെ.യു തിരുത്തിക്കുറിച്ചത് എന്ന് കല്യാണി തന്റെ ഇൻസ്റ്റാഗ്രാമിൽ കുറിച്ചു. കുടുംബപ്രേക്ഷകരുടെ യഥാർത്ഥ കരുത്ത് എന്താണെന്ന് ഈ വിജയം തെളിയിക്കുന്നുവെന്നും, സിനിമയെ കുടുംബങ്ങൾ ഏറ്റെടുത്താൽ തിയേറ്ററുകളിൽ ആളുകൾ ഇരച്ചെത്തുമെന്ന നിവിൻ പോളിയുടെ വാക്കുകൾ അന്വർത്ഥമാവുകയാണെന്നും അവർ കൂട്ടിച്ചേർത്തു. ബി.കെ.യുവിന്റെ മുഴുവൻ അണിയറപ്രവർത്തകർക്കും അഭിനന്ദനങ്ങൾ അറിയിച്ച കല്യാണി, ഈ മനോഹരമായ വിജയം അവർ പൂർണ്ണമായും അർഹിക്കുന്നുണ്ടെന്നും വ്യക്തമാക്കി.
‘വലിയ ആക്ഷൻ ചിത്രങ്ങൾക്ക് മാത്രമേ ഇത്രയും വലിയ ബോക്സ് ഓഫീസ് നേട്ടങ്ങൾ ഉണ്ടാക്കാൻ സാധിക്കൂ എന്ന് പലരും കരുതിയിരുന്ന സമയത്ത്, കുടുംബപ്രേക്ഷകരുടെ കരുത്ത് എത്രത്തോളമുണ്ടെന്ന് ബി.കെ.യു തെളിയിച്ചു തന്നു. ഈ റെക്കോർഡ് നേട്ടത്തിൽ എനിക്ക് ഏറ്റവും സന്തോഷം നൽകുന്ന കാര്യവും അതാണ്. ബി.കെ.യുവിന്റെ മുഴുവൻ അണിയറപ്രവർത്തകർക്കും അഭിനന്ദനങ്ങൾ, ഈ മനോഹരമായ വിജയം നിങ്ങൾ അർഹിക്കുന്നു’, കല്യാണി കുറിച്ചു.
ഡൊമിനിക് അരുൺ സംവിധാനം ചെയ്ത ‘ലോക ചാപ്റ്റർ 1’ ഈ വർഷം 302 കോടി രൂപ നേടി ചരിത്രം കുറിച്ചിരുന്നു. എന്നാൽ ഈ റെക്കോർഡ് ഭേദിച്ച് 304.95 കോടി കളക്ഷൻ നേടിയാണ് ‘ബെത്ലഹേം കുടുംബ യൂണിറ്റ്’ മലയാളത്തിലെ ഏറ്റവും ഉയർന്ന കളക്ഷൻ നേടുന്ന ചിത്രമായി മാറിയത്. ‘മഞ്ഞുമ്മൽ ബോയ്സ്’, ‘എമ്പുരാൻ’, ‘ലോക’ തുടങ്ങിയ വൻ വിജയങ്ങളുടെ നിരയിലേക്കാണ് ബി.കെ.യുവും ഇപ്പോൾ എത്തിച്ചേർന്നിരിക്കുന്നത്.