ഹൈദരാബാദിൽ നടന്ന ‘ടോക്സിക്’ സിനിമയുടെ പ്രൊമോഷൻ ചടങ്ങിനിടെ കൂറ്റൻ ഫ്ലഡ്ലൈറ്റിന്റെ ഭാഗങ്ങൾ കാണികൾക്കിടയിലേക്ക് തകർന്നു വീണ് രണ്ട് വിദ്യാർത്ഥികൾക്ക് പരിക്ക്. ഓഗസ്റ്റ് 26-ന് തിയേറ്ററുകളിലെത്തുന്ന ചിത്രത്തിന്റെ പ്രചാരണാർത്ഥം മല്ലറെഡ്ഡി യൂണിവേഴ്സിറ്റിയിൽ സംഘടിപ്പിച്ച ചടങ്ങിനിടെയാണ് നിർഭാഗ്യകരമായ സംഭവം നടന്നത്. പരിക്കേറ്റ വിദ്യാർത്ഥികളെ ഉടൻ തന്നെ ആംബുലൻസിൽ സമീപത്തെ ആശുപത്രിയിലേക്ക് മാറ്റി. ഇതിൽ ഒരു പെൺകുട്ടി അപകടത്തിന്റെ ആഘാതത്തിൽ ബോധരഹിതയായിരുന്നു.
വേദിയിൽ നായകൻ യഷ് സംസാരിച്ചുകൊണ്ടിരിക്കെയാണ് അപകടം സംഭവിച്ചത്. സ്ഥിതിഗതികൾ ശ്രദ്ധയിൽപ്പെട്ട ഉടൻ തന്നെ യഷ് പ്രസംഗം നിർത്തിവെക്കുകയും, സംഘാടകരോട് അപകടത്തിൽപ്പെട്ടവരുടെ സുരക്ഷയെക്കുറിച്ച് നേരിട്ട് ചോദിച്ചറിയുകയും ചെയ്തു. വിദ്യാർത്ഥികൾക്ക് കാര്യമായ അപായമൊന്നുമില്ലെന്ന് സംഘാടകർ അറിയിച്ചതിനെ തുടർന്നാണ് അദ്ദേഹം പ്രസംഗം പുനരാരംഭിച്ചത്. എങ്കിലും പെട്ടെന്നുണ്ടായ അപകടം ക്യാമ്പസിൽ തടിച്ചുകൂടിയ ആയിരക്കണക്കിന് ആരാധകർക്കിടയിൽ വലിയ പരിഭ്രാന്തി സൃഷ്ടിച്ചു.
തങ്ങളുടെ പ്രിയതാരത്തെ അടുത്തുകാണാൻ വൻ ജനക്കൂട്ടമാണ് യൂണിവേഴ്സിറ്റിയിലേക്ക് ഒഴുകിയെത്തിയത്. പരിപാടി ആരംഭിക്കുന്നതിന് മുൻപ് തന്നെ തിക്കും തിരക്കും ഒഴിവാക്കാൻ പിന്നിലേക്ക് മാറിനിൽക്കാൻ പൊലീസ് നിർദ്ദേശിച്ചിരുന്നുവെങ്കിലും ഭൂരിഭാഗം പേരും വേദിക്ക് തൊട്ടടുത്ത് തന്നെ നിലയുറപ്പിച്ചു. സ്പീക്കറുകളും മറ്റ് ലൈറ്റിംഗ് ഉപകരണങ്ങളും താങ്ങിനിർത്തിയിരുന്ന താത്കാലിക ഘടനകളിലേക്ക് വിദ്യാർത്ഥികൾ വലിഞ്ഞുകയറിയതാണ് അപകടത്തിന് വഴിവെച്ചത്.
ഗീതു മോഹൻദാസ് സംവിധാനം ചെയ്യുന്ന ബിഗ് ബജറ്റ് ഗ്യാങ്സ്റ്റർ ആക്ഷൻ ചിത്രമായ ‘ടോക്സിക്’ പോർച്ചുഗീസ് ഭരണകാലഘട്ടത്തിന്റെ അവസാന നാളുകളിലെ ഗോവയുടെ പശ്ചാത്തലത്തിലാണ് കഥ പറയുന്നത്. യഷും ഗീതു മോഹൻദാസും ചേർന്ന് തിരക്കഥയൊരുക്കിയ ചിത്രത്തിൽ ഇരട്ടവേഷത്തിലാണ് യഷ് എത്തുന്നത്. നയൻതാര, കിയാരാ അദ്വാനി, ഹുമ ഖുറേഷി, താര സുതാരിയ, രുക്മിണി വസന്ത് തുടങ്ങി വൻ താരനിര തന്നെ ചിത്രത്തിൽ അണിനിരക്കുന്നുണ്ട്. രവി ബസ്രൂർ, വിശാൽ മിശ്ര, തനിഷ്ക് ബാഗ്ചി എന്നിവർ സംഗീതം പകരുന്ന ചിത്രം ഒരേസമയം ഇംഗ്ലീഷിലും കന്നഡയിലുമായാണ് ചിത്രീകരിച്ചിരിക്കുന്നത്. ഓഗസ്റ്റ് 26-ന് ആഗോളതലത്തിൽ റിലീസ് ചെയ്യുന്ന ചിത്രം ഇന്ത്യയിൽ വിവിധ പ്രാദേശിക ഭാഷകളിലും ലഭ്യമാകും.