മലയാള സിനിമയുടെ ചരിത്രവഴികളിലൂടെ കണ്ണോടിക്കുമ്പോൾ ചില മുഖങ്ങൾ കാലത്തിന്റെ അതിരുകളെ ഭേദിച്ച്, ഒരേ തിളക്കത്തോടെ നമ്മുടെ മനസ്സിൽ അങ്ങിനെ നിലനിൽക്കുന്നത് കാണാം. അത്തരത്തിൽ എൺപതുകളിലെ ക്യാമ്പസുകളെ പ്രണയം കൊണ്ടും സ്റ്റൈൽ കൊണ്ടും കൈവെള്ളയിലൊതുക്കുകയും, പിന്നീട് പ്രൗഢിയുള്ള കഥാപാത്രങ്ങളിലൂടെ അഭിനയത്തിന്റെ പുതിയ തലങ്ങൾ കീഴടക്കുകയും ചെയ്ത താരമാണ് റഹ്മാൻ. മലയാളിയുടെ സിനിമാസ്വാദന ശീലങ്ങളിലേക്ക് ചോക്ലേറ്റ് ഹീറോ എന്ന സങ്കൽപ്പത്തെ അതിന്റെ എല്ലാ അർത്ഥത്തിലും ആദ്യമായി പ്രതിഷ്ഠിച്ച താരം. ഒരു കാലഘട്ടത്തിന്റെ ട്രെൻഡ് സെറ്ററായി മാറിയ ഈ നടൻ, പതിറ്റാണ്ടുകൾക്കിപ്പുറവും തന്റെ അഭിനയ ചാതുരി കൊണ്ടും മാസ്മരികമായ സ്ക്രീൻ പ്രസൻസ് കൊണ്ടും പ്രേക്ഷകരെ വിസ്മയിപ്പിച്ചു കൊണ്ടിരിക്കുകയാണ്. കേവലമൊരു നായകനടൻ എന്നതിനപ്പുറം തെന്നിന്ത്യൻ സിനിമയുടെ തന്നെ അവിഭാജ്യ ഘടകമായി മാറിയ റഹ്മാന്റെ സിനിമായാത്ര, ഇന്ത്യൻ സിനിമയിലെ തന്നെ ഏറ്റവും സവിശേഷമായ ഏടുകളിൽ ഒന്നാണ്. ദക്ഷിണേന്ത്യയുടെ പ്രിയപ്പെട്ട കലാകാരന് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.
പത്മരാജൻ എന്ന ക്രാഫ്റ്റ്സ്മാൻ മലയാളത്തിന് സമ്മാനിച്ച ഏറ്റവും വലിയ വിസ്മയങ്ങളിൽ ഒന്നായിരുന്നു റഹ്മാൻ. ‘കൂടെവിടെ’ എന്ന ചിത്രത്തിലെ രവി പുത്തൂരാൻ എന്ന കൗമാരക്കാരനായി ക്യാമറയ്ക്ക് മുന്നിലെത്തുമ്പോൾ റഹ്മാന് പ്രായം വളരെ കുറവായിരുന്നു. എന്നാൽ ആദ്യ ചിത്രത്തിൽ തന്നെ മമ്മൂട്ടിക്കും സുഹാസിനിക്കും ഒപ്പം ഒട്ടും പതറാതെ, ഒരു പ്രതിഭയുടെ എല്ലാ ലക്ഷണങ്ങളും പ്രകടിപ്പിക്കാൻ അദ്ദേഹത്തിന് സാധിച്ചു. ആ ചിത്രത്തിലെ അഭിനയത്തിന് സംസ്ഥാന സർക്കാരിന്റെ പ്രത്യേക അവാർഡ് നേടുമ്പോൾ, മലയാള സിനിമയിലേക്ക് വരാനിരിക്കുന്നത് ഒരു വലിയ കൊടുങ്കാറ്റാണെന്ന് പലരും പ്രവചിച്ചിരുന്നു. ആ പ്രവചനങ്ങൾ ഒട്ടും തെറ്റിയില്ല എന്ന് പിൽക്കാല ചരിത്രം തെളിയിച്ചു. കൗമാരത്തിന്റെ പ്രസരിപ്പും പ്രണയത്തിന്റെ ആർദ്രതയും ഒരേപോലെ ആവാഹിച്ച ആ മുഖം വളരെ പെട്ടെന്നാണ് മലയാളക്കര നെഞ്ചിലേറ്റിയത്. എൺപതുകളിൽ റഹ്മാൻ സൃഷ്ടിച്ച തരംഗം ചെറുതൊന്നുമായിരുന്നില്ല. അദ്ദേഹത്തിന്റെ ഹെയർസ്റ്റൈലും വസ്ത്രധാരണ രീതികളും പോലും അക്കാലത്തെ യുവാക്കൾ ആവേശത്തോടെ അനുകരിച്ചു.
റഹ്മാൻ എന്ന നടന്റെ കരിയറിലെ ഏറ്റവും സുവർണ്ണകാലം എൺപതുകളുടെ മധ്യത്തിലായിരുന്നു എന്ന് പറയാം. ‘ഇത്തിരിപ്പൂവേ ചുവന്നപൂവേ’, ‘കാണാമറയത്ത്’, ‘ചിലമ്പ്’, ‘തിങ്കളാഴ്ച നല്ല ദിവസം’, ‘എന്ന് നാഥന്റെ നിഴലിൽ’ തുടങ്ങി എത്രയോ ഓർമ്മിക്കപ്പെടുന്ന ചിത്രങ്ങൾ ആ കാലത്ത് പിറന്നുവിണു. എം.ടി. വാസുദേവൻ നായർ, പത്മരാജൻ, ഭരതൻ, ഹരിഹരൻ, കെ.എസ്. സേതുമാധവൻ തുടങ്ങിയ മലയാളത്തിലെ മഹാരഥന്മാരായ സംവിധായകരുടെയെല്ലാം പ്രിയപ്പെട്ട നടനായി മാറാൻ റഹ്മാന് അധികകാലം വേണ്ടി വന്നില്ല. പ്രണയരംഗങ്ങളിലെ സ്വാഭാവികതയും, വൈകാരിക രംഗങ്ങളിലെ തീവ്രതയും റഹ്മാനെ മറ്റുള്ളവരിൽ നിന്ന് വേറിട്ടു നിർത്തി. പ്രത്യേകിച്ച് നൃത്ത രംഗങ്ങളിലും ആക്ഷൻ രംഗങ്ങളിലും റഹ്മാൻ പുലർത്തിയ വേഗതയും ചടുലതയും അന്നത്തെ മലയാള സിനിമയ്ക്ക് തികച്ചും പുതിയൊരു അനുഭവമായിരുന്നു.
ഒരു വശത്ത് കാൽപ്പനിക പ്രണയത്തിന്റെ നായകനായി തിളങ്ങുമ്പോൾ തന്നെ, മറുവശത്ത് ശക്തമായ കുടുംബചിത്രങ്ങളിലെ വൈകാരികത നിറഞ്ഞ കഥാപാത്രങ്ങളെയും അദ്ദേഹം അനായാസം കൈകാര്യം ചെയ്തു. മലയാള സിനിമയിൽ മമ്മൂട്ടി-മോഹൻലാൽ യുഗം ശക്തമായി നിലനിൽക്കുന്ന കാലത്താണ് റഹ്മാൻ തന്റെതായ ഒരു സാമ്രാജ്യം കെട്ടിപ്പടുത്തത് എന്നത് അദ്ദേഹത്തിന്റെ ജനപ്രീതിയുടെ ആഴം വ്യക്തമാക്കുന്നു. മമ്മൂട്ടിയുമായുള്ള അദ്ദേഹത്തിന്റെ ഓൺ-സ്ക്രീൻ കൂട്ടുകെട്ട് മലയാള സിനിമയിലെ തന്നെ ഏറ്റവും മികച്ച കെമിസ്ട്രികളിൽ ഒന്നായിരുന്നു. വലിയേട്ടനും അനിയനുമായി അവർ സ്ക്രീനിൽ നിറഞ്ഞപ്പോൾ പ്രേക്ഷകർ അത് ഹൃദയത്തോട് ചേർത്തുപിടിച്ചു. ‘കൂടും തേടി’, ‘കരിമ്പിൻപൂവിനക്കരെ’, ‘വാർത്ത’ തുടങ്ങിയ ചിത്രങ്ങളിലെ ഇവരുടെ കോമ്പിനേഷൻ രംഗങ്ങൾ ഇന്നും സിനിമാപ്രേമികളുടെ പ്രിയപ്പെട്ട ഓർമ്മകളാണ്. അതുപോലെ തന്നെ മോഹൻലാലിനൊപ്പം അഭിനയിച്ച ചിത്രങ്ങളിലും റഹ്മാൻ തന്റെതായ മുദ്ര പതിപ്പിച്ചു. സൂപ്പർതാരങ്ങളുടെ സാന്നിധ്യത്തിലും സ്വന്തം കഥാപാത്രത്തിന്റെ തനിമ ചോർന്നുപോകാതെ കാത്തുസൂക്ഷിക്കാൻ റഹ്മാന് എപ്പോഴും കഴിഞ്ഞിരുന്നു.
കേരളത്തിന്റെ അതിരുകൾക്കപ്പുറത്തേക്ക് റഹ്മാന്റെ പ്രശസ്തി വളരാൻ അധികം താമസമൊന്നും ഉണ്ടായിരുന്നില്ല. തമിഴ്, തെലുങ്ക് സിനിമാ ലോകം ഈ പ്രതിഭയെ ഇരു കൈകളും നീട്ടിയാണ് സ്വീകരിച്ചത്. തമിഴിൽ കെ. ബാലചന്ദറിനെപ്പോലെയുള്ള ദീർഘദർശികളായ സംവിധായകരുടെ ചിത്രങ്ങളിൽ പ്രധാന വേഷങ്ങൾ ചെയ്യാൻ റഹ്മാന് സാധിച്ചു. ‘പുതു വസന്തം’ എന്ന ചിത്രം തമിഴിൽ അദ്ദേഹത്തിന് വലിയൊരു ബ്രേക്ക് നൽകി. തെന്നിന്ത്യൻ സിനിമയിലെ മുൻനിര നായകന്മാരിൽ ഒരാളായി റഹ്മാൻ മാറിയത് വളരെ പെട്ടെന്നായിരുന്നു. ആക്ഷൻ ഹീറോ പരിവേഷമുള്ള കഥാപാത്രങ്ങളും റൊമാന്റിക് വേഷങ്ങളും ഒരുപോലെ തെലുങ്കിലും തമിഴിലും അദ്ദേഹം ഭദ്രമാക്കി. ഭാഷ ഏതായാലും കഥാപാത്രത്തിന്റെ ആത്മാവ് തൊട്ടറിയുന്ന റഹ്മാന്റെ ശൈലി അവിടുത്തെ പ്രേക്ഷകർക്കും പ്രിയങ്കരമായി മാറി. അന്യഭാഷകളിൽ തിരക്കേറിയപ്പോഴും മലയാളം അദ്ദേഹത്തെ കാത്തിരിക്കുകയായിരുന്നു.
ഒരു ഘട്ടത്തിൽ സിനിമയിൽ നിന്ന് ചെറിയൊരു ഇടവേള എടുത്തതിനു ശേഷം റഹ്മാൻ നടത്തിയ തിരിച്ചുവരവ് ഇന്ത്യൻ സിനിമയിലെ തന്നെ ഏറ്റവും മികച്ച സെക്കൻഡ് ഇന്നിംഗ്സുകളിൽ ഒന്നാണ്. ചോക്ലേറ്റ് ഹീറോ ഇമേജിൽ നിന്നും പൂർണ്ണമായും മാറി, സാൾട്ട് ആൻഡ് പെപ്പർ ലുക്കിൽ, കൂടുതൽ പ്രൗഢിയുള്ള കഥാപാത്രങ്ങളുമായാണ് അദ്ദേഹം മടങ്ങിയെത്തിയത്. രഞ്ജിത്ത് സംവിധാനം ചെയ്ത ‘ബ്ലാക്ക്’ എന്ന ചിത്രത്തിലെ വില്ലൻ സ്വഭാവമുള്ള വേഷം റഹ്മാന്റെ കരിയറിലെ വലിയൊരു വഴിത്തിരിവായിരുന്നു. തനിക്ക് പ്രണയം മാത്രമല്ല, കട്ട വില്ലത്തരവും മാസ്സ് വേഷങ്ങളും അനായാസം വഴങ്ങുമെന്ന് അദ്ദേഹം തെളിയിച്ചു. പിന്നീട് വന്ന ‘ട്രാഫിക്’ എന്ന ചിത്രത്തിലെ പോലീസ് ഓഫീസറുടെ വേഷം റഹ്മാന്റെ അഭിനയജീവിതത്തിലെ മറ്റൊരു നാഴികക്കല്ലാണ്. ഉള്ളിലെ വലിഞ്ഞുമുറുകിയ വിയർപ്പും മകൾക്ക് വേണ്ടിയുള്ള അച്ഛന്റെ നെഞ്ചിടിപ്പും റഹ്മാൻ എന്ന നടൻ അത്രമേൽ തീവ്രതയോടെയാണ് സ്ക്രീനിൽ എത്തിച്ചത്.
സമീപകാലത്ത് പുറത്തിറങ്ങിയ റഹ്മാന്റെ ചിത്രങ്ങൾ പരിശോധിച്ചാൽ അദ്ദേഹം തന്റെ കഥാപാത്രങ്ങളെ തിരഞ്ഞെടുക്കുന്നതിൽ പുലർത്തുന്ന സൂക്ഷ്മതയും നിലവാരവും മനസ്സിലാക്കാൻ സാധിക്കും. ‘മുംബൈ പോലീസ്’ എന്ന ചിത്രത്തിലെ കമ്മീഷണർ ഫർഹാൻ അലി, ‘റൺ ബേബി റൺ’ എന്ന ചിത്രത്തിലെ വേഷം എന്നിവയൊക്കെ റഹ്മാൻ എന്ന നടന്റെ കരിയർ ഗ്രാഫ് ഇന്നും ഉയരത്തിൽ തന്നെയാണെന്ന് വ്യക്തമാക്കുന്നു. കൂടാതെ തമിഴിൽ മണിരത്നത്തിന്റെ ബ്രഹ്മാണ്ഡ ചിത്രമായ ‘പൊന്നിയിൻ സെൽവൻ’ എന്ന സിനിമയിൽ മധുരാന്തകൻ എന്ന ശക്തമായ കഥാപാത്രത്തെ അവതരിപ്പിച്ചുകൊണ്ട് റഹ്മാൻ അന്താരാഷ്ട്ര തലത്തിൽ വരെ ശ്രദ്ധിക്കപ്പെട്ടു. പക്വതയാർന്ന അഭിനയ ശൈലിയും പ്രായത്തെ തോൽപ്പിക്കുന്ന ലുക്കും അദ്ദേഹത്തെ ഇപ്പോഴും സംവിധായകരുടെ പ്രിയപ്പെട്ട ചോയ്സ് ആക്കി നിർത്തുന്നു.
നാല് പതിറ്റാണ്ടോളമായി സിനിമാരംഗത്ത് നിലനിൽക്കുക എന്നത് നിസ്സാരമായ ഒരു കാര്യമല്ല. മാറുന്ന സിനിമാ സമവാക്യങ്ങൾക്കൊപ്പം സ്വയം പുതുക്കിക്കൊണ്ടും, പുതിയ തലമുറയിലെ സംവിധായകർക്കൊപ്പം മികച്ച രീതിയിൽ പൊരുത്തപ്പെട്ടു കൊണ്ടും റഹ്മാൻ തന്റെ യാത്ര തുടരുകയാണ്. ഗ്ലാമറിന്റെയോ താരപ്പകിട്ടിന്റെയോ അനാവശ്യമായ ആർഭാടങ്ങളില്ലാതെ, ലളിതമായ ജീവിതശൈലി നയിക്കുന്ന ഒരു വ്യക്തി കൂടിയാണ് അദ്ദേഹം. തന്റെ അഭിനയ ജീവിതത്തിൽ നേടിയ വിജയങ്ങളെല്ലാം തന്നെ കഠിനാധ്വാനത്തിന്റെയും അർപ്പണബോധത്തിന്റെയും ഫലമാണെന്ന് റഹ്മാൻ പലപ്പോഴും തെളിയിച്ചിട്ടുണ്ട്. മലയാള സിനിമയ്ക്ക് റഹ്മാൻ നൽകിയ സംഭാവനകൾ സമാനതകളില്ലാത്തതാണ്. കൗമാരക്കാരുടെ നെഞ്ചിടിപ്പായിരുന്ന ആ പഴയ രവി പുത്തൂരാനിൽ നിന്നും ഇന്ന് കാണുന്ന പ്രൗഢിയുള്ള നടനിലേക്കുള്ള റഹ്മാന്റെ വളർച്ച മലയാള സിനിമയുടെ തന്നെ പരിണാമത്തിന്റെ ഒരു പ്രതിഫലനമാണ്.
ഇന്ന് ജന്മദിനം ആഘോഷിക്കുന്ന ഈ പ്രിയ നടന്, തെന്നിന്ത്യൻ സിനിമയുടെ സ്റ്റൈലിഷ് ഐക്കണിന്, മലയാളി സിനിമാ പ്രേമികളുടെ ഹൃദയം നിറഞ്ഞ ജന്മദിനാശംസകൾ. ഇനിയും ശക്തവും വൈവിധ്യമാർന്നതുമായ അനവധി കഥാപാത്രങ്ങളിലൂടെ ഞങ്ങളെ വിസ്മയിപ്പിക്കാൻ അദ്ദേഹത്തിന് സാധിക്കട്ടെ. പ്രായം കേവലമൊരു സംഖ്യ മാത്രമാണെന്ന് തെളിയിച്ചു കൊണ്ട്, തന്റെ അതുല്യമായ പുഞ്ചിരിയുമായി റഹ്മാൻ ഇനിയും വെള്ളിത്തിരയിൽ വിസ്മയങ്ങൾ തീർക്കട്ടെ എന്ന് ആശംസിക്കുന്നു.