മലയാള സിനിമയിലെ പ്രിയനടൻ മോഹൻലാലിന്റെ ജന്മദിനം പഴയകാല ചലച്ചിത്ര പ്രവർത്തകരുടെ കൂട്ടായ്മയായ ’80 മദ്രാസ് മെയിൽ’ കേക്ക് മുറിച്ച് ആഘോഷിച്ചു. കൊച്ചി ഗോകുലം കൺവെൻഷൻ സെന്ററിൽ നടന്ന കൂട്ടായ്മയുടെ നാലാം വർഷ ഒത്തുചേരലിനിടെയായിരുന്നു ആഘോഷം. സംവിധായകൻ സിബി മലയിൽ മോഹൻലാലിന് കേക്ക് നൽകിക്കൊണ്ടാണ് ചടങ്ങുകൾക്ക് തുടക്കം കുറിച്ചത്.
സിനിമയിലെ പ്രമുഖ വ്യക്തിത്വങ്ങളായ ഹരിഹരൻ, കമൽ, കെ. മധു, ജയരാജ്, ജോഷി, സുരേഷ് കുമാർ, മേനക, ഭാഗ്യലക്ഷ്മി, വിധുബാല, അഴകപ്പൻ, ശാന്തി മാസ്റ്റർ, ശ്രീലത നമ്പൂതിരി, കുഞ്ചൻ തുടങ്ങി നിരവധി സഹപ്രവർത്തകരുടെ സാന്നിധ്യത്തിലായിരുന്നു ആഘോഷങ്ങൾ നടന്നത്. ചടങ്ങിൽ സംവിധായകൻ ഹരിഹരൻ മോഹൻലാലിനെ പൊന്നാടയണിച്ച് ആദരിച്ചു.
മോഹൻലാലുമായുള്ള തന്റെ ദീർഘകാല സൗഹൃദത്തെക്കുറിച്ച് നടൻ മണിയൻപിള്ള രാജു ചടങ്ങിൽ ഓർത്തുസംസാരിച്ചു. മോഹൻലാൽ ആറാം ക്ലാസിൽ പഠിക്കുമ്പോൾ തുടങ്ങിയതാണ് തങ്ങളുടെ സൗഹൃദമെന്നും, പത്താം ക്ലാസിലെ വിദ്യാർത്ഥികളെപ്പോലും പിന്തള്ളി അന്ന് സ്കൂൾ നാടകത്തിൽ മികച്ച നടനായി തിരഞ്ഞെടുക്കപ്പെട്ട ആറാം ക്ലാസുകാരനായ മോഹൻലാലിനെ തനിക്ക് ഇപ്പോഴും ഓർമ്മയുണ്ടെന്നും അദ്ദേഹം പറഞ്ഞു.
1980-കളിലെ ചലച്ചിത്ര കലാകാരന്മാരുടെയും സാങ്കേതിക വിദഗ്ധരുടെയും കൂട്ടായ്മയാണ് ’80 മദ്രാസ് മെയിൽ’. അക്കാലത്ത് സിനിമയിൽ ഭാഗ്യം പരീക്ഷിക്കുന്നതിനായി ചെന്നൈയിലേക്ക് (മദ്രാസ്) നടത്തിയ ട്രെയിൻ യാത്രകളുടെ ഓർമ്മ പുതുക്കാനായാണ് കൂട്ടായ്മയ്ക്ക് ഈ പേര് നൽകിയിരിക്കുന്നത്. മുൻകാലങ്ങളിലെ ഊഷ്മളമായ സൗഹൃദങ്ങളും സിനിമാ ഓർമ്മകളും പങ്കുവെക്കുന്നതായിരുന്നു കൊച്ചിയിൽ നടന്ന ഈ ഒത്തുചേരൽ.