ബോളിവുഡ് താരദമ്പതികളായ ദീപിക പദുക്കോണും രൺവീർ സിങ്ങും തങ്ങളുടെ ജീവിതത്തിലേക്ക് രണ്ടാമത്തെ കുഞ്ഞിനെ വരവേൽക്കാൻ ഒരുങ്ങുന്നു. സോഷ്യൽ മീഡിയ പ്ലാറ്റ്ഫോമായ ഇൻസ്റ്റഗ്രാമിലൂടെയാണ് താരങ്ങൾ ഈ സന്തോഷവാർത്ത ആരാധകരെ അറിയിച്ചത്. ആദ്യത്തെ കണ്മണിയായ ദുവയുടെ മനോഹരമായ ഒരു ചിത്രത്തോടൊപ്പമാണ് ദമ്പതികൾ വിവരം പങ്കുവെച്ചത്. കൈയ്യിൽ പ്രെഗ്നൻസി കിറ്റ് പിടിച്ചുനിൽക്കുന്ന ദുവയെ ചിത്രത്തിൽ കാണാം. പോസിറ്റീവ് റിസൾട്ട് വ്യക്തമാക്കുന്ന കിറ്റിനൊപ്പം ദീപികയുടെയും രൺവീറിന്റെയും കൈകളും ചിത്രത്തിലുണ്ട്.
വാർത്ത പുറത്തുവന്നതിന് പിന്നാലെ പ്രിയങ്ക ചോപ്ര, സാമന്ത റൂത്ത് പ്രഭു, അർജുൻ കപൂർ, അനന്യ പാണ്ഡെ, പരിനീതി ചോപ്ര തുടങ്ങിയ പ്രമുഖ താരങ്ങൾ സോഷ്യൽ മീഡിയയിലൂടെ ദമ്പതികൾക്ക് ആശംസകൾ നേർന്നു. ‘ചേച്ചി’യാകാൻ ഒരുങ്ങുന്ന കുഞ്ഞു ദുവയ്ക്കും ആരാധകർ ആശംസകൾ അറിയിക്കുന്നുണ്ട്.
2024 സെപ്റ്റംബർ 8-നാണ് ദീപികയ്ക്കും രൺവീറിനും ആദ്യത്തെ മകളായ ദുവ ജനിച്ചത്. ഏറെ നാളത്തെ പ്രണയത്തിനൊടുവിൽ 2018-ൽ ഇറ്റലിയിൽ വെച്ചായിരുന്നു ഇരുവരുടെയും വിവാഹം. ഓൺസ്ക്രീനിലെ മികച്ച ജോഡികളായ ഇവർ യഥാർത്ഥ ജീവിതത്തിലും ഒന്നിച്ചപ്പോൾ ആരാധകർ അത് ആഘോഷമാക്കിയിരുന്നു. ഇപ്പോൾ കുടുംബത്തിലേക്ക് പുതിയൊരു അംഗം കൂടി എത്തുന്നതിന്റെ ആവേശത്തിലാണ് സിനിമാ ലോകം.