മലയാള സിനിമയിലെ ഇതിഹാസ തിരക്കഥാകൃത്ത് ഡെന്നീസ് ജോസഫിന്റെ തുടക്കകാലത്തെ മാധ്യമപ്രവർത്തന ജീവിതത്തെക്കുറിച്ചും അക്കാലത്തുണ്ടായ വിവാദങ്ങളെക്കുറിച്ചും വെളിപ്പെടുത്തലുമായി സംവിധായകൻ ആലപ്പി അഷ്റഫ്. മമ്മൂട്ടി, മോഹൻലാൽ എന്നീ താരങ്ങളുടെ വളർച്ചയിൽ നിർണ്ണായക പങ്കുവഹിച്ച ഡെന്നീസ് ജോസഫ്, ‘കട്ട് കട്ട്’ എന്ന സിനിമാ പ്രസിദ്ധീകരണത്തിന്റെ സബ് എഡിറ്ററായാണ് കരിയർ ആരംഭിച്ചത്.
അക്കാലത്ത് ഒന്നര ലക്ഷത്തോളം കോപ്പികൾ വിറ്റഴിച്ചിരുന്ന ഈ മാഗസിനുവേണ്ടി ഡെന്നീസ് ജോസഫ് ആദ്യമായി തയ്യാറാക്കിയ അഭിമുഖം തന്നെ വലിയ വിവാദങ്ങൾക്ക് കാരണമായിരുന്നു. നടി ഖദീജയുമായി നടത്തിയ അഭിമുഖത്തിൽ അവർ ഉയർത്തിയ വെല്ലുവിളിയാണ് സിനിമാ ലോകത്തെ പിടിച്ചുലച്ചത്.
നിർമ്മാതാവിന്റെയോ സംവിധായകന്റെയോ കിടപ്പറ പങ്കിടാത്ത ഏതെങ്കിലും നടിമാരുണ്ടോ എന്ന ഖദീജയുടെ ചോദ്യം കട്ട് കട്ടിലൂടെ പുറത്തുവന്നതോടെ വലിയ വിമർശനങ്ങളും ചർച്ചകളും ഉയർന്നു. സിനിമയിലെ അണിയറ രഹസ്യങ്ങൾ റിപ്പോർട്ട് ചെയ്യുന്നതിൽ ഡെന്നീസ് ജോസഫ് പുലർത്തിയ മികവ് അക്കാലത്ത് ശ്രദ്ധേയമായിരുന്നു.
പ്രസിദ്ധീകരണത്തിന്റെ ഉടമയായിരുന്ന ഏലിയാസ് ഈരാളിയെക്കുറിച്ചും ആലപ്പി അഷ്റഫ് മനസ്സ് തുറന്നു. നിരവധി സിനിമകൾ നിർമ്മിച്ചെങ്കിലും അർഹിച്ച അംഗീകാരം ഈരാളിക്ക് ലഭിച്ചില്ല. മലയാളത്തിലെ സൂപ്പർഹിറ്റ് ചിത്രമായ ‘കോട്ടയം കുഞ്ഞച്ചൻ’ ആദ്യം നിർമ്മിക്കാൻ ഇരുന്നത് ഈരാളിയായിരുന്നു. എന്നാൽ പിന്നീട് അദ്ദേഹം ആ കഥ വേണ്ടെന്ന് വെക്കുകയായിരുന്നുവെന്നും ആലപ്പി അഷ്റഫ് വെളിപ്പെടുത്തി. മാധ്യമപ്രവർത്തനത്തിൽ നിന്ന് സിനിമാ ലോകത്തേക്ക് എത്തിയ ഡെന്നീസ് ജോസഫ് പിൽക്കാലത്ത് മലയാളത്തിലെ ഏറ്റവും മികച്ച തിരക്കഥാകൃത്തുക്കളിൽ ഒരാളായി മാറുകയായിരുന്നു.