ഡർബിയുടെ ഷൂട്ട് കാരണം ആട് 3 യിലെ വേഷം നഷ്ടമായിപ്പോയെന്ന് നടൻ ആഡം സാബിക്. രണ്ടു ചിത്രവും ഒരുമിച്ചു കൊണ്ട് പോകുവാൻ പരമാവധി ശ്രമിച്ചിരുന്നുവെന്നും, എന്നാൽ ഡർബി മികച്ച സിനിമയായത് കൊണ്ട് ചിത്രം നഷ്ടമായതിൽ സങ്കടമില്ലെന്നും ആഡം പറഞ്ഞു. റിപ്പോർട്ടർ ടീവിക്ക് നൽകിയ അഭിമുഖത്തിൽ സംസാരിക്കുകയായിരുന്നു താരം.
‘ആട് 3 യിൽ ചാൻസ് വന്നിരുന്നു. പക്ഷെ പോവാതിരുന്നതിന് കാരണം ഡർബി അതിനുള്ള പടം ഉണ്ട് എന്നതാണ്. ഫുൾ ഡേ നൈറ്റ് ഷൂട്ട് പൊക്കോണ്ടിരുന്ന സമയമാണത്. ഡർബിയുടെ ഷൂട്ട് തീർത്ത ശേഷം ആടിന്റെ ഷൂട്ട് തുടങ്ങാം എന്നായിരുന്നു പ്ലാൻ ചെയ്തിരുന്നത്. പക്ഷെ ഡർബിയുടെ ഷൂട്ട് ടൈമിന്റെ രണ്ട് ദിവസം ആടിന്റെ ഷൂട്ട് കയറി വന്നു. അപ്പോൾ സംവിധായകൻ മിഥുൻ മാനുവൽ തോമസ് വിളിച്ചു പറഞ്ഞു ‘ഷൂട്ടിന്റെ ഡേറ്റ് കയറി വന്നിട്ടുണ്ട് നിനക്കു അവിടെ നിന്ന് എത്താൻ പറ്റുമോ എന്ന് നോക്കാൻ പറഞ്ഞു’. ഞാൻ പരമാവധി ശ്രമിച്ചു പക്ഷെ പറ്റില്ല. ഫുൾ ചാർട്ട് ചെയ്തതായിരുന്നു.’ ആഡം സാബിക് പറഞ്ഞു.
സജിൽ മമ്പാട് സംവിധാനം ചെയ്യുന്ന ഡർബി തിയേറ്ററിൽ പ്രദർശനം ആരംഭിച്ചിരിക്കുകയാണ്. മികച്ച പ്രതികരണമാണ് സിനിമയ്ക്ക് ലഭിക്കുന്നത്. ഡിമാൻസ് ഫിലിം ഫാക്ടറിയുടെ ബാനറിൽ മൻസൂർ അബ്ദുൽ റസാഖാണ് ഡർബിയുടെ നിർമ്മാണം നിർവഹിച്ചിരിക്കുന്നത്. സാഗർ സൂര്യ, അമീൻ, ഹരി ശിവറാം, റിഷ് എൻ. കെ, അനു, ജസ്നിയ ജയദീഷ്, ശിവരാജ്, പ്രവീൺ, ആൻ മെർലറ്റ്, ഫ്രാങ്കോ ഫ്രാൻസിസ്, ഹിഫ്രാസ്, സുപർണ്ണ എസ്, ജോണി ആന്റണി, അബു സലിം, ശബരീഷ് വർമ്മ, ദിവ്യ എം നായർ, സന്തോഷ് കീഴാറ്റൂർ, പ്രദീപ് ബാലൻ, കൊല്ലം ഷാഫി, സിനോജ് വർഗ്ഗീസ്, ആർ.ജെ അന്തു, ഷിക്കു നസീർ, ഹബീബ് ഷാജഹാൻ, ഫാഹിസ് ബിൻ റിഫാഹി, മനൂപ് എലമ്പ്ര എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.