വിനായകൻ ഗംഭീരനടനാണ്, അദ്ദേഹത്തിന്റെ അഭിപ്രായ വ്യത്യാസങ്ങൾ മാത്രം എല്ലാവരും വലുതായിട്ട് കാണിക്കുന്നു.

ഗംഭീര നടനാണ് വിനായകനെന്ന് പ്രശംസിച്ച് നടനും സംവിധായകനുമായ വിജയ് ബാബു. കഥാപാത്രത്തിലേക്ക് കയറിയാൽ അദ്ദേഹം വേറെ ഒരു മനുഷ്യനാണെന്നും, അദ്ദേഹത്തിനൊപ്പം അഭിപ്രായ വ്യത്യാസം ഉണ്ടാകുമ്പോൾ മാത്രം അതെല്ലാവരും വലുതായിട്ട് കാണിക്കുന്നുവെന്നും വിജയ് ബാബു പറഞ്ഞു.  മൂവി വേൾഡ് മീഡിയയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

‘വളരെ ഗംഭീര നടനാണ് വിനായകൻ. വളരെ പ്രൊഫഷണൽ ആയ നടൻ ആണ് അദ്ദേഹം. എന്തൊക്കെ പ്രശ്നമുണ്ടെങ്കിലും പറഞ്ഞ സമയത്ത് അദ്ദേഹം സെറ്റിൽ വരും. കഥാപാത്രത്തിലേക്ക് കയറിയാൽ അദ്ദേഹം വേറെ ഒരു മനുഷ്യനാണ്. പുള്ളിയുടെ പെർഫോമൻസിനെ മാച്ച് ചെയ്യാൻ കഴിയില്ല. വിനായകനുമായിട്ട് ഒരു അഭിപ്രായ വ്യത്യാസം ആകുമ്പോൾ മാത്രം അതിനെ ഇച്ചിരി വലുതായിട്ട് കാണിക്കുന്നു. എന്നാൽ ക്രിയേറ്റിവ് ഡിഫറൻസുകൾ എല്ലാ നടന്മാരുമായും ഉണ്ടാകും. ജയസൂര്യായിട്ടും ക്രിയേറ്റീവ് ഡിഫറൻസും വരാറുണ്ട് ധർമ്മജനുമായിട്ടും ഉണ്ടാകാറുണ്ട്.” വിജയ് ബാബു പറഞ്ഞു.

“എല്ലാ സിനിമയിലും വരുന്ന പോലുള്ള ക്രിയേറ്റീവ് ഡിഫറൻസ് നമുക്ക് വിനായകനുമായിട്ടും ഉണ്ടായിട്ടുണ്ട് അല്ലാതെ അത് ചില കാര്യങ്ങൾ പുള്ളിക്ക് ഇഷ്ടപ്പെട്ടില്ല അപ്പോ പുള്ളി പിണങ്ങി പോകും. പക്ഷെ കുറച്ച് നേരം ഇരുന്ന് ചിന്തിക്കുമ്പോൾ പുള്ളിക്ക് വിഷമം വരും. അവിടെ ഇത്രയും ആളുകൾ എന്നെ കാത്തിരിക്കുകയാണ് എന്ന ചിന്ത പുള്ളിക്ക് ഉണ്ടാകും. അപ്പോൾ തന്നെ അസിസ്റ്റന്റിനെ വിളിച്ച് ഞാൻ രാവിലെ 8 മണിക്ക് വരുമെന്ന് പറഞ്ഞേക്ക് എന്ന് പറയും. നമ്മൾ പുള്ളിയെ അനുനയിപ്പിക്കാൻ പോയാൽ ആണ് പ്രശ്നം പുള്ളി സ്വയം അങ്ങ് അനുനയിച്ചോളും. അങ്ങനെ ഒരു ഹ്യൂമൻ നേച്ചർ പുള്ളിയുടെ ഉള്ളിലുണ്ട്.”വിജയ് ബാബു കൂട്ടിച്ചേർത്തു.

വിജയ് ബാബുവും വിനായകനും വീണ്ടും ഒരുമിക്കുന്ന ആട് 3 മാർച്ച് 19 ന് റിലീസിനൊരുങ്ങുകയാണ്. വേണു കുന്നപ്പിള്ളി നേതൃത്വം നൽകുന്ന കാവ്യാ ഫിലിം കമ്പനി, വിജയ് ബാബുവിന്റെ ഉടമസ്ഥതയിലുള്ള ഫ്രൈഡേ ഫിലിം ഹൌസ് എന്നിവർ ചേർന്നാണ് ജയസൂര്യ നായകനായ ഈ വമ്പൻ കോമഡി ഫാൻ്റസി ചിത്രം നിർമ്മിക്കുന്നത്. മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രങ്ങളിലൊന്നായാണ് ആട് 3 ഒരുങ്ങുന്നത്. കാവ്യാ ഫിലിം കമ്പനി, ഫ്രൈഡേ ഫിലിം ഹൌസ് എന്നിവർ നിർമ്മിക്കുന്ന ഏറ്റവും വലിയ ചിത്രമാണ് ആട് 3 എന്ന പ്രത്യേകതയും ഉണ്ട്.