നടൻ രൺവീർ സിങിനെതിരെ കേസെടുത്ത് ബെംഗളൂരു പോലീസ്. ‘കാന്താര’ സിനിമയിലെ ചാമുണ്ഡി ദൈവത്തെ വികലമായി അനുകരിച്ച് മതവികാരം വ്രണപ്പെടുത്തിയെന്ന പരാതിയിലാണ് കേസെടുത്തിരിക്കുന്നത്. ‘കാന്താരയിൽ പ്രതിപാദിക്കുന്ന പഞ്ചുരുളി ദൈവത്തെ വികലമായി അവതരിപ്പിക്കുകയും ചാമുണ്ഡി ദൈവത്തെ പെൺപ്രേതം എന്ന് വിശേഷിപ്പിക്കുകയും ചെയ്തു’ എന്ന് കാണിച്ച് ബെംഗളൂരുവിൽ പ്രവർത്തിക്കുന്ന അഭിഭാഷകനായ പ്രശാന്ത് മെത്തൽ ആണ് പരാതി നൽകിയത്.
ബെംഗളൂരു ഒന്നാം അഡീഷനൽ ചീഫ് മെട്രോപൊളിറ്റൻ മജിസ്ട്രേറ്റ് കോടതിയിലാണ് പരാതി നൽകിയത്. ഡിസംബർ 27-ന് സമർപ്പിച്ച ഹർജിയിൽ ജനുവരിയിൽ കേസെടുക്കാൻ ഉത്തരവിടുകയായിരുന്നു. തുടർന്നാണ് ബെംഗളൂരു ഹൈ ഗ്രൗണ്ട്സ് പൊലീസ് സ്റ്റേഷനിൽ കേസ് റജിസ്റ്റർ ചെയ്തത്. ഭാരതീയ ന്യായ സംഹിതയുടെ 175(3), 196, 299, 302 വകുപ്പുകൾ പ്രകാരമാണ് കേസ്. ഏപ്രിൽ എട്ടിന് കോടതി കേസ് വീണ്ടും പരിഗണിക്കും.
കർണാടകയിലെ പരമ്പരാഗത ഭൂതക്കോല ആചാരങ്ങളിൽ വിശ്വസിക്കുന്ന വ്യക്തിയാണ് താനെന്നും ചാമുണ്ഡി തൻ്റെ കുടുംബദേവതയാണെന്നും പരാതിക്കാരൻ പറയുന്നു. രൺവീർ ബോധപൂർവം ചെയ്തതാണെന്നും മതവിശ്വാസം വ്രണപ്പെടുത്താൻ വേണ്ടി ചെയ്തതാണെന്നും പ്രശാന്ത് മെത്തൽ ആരോപിച്ചു. കൂടാതെ ദൈവത്തെ വികലമായി അനുകരിക്കരുത് എന്ന് ചിത്രത്തിൻ്റെ സംവിധായകൻ കൂടിയായ ഋഷഭ് ഷെട്ടി അഭ്യർഥിച്ചിട്ടും രൺവീർ അനുകരണം തുടർന്നുവെന്നും പരാതിയിൽ ആരോപിക്കുന്നുണ്ട്. ഗോവ രാജ്യാന്തര ചലച്ചിത്രമേളയുടെ സമാപനവേദിയിൽ ‘കാന്താര: എ ലെജൻഡ് ചാപ്റ്റർ വൺ’ ചിത്രത്തിലെ നായകൻ ഋഷഭ് ഷെട്ടിയുടെ പ്രകടനത്തെ രൺവീർ അനുകരിച്ചിരുന്നു. ഋഷഭിൻ്റെ മുന്നിൽ വച്ചായിരുന്നു രൺവീറിന്റെ അനുകരണം.