മഞ്ജു വാര്യരുടെ കരുത്തിനെ പ്രശംസിച്ച് എഴുത്തുകാരി ശാരദക്കുട്ടി പങ്കുവച്ച കുറിപ്പിന് മറുപടി പങ്കിട്ട് നടി ശോഭന. മഞ്ജു ഒറ്റയ്ക്കല്ലെന്നും സ്നേഹിക്കാൻ വലിയൊരു ലോകം തന്നെ അവർക്കുണ്ടെന്നും ശോഭന കുറിച്ചു. ശാരദക്കുട്ടിയുടെ കുറിപ്പിലെ ‘കുടുംബമില്ലെങ്കിലും ഒന്നും നഷ്ടപ്പെടില്ല’ എന്ന പ്രയോഗത്തോടുള്ള വിയോജിപ്പെന്ന രീതിയിലും കൂടിയായിരുന്നു ശോഭനയുടെ മറുപടി.
“മഞ്ജു ജിക്ക് ഒരു കുടുംബമുണ്ട്! മിക്ക ആളുകൾക്കുമുള്ളതിനേക്കാൾ വലിയ ഒന്നല്ലേ അത്? അവൾക്ക് ഞങ്ങളുണ്ട്, അവളുടെ സുഹൃത്തുക്കളും സഹപ്രവർത്തകരും. എല്ലാത്തിലുമുപരി അവളുടെ സിനിമകളിലൂടെ അവൾ ഉണ്ടാക്കിയെടുത്ത പാരമ്പര്യമുണ്ട്… ആരാധകരുണ്ട്, അതുകൊണ്ട് നീ തകർപ്പനായി മുന്നേറൂ പെണ്ണേ… യാതൊരു തടസ്സങ്ങളുമില്ലാതെ ഒറ്റയ്ക്ക് യാത്ര തുടരൂ. കലയും നിൻ്റെ ബൈക്കും മാത്രം കൂട്ടിനുണ്ടാവട്ടെ. ചേച്ചിയോടും സ്നേഹം മാത്രം,” ശോഭന കുറിച്ചു.
ഒറ്റയ്ക്ക് സഞ്ചരിക്കുമ്പോഴും കൂട്ടിന് ഒരുപാടുപേരുണ്ടെന്ന ഈ ഉറപ്പ് ഏതൊരു സ്ത്രീക്കും വലിയ കരുത്താണെന്ന് ആരാധകർ കമൻ്റ് ചെയ്യുന്നു. “കുടുംബത്തിനും സദാചാരബോധ്യങ്ങൾക്കും കടമകൾക്കും അച്ചടക്കങ്ങൾക്കും നിന്ദകൾക്കും വഴങ്ങാതെ പറന്നു നടന്നു ജീവിക്കുവാൻ കേരളം കണി കണ്ടുണരുന്ന പെണ്മ എളുപ്പമായിരുന്നില്ല അവളുടെ വളർച്ചയുടെ വഴികൾ. കഴിവുകൾ തേച്ചു മിനുക്കി നില നിർത്തുന്ന മിടുക്കിൻ്റെ പേരാണ് മഞ്ജു വാര്യർ” എന്നായിരുന്നു ശാരദക്കുട്ടിയുടെ കുറിപ്പ്.