“തുടരു”മിൽ ശോഭനക്ക് വേണ്ടി സിനിമ മുഴുവന് താൻ ഡബ്ബ് ചെയ്തിരുന്നുവെന്നും, എന്നാൽ പിന്നീട് ശോഭനയുടെ നിര്ബന്ധത്തെ തുടര്ന്ന് അത് മാറ്റുകയായിരുന്നുവെന്നും തുറന്നു പറഞ്ഞ് നടിയും ഡബ്ബിങ് ആർട്ടിസ്റ്റുമായ ഭാഗ്യലക്ഷ്മി. തന്നെയുമല്ല തന്റെ ശബ്ദം മാറ്റിയില്ലെങ്കില് പ്രൊമോഷന് വരില്ലെന്ന് ശോഭന പറഞ്ഞുവെന്നും ഭാഗ്യലക്ഷ്മി കൂട്ടിച്ചേർത്തു. സൈന സൗത്ത് പ്ലസിന് നല്കിയ അഭിമുഖത്തിൽ സംസാരിക്കുകയായിരുന്നു താരം.
“ഞാനാദ്യമായിട്ടാണ് ഈ കാര്യം പുറത്ത് പറയുന്നത്. തുടരും സിനിമ സത്യത്തില് ഞാന് ഡബ്ബ് ചെയ്തതാണ്. തുടരുമിന് ഡബ്ബിങിന് വിളിച്ചപ്പോള് തമിഴ് കഥാപാത്രം ആണെന്ന് പറഞ്ഞു. മുഴുവന് സിനിമയും ഞാന് ഡബ്ബ് ചെയ്തു. ക്ലൈമാക്സൊക്കെ അലറി നിലവിളിച്ച്, ഭയങ്കരമായി എഫേര്ട്ട് എടുത്താണ് ചെയ്തത്. പറഞ്ഞ പ്രതിഫലവും തന്നു. ഒരു മാസം കഴിഞ്ഞും സിനിമ റിലീസായില്ല. ഒരു ദിവസം ഞാന് രഞ്ജിത്തിനെ അങ്ങോട്ട് വിളിച്ചു. ചേച്ചി, എങ്ങനെ പറയണമെന്ന് അറിയില്ല. ചേച്ചിയുടെ ശബ്ദം മാറ്റി. ശോഭന തന്നെ ഡബ്ബ് ചെയ്തുവെന്ന് പറഞ്ഞു. എന്നെ വിളിച്ച് പറയാനുള്ള മര്യാദ നിങ്ങള്ക്കില്ലേ എന്ന് ഞാന് ചോദിച്ചു. അവർ ഡബ്ബ് ചെയ്തില്ലെങ്കില് പ്രൊമോഷന് വരില്ലെന്ന് ശോഭന പറഞ്ഞുവെന്ന് അവര് എന്നോട് തുറന്നു പറഞ്ഞു”. ഭാഗ്യലക്ഷ്മി പറഞ്ഞു
“ഇത്രയും സിനിമകള് ചെയ്തൊരു ഡബ്ബിങ് ആര്ട്ടിസ്റ്റ് എന്ന നിലയില് ശോഭനയ്ക്ക് എന്നെ വിളിച്ച് ഒരു വാക്ക് പറയാമായിരുന്നു. അവര് പറഞ്ഞില്ല. നിര്മാതാവും സംവിധായകനും പറഞ്ഞില്ല. ഇതേ സംവിധായകന് പ്രൊമോഷന് ഇന്റര്വ്യുവിലിരുന്ന് പറയുന്നുണ്ടായിരുന്നു, ശോഭനയാണെന്ന് തീരുമാനിച്ചപ്പോള് തന്നെ അവരുടെ ഓണ് വോയ്സ് ആയിരിക്കുമെന്നും തീരുമാനിച്ചിരുന്നുവെന്ന്. അത് നുണയാണ്. സിനിമ ആദ്യ ദിവസം തന്നെ ഞാന് കണ്ടിരുന്നു. ക്ലൈമാക്സില് അവര് എന്റെ ശബ്ദം ഉപയോഗിച്ചിട്ടുണ്ട്. കാരണം ശോഭനയ്ക്ക് അത്ര അലറി നിലവിളിച്ച് ചെയ്യാനാകില്ല, അവര്ക്ക് അത്രയും എക്സ്പീരിയന്സില്ല. ഡയലോഗ് ഒക്കെ അവര് പറഞ്ഞിട്ടുണ്ടാകും, പക്ഷെ അലറലും നിലവിളിയും എന്റേതാണ്. അവര് എന്നോട് എത്തിക്സ് കാണിച്ചില്ലെന്ന എന്ന സങ്കടം എനിക്കുണ്ട്”. ഭാഗ്യലക്ഷ്മി കൂട്ടിച്ചേർത്തു.
തിയേറ്ററിൽ മികച്ച പ്രതികരണം നേടിയ തുടരും അതിഗംഭീരം റെസ്പോൺസ് തന്നെയാണ് ഒടിടിയിലും സ്വന്തമാക്കിയത്. തരുൺ മൂർത്തി സംവിധാനം ചെയ്ത സിനിമയിൽ പ്രകാശ് വർമ, ബിനു പപ്പു, ഫർഹാൻ ഫാസിൽ, മണിയൻപിള്ള രാജു, തോമസ് മാത്യു, ഇർഷാദ് തുടങ്ങിയവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്. നിരവധി പുതുമുഖങ്ങളും ചിത്രത്തിൽ എത്തുന്നുണ്ട്. കെ ആര് സുനിലിന്റെ കഥയ്ക്ക് തരുണ് മൂര്ത്തിയും ചേര്ന്നാണ് തിരക്കഥ ഒരുക്കിയത്.