ഷെയ്ന് നിഗത്തിന്റെ ഏറ്റവും പുതിയ ചിത്രം ബള്ട്ടിയുടെ പോസ്റ്ററുകള് നശിപ്പിക്കപ്പെടുന്നതിനെതിരെ പ്രതികരിച്ച് ചിത്രത്തിന്റെ നിര്മ്മാതാവ് സന്തോഷ് ടി കുരുവിള. ”ഷെയ്ന് നിഗം എന്ന യുവനടന് ഇത്രയും ടാര്ഗറ്റ് ചെയ്യപ്പെടുന്നത് എന്തുകൊണ്ടാണെന്ന് തനിക്ക് മനസിലാവുന്നില്ലെന്ന്” സന്തോഷ് ടി കുരുവിള പറഞ്ഞു. കൂടാതെ നേരത്തെ ഷെയ്നിന്റെ ‘ഹാല്’ എന്ന ചിത്രത്തിനെതിരെയും ഇത്തരത്തിലുള്ള പ്രവര്ത്തി നടന്നിരുന്നുവെന്ന് അദ്ദേഹം ചൂണ്ടികാട്ടി. തന്റെ സമൂഹ മാധ്യമ പേജിൽ കുറിപ്പ് പങ്കുവെച്ച് കൊണ്ടായിരുന്നു സന്തോഷ് ടി കുരുവിളയുടെ പ്രതികരണം.
“എന്തിനാണ് വളരെ ആസൂത്രിതമായി ഷെയ്ൻ നിഗം എന്ന നടൻ്റെ പോസ്റ്ററുകൾ വലിച്ചു കീറുന്നത് എന്ന് മനസ്സിലാവുന്നില്ല. ഈ പ്രവർത്തി അങ്ങയറ്റം ഹീനമായ ഒന്നാണ്. ഷെയിൻ നിഗം ചിത്രങ്ങളായ ബൾട്ടി, ഹാൽ എന്നീ സിനിമകളുടെ പ്രൊമോഷണൽ മെറ്റീരിയൽ വലിച്ചു കീറണമെന്നും ഒട്ടിച്ചു മറയ്ക്കണമെന്നതും ആരുടെ താൽപര്യമാണ്? പ്രേക്ഷകർ നല്ല അഭിപ്രായങ്ങൾ ഉറക്കെ പറയുമ്പോൾ ആരാണ് അസ്വസ്ഥരാവുന്നത്?”. സന്തോഷ് ടി കുരുവിള കുറിച്ചു.
“ആരാണ് മുൻ നിരയിലേയ്ക്ക് എത്തുന്ന ഈ ചെറുപ്പക്കാരനെ അപ്രസക്തനാക്കാൻ ശ്രമിക്കുന്നത്? ഇവിടെ ചേർത്തിരിക്കുന്ന ഫോട്ടോകൾ എനിയ്ക്ക് ലഭിച്ച ഏതാനും ചിലത് മാത്രമാണ്. കേരളത്തിലങ്ങോളം ഇങ്ങോളം ഈ പരിപാടി തുടങ്ങിയിട്ട് പത്ത് ദിവസത്തോളമായി. എന്താണിവരുടെ ഉദ്ദേശ്യം? ഞാൻ തന്നെ നിർമ്മിച്ച എൻ്റെ മുൻകാല ചിത്രങ്ങൾക്കൊന്നും സംഭവിക്കാത്തതാണ് ഇപ്പോൾ സംഭവിച്ചുകൊണ്ടിരിയ്ക്കുന്നത്, ഈ പോസ്റ്റർ കീറൽ പരിപാടി. അപ്പോൾ കാര്യങ്ങൾ വ്യക്തമാവുന്നുണ്ടല്ലോ? എന്താണ് ഷെയ്ൻ നിഗം എന്ന ഒരു മികച്ച യുവ നടൻ ഇത്രമേൽ ടാർഗറ്റ് ചെയ്യപ്പെടുന്നത്?.” സന്തോഷ് ടി കുരുവിള കൂട്ടിച്ചേർത്തു.