ദാദാ സാഹേബ് ഫാൽക്കെ അവാർഡ് നേടിയതിൽ നടൻ മോഹൻലാലിന് സ്വീകരണമൊരുക്കാൻ ഒരുങ്ങി സംസ്ഥാന സർക്കാർ. ശനിയാഴ്ച, തിരുവനന്തപുരത്ത് വെച്ച് മോഹൻലാലിനെ സർക്കാർ ആദരിക്കും. മോഹൻലാലിന്റെയും മുഖ്യമന്ത്രിയുടെയും സൗകര്യം നോക്കി ആദരം സംഘടിപ്പിക്കുമെന്ന് സാംസ്കാരിക മന്ത്രി സജി ചെറിയാൻ നേരത്തെ അറിയിച്ചിരുന്നു. പരിപാടിയുമായി ബന്ധപ്പെട്ട കൂടുതൽ വിശദാംശങ്ങൾ പങ്കുവയ്ക്കാൻ സജിചെറിയാൻ വാർത്താ സമ്മേളനം വിളിച്ചിട്ടുണ്ട്.
മുഖ്യമന്ത്രി പിണറായി വിജയൻ അടക്കമുള്ളവർ ചടങ്ങിൽ പങ്കെടുക്കും. സെപ്റ്റംബർ 23നാണ് മോഹൻലാൽ ദാദാ സാഹേബ് ഫാൽക്കെ പുരസ്കാരം ഏറ്റുവാങ്ങിയത്. മോഹൻലാലിൻ്റെ സിനിമ യാത്രകൾ തലമുറകളെ പ്രചോദിപ്പിക്കുന്നതാണെന്നായിരുന്നു ജൂറിയുടെ അഭിപ്രായം. സംവിധായകൻ അടൂർ ഗോപാലകൃഷ്ണനു ശേഷം രണ്ടാമത് ഈ പുരസ്ക്കാരം ലഭിച്ച മലയാളി ആണ് മോഹൻലാൽ.