ശ്രദ്ധേയമായി നടൻ കുട്ടിക്കൽ ജയചന്ദ്രന്റെ പുതിയ പോസ്റ്റ്. “നിങ്ങളോട് പങ്കുവയ്ക്കാത്ത ഒരുകാര്യവുമെനിക്കില്ല! എന്ന് തുടങ്ങുന്ന കുറിപ്പാണ് തന്റെ സോഷ്യൽ മീഡിയയിലൂടെ കുട്ടിക്കൽ ജയചന്ദ്രൻ പങ്കു വെച്ചിരിക്കുന്നത്. ഒരു സിനിമയിലെങ്കിലും ഈ ജന്മം അഭിനയിക്കണമെന്ന അതിയായ ആഗ്രഹം കൊണ്ടു മാത്രമാണ് ഇന്നിവിടെ വരെ എത്താൻ സാധിച്ചതെന്ന് ജയചന്ദ്രൻ പറയുന്നു. ആരും അറച്ച് പോവുന്ന മാരകമായ ആരോപണം ഏൽപ്പിച്ചിട്ടും ഒരു വലിയ വിഭാഗം ആളുകൾ തന്നിലർപ്പിച്ച വിശ്വാസമാണ് ഇപ്പോൾ ഈ കുറിപ്പ് എഴുതാൻ കാരണമെന്നും നടൻ കൂട്ടിച്ചേർത്തു.
“നിങ്ങളോട് പങ്കുവയ്ക്കാത്ത ഒരുകാര്യവുമെനിക്കില്ല! നിങ്ങളുടെ വിശ്വാസ്യത കളയുന്ന ഒരുകാര്യവും ചെയ്തിട്ടുമില്ല. ഒരൊറ്റ സിനിമയിൽ എങ്കിലും ഈ ജന്മം അഭിനയിക്കണം എന്ന കുഞ്ഞുന്നാളിലെയുള്ള മോഹ തീഷ്ണത ഒന്നു മാത്രം എന്നെ അവിടെയെത്തിച്ചു. ഒരു അസന്മാർഗികതയിലൂടെയും പോകാൻ ഇടവരുത്താതെ പ്രകൃതി വഴികാട്ടി. ഹോ, അവിടെത്തിയിട്ട് എന്തൊക്കെ നേരിട്ടെന്നറിയാമോ! സഹപ്രവർത്തകര് ഞെളിപിരി കൊണ്ട് എന്തൊക്കെയോ ചെയ്യുന്നു, നാട്ടുകാരിലും, കൂട്ടുകാരിലും ‘ചിലർ’ ഇരിക്കപ്പൊറുതിയില്ലാതെ കീഴ്മേല് മറിയുന്നു…ദാ, ഇപ്പോൾ ഭാര്യയൊഴിച്ച് കുറെ വീട്ടുകാരും! കൂടെ ഒരുവൻ നന്നാവുന്നതിൽ ഇത്രയധികം വയറുനോവുണ്ടാകുന്ന മറ്റൊരു ജീവിയില്ല!”കുട്ടികൾ ജയചന്ദ്രൻ കുറിച്ചു.
“എന്നിട്ടും, ഈ അസുയാമേദ്യങ്ങളുടെ ഇടയിലൂടെ ‘ദൃശ്യം’, ‘ചാന്തുപൊട്ട്’ ഇത്തരം അസാധ്യമായ വിജയങ്ങളുൾപ്പടെ മുപ്പതോളം സിനിമകളിൽ പങ്കാവാൻ കഴിഞ്ഞതിൽ അദ്ഭുതം തോന്നുന്നു. അതിലെല്ലാം സഹകരിപ്പിച്ചവരെ മരണം വരെ സ്മരിക്കും, ദ്രോഹിച്ചവരെയും!
ഇതെല്ലാം എഴുതാൻ കാരണം, ആരും അറച്ച് പോവുന്ന മാരകമായ ആരോപണം ഏൽപ്പിച്ചിട്ടും, നിങ്ങളിൽ ഒരു വലിയ വിഭാഗം മെസ്സേജിലൂടെയും, കമന്റിലൂടെയും എന്നിലുള്ള വിശ്വാസം അറിയിക്കുന്നത് കൊണ്ടാണ്! മരണം വരെ നിങ്ങളുടെ മുന്നിൽ ഒരു ചെറിയ കലാകാരനായി നിൽക്കാൻ കൊതിയാണ്! ഇനി, ഞാനേത് ഷേപ്പിൽ വരുവെന്നറിയത്തില്ല! ഏത് ഷേപ്പിൽ വന്നാലും നിങ്ങളുണ്ടാവണം! ഉണ്ടാവില്ലേടേ.. കുജ.”-കുട്ടിക്കൽ ജയചന്ദ്രൻ കൂട്ടിച്ചേർത്തു.