നടന് വിജയ്ക്കെതിരെ കേസെടുത്ത് പോലീസ്. തമിഴക വെട്രി കഴകത്തിന്റെ (ടിവികെ) സംസ്ഥാന സമ്മേളനത്തിനിടെ യുവാവിനെ തള്ളിയിട്ടു എന്ന പരാതിയിൽ പെരമ്പാളൂര് സ്വദേശിയായ ശരത് കുമാര് നൽകിയ പരാതിയുടെ അടിസ്ഥാനത്തിലാണ് കേസ്. വിജയ്ക്ക് പുറമെ പത്ത് ബൗണ്സര്മാര്ക്കെതിരേയും കേസെടുത്തിട്ടുണ്ട്. ബിഎന്എസ്സിലെ മൂന്ന് വകുപ്പുകള് ചുമത്തിയാണ് കേസെടുത്തിട്ടുള്ളത്. ടിവികെയുടെ ഭാഗത്തുനിന്ന് വിഷയത്തില് ഇതുവരെ പ്രതികരണമൊന്നും ഉണ്ടായിട്ടില്ല.
കഴിഞ്ഞ വ്യാഴാഴ്ചയാണ് കേസിനാസ്പദമായ സംഭവമുണ്ടായത്. മധുരയില് നടന്ന സംസ്ഥാനസമ്മേളനത്തിനിടെ വിജയ് യുടെ അടുത്തേക്ക് വരൻ ഒരുങ്ങിയ യുവാവിനെ സുരക്ഷാപ്രവർത്തകരായ ബൗണ്സര്മാര് തൂക്കിയെടുത്ത് റാമ്പില് നിന്ന് പുറത്തേക്ക് എറിയുകയായിരുന്നു. ബൗണ്സര്മാരുടെ നടപടിയില് തനിക്ക് പരിക്കേറ്റുവെന്നും ശരീരത്തിന് വലിയ വേദനയുണ്ടായെന്നും മാനസികമായി ബുദ്ധിമുട്ടുണ്ടായെന്നും ചൂണ്ടിക്കാട്ടിയാണ് ശരത് കുമാർ പരാതി നൽകിയിരിക്കുന്നത്.
സംഭവത്തിന്റെ ദൃശ്യങ്ങൾ കഴിഞ്ഞദിവസങ്ങളില് സാമൂഹിക മാധ്യമങ്ങളില് വലിയ തോതില് പ്രചരിച്ചു. ഡിഎംകെയുടെ സൈബര് വിഭാഗവും ദൃശ്യങ്ങള് പ്രചരിപ്പിക്കുകയും വലിയ വിമര്ശനം ഉന്നയിക്കുകയും ചെയ്തു. പിന്നാലെയാണ് ചൊവ്വാഴ്ച അമ്മയ്ക്കൊപ്പമെത്തി ശരത് കുമാര് ജില്ലാ പോലീസ് മേധാവിക്ക് പരാതി നല്കിയത്.