പൃഥ്വിരാജ് സുകുമാരൻ- മോഹൻലാൽ ചിത്രം ‘എമ്പുരാന്’ വിവാദത്തില് മറുപടി പറഞ്ഞ് മുരളി ഗോപി. വലിയ ജനാധിപത്യരാഷ്ട്രത്തില് സ്വാതന്ത്ര്യത്തോടുകൂടി ജീവിക്കുന്നുവെന്നാണ് നമ്മളെ ധരിപ്പിച്ചുവെച്ചിരിക്കുന്നതെന്നും, ഒരു പരിധിയില് കൂടുതല് ഒന്നും എന്നെ സ്വാധീനിക്കാന് അനുവദിക്കാറില്ലയെന്നും മുരളി ഗോപി പറഞ്ഞു. ചിത്രത്തിന്റെ കലാമൂല്യത്തിനപ്പുറം ബാഹ്യമായ കാര്യങ്ങള് ചര്ച്ചയാവുമ്പോള് ഏതെങ്കിലും തരത്തില് നിരാശയുണ്ടാക്കിയിരുന്നോ എന്ന ചോദ്യത്തിനാണ് മുരളി ഗോപി മറുപടി പറഞ്ഞത്. കൂടാതെ ലൂസിഫര്’ എന്ന സിനിമയ്ക്ക് മൂന്നാംഭാഗമുണ്ടാവുമെന്ന സൂചനയും അദ്ദേഹം നൽകിയിട്ടുണ്ട്. ഒരു യൂട്യൂബ് ചാനലിന് നല്കിയ അഭിമുഖത്തിലാണ് അദ്ദേഹം ഈ കാര്യങ്ങൾ വ്യക്തമാക്കിയത്.
“പ്രതികരിക്കേണ്ടതില്ലാത്തതുകൊണ്ടും, സിനിമയില് ഉറച്ചുനില്ക്കുന്നു എന്നുള്ളതുകൊണ്ടാണ് ഞാൻ മൗനം പാലിച്ചത്. സംസാരിക്കാനുള്ളത് എന്റെ ചിത്രം സംസാരിക്കും. സിനിമ സ്വയം സംസാരിക്കാനുള്ളപ്പോള് ഞാൻ എന്തിന് പ്രതികരിക്കണം. ഒരുപാട് നിയന്ത്രണങ്ങളുള്ള ചുറ്റുപാടിലാണ് നമ്മള് ജീവിക്കുന്നത്. വലിയ ജനാധിപത്യരാഷ്ട്രത്തില് സ്വാതന്ത്ര്യത്തോടുകൂടി ജീവിക്കുന്നുവെന്നാണ് നമ്മളെ ധരിപ്പിച്ചുവെച്ചിരിക്കുന്നത്. എന്നാല് അതല്ല. ഫ്രസ്ട്രേറ്റഡ് ആവില്ലെന്ന് പറയാന് പറ്റില്ല, ആരായാലും ഫ്രസ്ട്രേറ്റഡ് ആവും. എന്നാല് അതുമായി പൊരുത്തപ്പെട്ട് ജീവിക്കുക എന്നുമാത്രമേയുള്ളൂ. അത് ഞാന് ചെയ്യാറുണ്ട്. ഒരു പരിധിയില് കൂടുതല് എന്നെ സ്വാധീനിക്കാന് അനുവദിക്കാറില്ല. ബാധിച്ചാല് ഒന്നും ചെയ്യാന് പറ്റില്ല. ഇന്ത്യന് നിയമവ്യവസ്ഥയെ അംഗീകരിച്ചുകൊണ്ട് എനിക്ക് ചെയ്യാന് കഴിയുന്നത് ഞാന് ചെയ്യും. അതില് ഞാന് അപ്പോളജറ്റിക്കല്ല”. മുരളി ഗോപി പറഞ്ഞു.
“മൂന്നുഭാഗങ്ങളുള്ള പരമ്പരയായാണ് ചിത്രം തുടക്കം മുതലേ പദ്ധതിയിട്ടത്. ഒന്നും രണ്ടും ഭാഗങ്ങള് പുറത്തിറങ്ങി. സ്വാഭാവികമായും മൂന്നാംഭാഗവും പുറത്തിറങ്ങേണ്ടതാണ്”. മുരളി ഗോപി കൂട്ടിച്ചേർത്തു.
മലയാള സിനിമയിലെ ഏറ്റവും ഉയർന്ന കളക്ഷൻ നേടിയ ചിത്രമാണ് എമ്പുരാൻ. പൃഥ്വിരാജ് സുകുമാരൻ സംവിധാനം ചെയ്ത ചിത്രത്തിന് തിരക്കഥയൊരുക്കിയിരിക്കുന്നത് മുരളി ഗോപിയാണ്. മലയാള സിനിമാ കളക്ഷനിലെ സര്വകാല റെക്കോര്ഡുമായാണ് എമ്പുരാൻ തിയേറ്റർ വിട്ടത്. 325 കോടിയാണ് ചിത്രം ആഗോള ബിസിനസിലൂടെ നേടിയത്. മികച്ച പ്രതികരണം നേടിയ സിനിമയുടെ മേക്കിങ്ങിന് നിരവധി കയ്യടികളാണ് ലഭിച്ചത്. മോഹൻലാൽ, പൃഥ്വി എന്നിവരെ കൂടാതെ മഞ്ജു വാര്യര്, ടൊവിനോ തോമസ്, ഇന്ദ്രജിത് സുകുമാരന്, സുരാജ് വെഞ്ഞാറമൂട്, ജെറോം ഫ്ലിന്, ബൈജു, സായ്കുമാര്, ആന്ഡ്രിയ ടിവാടര്, അഭിമന്യു സിങ്, സാനിയ അയ്യപ്പന് തുടങ്ങി വലിയ താരനിര തന്നെ എമ്പുരാനില് അണിനിരന്നിരുന്നു.