തെലുഗു നടൻ വെങ്കട്ട് രാജ്(53) അന്തരിച്ചു. വെള്ളിയാഴ്ച ഹൈദരാബാദിലെ സ്വകാര്യ ആശുപത്രിയിൽ വെച്ചായിരുന്നു അന്ത്യം. കിഡ്നി സംബന്ധമായ അസുഖത്തെ തുടര്ന്ന് ഏറെനാൾ ചികിത്സയിലായിരുന്നു. ഡോക്ടർമാർ വൃക്ക മാറ്റിവയ്ക്കൽ ശസ്ത്രക്രിയ ശുപാർശ ചെയ്തിരുന്നുവെങ്കിലും ചെലവേറിയ ചികിത്സ താങ്ങാൻ കുടുംബത്തിന് കഴിയില്ലെന്ന് താരത്തിന്റെ മകൾ പ്രതികരിച്ചിട്ടുണ്ടായിരുന്നു.
തെലുഗു സിനിമ മേഖലയിൽ ഫിഷ് വെങ്കട്ട് എന്നാണ് താരം അറിയപ്പെടുന്നത്. 2000 കളുടെ തുടക്കത്തിൽ ‘കുഷി’ എന്ന ചിത്രത്തിലെ ഒരു ചെറിയ വേഷത്തിലൂടെയാണ് വെങ്കട്ട് ടോളിവുഡിലേക്ക് എത്തുന്നത്. പിന്നീട് നിരവധി ഹാസ്യകഥാപാത്രങ്ങളിലൂടെയും വില്ലന് വേഷങ്ങളിലൂടെയും പ്രേക്ഷകരുടെ ഹൃദയത്തില് ഇടം നേടി. ദില്, ബണ്ണി, ഭഗീരഥ, കിങ്ങ്, ശിവം, തുടങ്ങി നിരവധി ചിത്രങ്ങളുടെ ഭാഗമായി.