അനശ്വര കലാകാരൻ പ്രേം നസീറിനെ കുറിച്ച് ടിനി ടോം നടത്തിയ അപകീർത്തിപരമായ പരാമർശങ്ങളിൽ പ്രതികരിച്ച് നടനും നിർമ്മാതാവുമായ മണിയൻപിള്ള രാജു. പരാമർശം ചർച്ചാ വിഷയവും വിവാദവും ആയതിന് പിന്നാലെ മാപ്പ് പറഞ്ഞ് ടിനി ടോം രംഗത്ത് എത്തുകയും ഇക്കാര്യം തന്നോട് പറഞ്ഞത് മണിയൻപിള്ള രാജു ആണെന്നും ടിനി ടോം പറഞ്ഞിരുന്നു. ഇതിനെതിരെയാണ് മണിയൻപിള്ളരാജുവിന്റെ പ്രതികരണം.
താനങ്ങനെ നസീർ സാറിനെ കുറിച്ച് പറഞ്ഞിട്ടില്ലെന്നും മുൻപും മണ്ടത്തരങ്ങൾ പറഞ്ഞ് ടിനി വിവാദങ്ങളിൽ അകപ്പെട്ടിട്ടുണ്ടെന്നും മണിയൻപിള്ള രാജു പറയുന്നു. നസീർ സാറിനെ ആരാധിക്കുന്ന ജനങ്ങളുണ്ടെന്നും അവൻ ടിനിയെ കല്ലെറിയുമെന്നും നടൻ കൂട്ടിച്ചേർത്തു. സംവിധായകൻ ആലപ്പി അഷ്റഫുമായുള്ള ഫോൺ സംഭാഷണത്തിലാണ് മണിയൻപിള്ള രാജുവിന്റെ പ്രതികരണം.
ഒരിക്കലും ഞാൻ അങ്ങനെ പറഞ്ഞിട്ടില്ല. ഇവനൊന്നും നസീർ സാറിനെ കണ്ടിട്ട് പോലുമില്ല. ഞാൻ അദ്ദേഹത്തോടൊപ്പം പത്തോ പതിനഞ്ചോ പടങ്ങളിൽ അഭിനയിച്ചിട്ടുണ്ട്. ഇത്രയും ദൈവ തുല്യനായൊരു മനുഷ്യനെ അതിന് മുൻപോ ശേഷമോ ഞാൻ കണ്ടിട്ടില്ലെന്ന് പല അഭിമുഖങ്ങളിലും ഞാൻ പറഞ്ഞിട്ടുണ്ട്. മുൻപും മണ്ടത്തരങ്ങൾ പറഞ്ഞ് ടിനി ടോം വിവാദങ്ങളിൽ അകപ്പെട്ടിട്ടുണ്ട്. എന്തിന് ഇത്രയും മഹാനായൊരു മനുഷ്യനെ കുറിച്ച് ഇത്തരം പരാമർശം നടത്തുന്നത്. ഇവന് ഭ്രാന്താണ്. ഏറ്റവും കൂടുതൽ സിനിമകൾ അഭിനയിക്കുകയും നായകനാകുകയും ഒക്കെ ചെയ്ത ആളാണ് നസീർ സാർ. അദ്ദേഹത്തെ ആരാധിക്കുന്ന ജനങ്ങളുണ്ട് ഇവിടെ. അവരെല്ലാം ടിനിയെ കല്ലെറിയും. ടിനി മാപ്പ് പറയണം. ആരൊക്കെയോ കേസ് കൊടുത്തെന്ന് അറിയുന്നുണ്ട്’ മണിയൻപിള്ള രാജു
വ്യക്തമാക്കി.
അവസാനകാലത്ത് അവസരം കുറഞ്ഞതില് മനസ്സ് വിഷമിച്ചായിരുന്നു നസീര് മരിച്ചതെന്നായിരുന്നു ടിനി ടോം പറഞ്ഞത്. ഒരു അഭിമുഖത്തിൽ ആയിരുന്നു ടിനിയുടെ പരാമർശം.