സമൂഹമാധ്യമങ്ങളില്‍ തന്റെ ടെഡ് എക്‌സ് ടോക്കിലൂടെ ശ്രദ്ധ നേടുകയാണ് നടന്‍ ശ്രീനാഥ് ഭാസി. തന്റെ കരിയറിലെ വിജയത്തിന്റെയും നേട്ടങ്ങളുടെയും യതാര്‍ത്ഥ കാരണങ്ങള്‍ വെളിപ്പെടുത്തിക്കൊണ്ടായിരുന്നു താരത്തിന്റെ രസകരമായ സംസാരം. യുവതലമുറയുടെ ഇടയില്‍ മലയാളത്തില്‍ ഏറ്റവും സ്വാധീനമുള്ള താരങ്ങളിലൊരാളായ ശ്രീനാഥ് ഭാസിയുടെ സ്പീച്ചിനും ഏറെ സ്വീകാര്യതയാണ് ലഭിച്ചത്. പാട്ടുപാടുന്ന, ഒരു റോക്ക് മ്യൂസിക് ആരാധകനില്‍ നിന്നും കരുത്തുറ്റ നടനിലേക്കുള്ള തന്റെ വളര്‍ച്ചയെ കുറിച്ചായിരുന്നു ശ്രീനാഥ് ഭാസിയുടെ സംസാരം. തന്റെ വൈറലായ പഴംപൊരി സോങ്ങ് കലാമണ്ഡലത്തില്‍ ചെന്നപ്പോള്‍ പാടിയ അനുഭവത്തേക്കുറിച്ചും സിനിമയിലേക്കുള്ള കടന്നുവരവിനേക്കുറിച്ചുമൊക്കെ താരം ഇടയ്ക്ക് സംസാരിച്ചു. മംഗളൂരുവില്‍ നടന്ന ടെഡ് എക്‌സ് പരിപാടിയിലായിരുന്നു ശ്രീനാഥ് സംസാരിച്ചത്.
എല്ലാം തുടങ്ങുന്നത് ഫേസ്ബുക്കിലെ ഒരു ഫ്രണ്ട് റിക്വസ്റ്റിലൂടെയായിരുന്നു. ഒരു സംവിധായകന് റിക്വസ്റ്റ് അയച്ചത് പിന്നീടൊരു ഓഡിഷനിലേക്ക് എത്തുകയായിരുന്നു. അതിന് കാരണമായത്, നേഹ നായരാണ്. അവരെ ഞാന്‍ മുമ്പ് ഇന്റര്‍വ്യൂ ചെയ്തിരുന്നു. അവരുടെ പേജിലൂടെ പോകുമ്പോഴായിരുന്നു സംഭവം. ഇടയ്ക്കിടെ സംവിധായകര്‍ക്ക് റിക്വസ്റ്റ് അയക്കുന്നത് ഗുണം ചെയ്യും.
പണ്ടുമുതലേ തന്റെ ആഗ്രഹമായിരുന്നു ആളുകള്‍ക്ക് മുമ്പില്‍ പെര്‍ഫോം ചെയ്യുക എന്നും ശ്രീനാഥ് പറഞ്ഞു. ”ഞങ്ങള്‍ക്കൊരു മ്യൂസിക് ബാന്‍ഡുണ്ടായിരുന്നു. അതില്‍ മെറ്റല്‍ ഹെഡ്ഡായിരുന്നു ഞാന്‍. ഒറിജനല്‍ പാട്ടുകള്‍ ചെയ്യണം. അതുമായി രാജ്യം ചുറ്റണം എന്നായിരുന്നു ആഗ്രഹം. മൂന്ന് കൊല്ലം അങ്ങനെ നടന്നു. അന്നൊരു പരിപാടിക്കിടെ വിധികര്‍ത്താക്കളിലൊരാള്‍ പറഞ്ഞു, സംഗീതം നല്ലതു തന്നെ പക്ഷെ കോര്‍പ്പറേറ്റ് ജോലിയും വേണം. കാരണം ഇത് പണച്ചെലവുള്ള കാര്യമാണ് താരം പറയുന്നു.
അങ്ങനെയാണ് ഇന്ന് കാണുന്ന ശ്രീനാഥ് ഭാസിയിലേക്ക് എത്തിയതെന്നും അല്ലെങ്കില്‍ താനെന്താകും ചെയ്തിട്ടുണ്ടാവുക എന്ന് പറയാനാകില്ലെന്നും ശ്രീനാഥ് പറഞ്ഞു. ടാ തടിയാ സിനിമയിലെ ഓ മൈ പഞ്ചസാര എന്ന ബ്രേക്ക് ഔട്ട് പാട്ടിനെ കുറിച്ചും ശ്രീനാഥ് മനസ് തുറന്നു.
പണ്ട് കോളേജില്‍ പഠിക്കുന്ന സമയത്ത് സുഹൃത്തുക്കള്‍ക്കൊപ്പം രസത്തിന് ചെയ്ത പാട്ടായിരുന്നു അതെന്ന് ശ്രീനാഥ് പറയുന്നു. പക്ഷെ ആ പാട്ട് ഹിറ്റായി. കരിയറില്‍ മാറ്റം കൊണ്ടു വന്നു. ആളുകള്‍ ഇന്നും ആ പാട്ട് ഇഷ്ടപ്പെടുന്നുണ്ട്. ഈയ്യടുത്ത് കലാമണ്ഡലത്തില്‍ പോയപ്പോഴും ആ പാട്ട് പാടിയെന്നും ശ്രീനാഥ് പറഞ്ഞു. താന്‍ ജീവിതത്തില്‍ പെട്ടെന്നുള്ള തോന്നലില്‍ ചെയ്തതെല്ലാം തനിക്ക് ഗുണമായി മാറുകയായിരുന്നുവെന്നും താരം പറഞ്ഞു.
താരത്തിന്റെ വീഡിയോ സോഷ്യല്‍ മീഡിയയില്‍ വൈറലായി മാറിയിരിക്കുകയാണ്. മച്ചാന്‍ ഇത്രയും പൊളിയായിരുന്നല്ലേയെന്നാണ് സോഷ്യല്‍ മീഡിയ ചോദിക്കുന്നത്. ഇത്ര നന്നായി സംസാരിക്കാന്‍ കഴിയുമെന്ന് അറിയില്ലായിരുന്നുവെന്നും ചിലര്‍ പറയുന്നു. വീഡിയോ വൈറലായി മാറിയിരിക്കുകയാണ്. കഴിഞ്ഞ മാസം 24-ാം തിയ്യതിയാണ് വീഡിയോ പബ്ലിഷ് ചെയ്തിരിക്കുന്നത്.