വിഷ്ണു മഞ്ചു നായകനായെത്തുന്ന ഏറ്റവും പുതിയ ചിത്രം ‘കണ്ണപ്പ’ യിലെ ‘ശ്രീ കാല ഹസ്തി’ എന്ന് തുടങ്ങുന്ന ഗാനത്തിന്റെ മലയാളം ലിറിക്കല് വീഡിയോ പുറത്തിറങ്ങി. സ്റ്റീഫന് ദേവസിയുടെ സംഗീതത്തില് ചിത്ര അരുണാണ് ഗാനം ആലപിച്ചിരിക്കുന്നത്. സിജു തുറവൂറാണ് ഗാനരചന.
വേറിട്ട കഥപറച്ചില്, അതിശയിപ്പിക്കുന്ന ചില ദൃശ്യങ്ങള്, ആത്മീയമായ മാനങ്ങള് എന്നിവയെ കുറിച്ചുള്ള ചില സൂചനകള് നല്കി ചിത്രം ഇതിനകം ആരാധകരുടെ ആകാംക്ഷ വര്ധിപ്പിച്ചിട്ടുണ്ട്. ‘കണ്ണപ്പ’യുടെ പോസ്റ്ററുകളും ടീസറും പാട്ടുകളും ഇതിനകം ഏറെ തരംഗമായി മാറിയിട്ടുണ്ട്. എവിഎ എന്റര്ടെയ്ന്മെന്റ്, 24 ഫ്രെയിംസ് ഫാക്ടറി എന്നീ ബാനറുകളില് ഡോ. മോഹന് ബാബു നിര്മിച്ച് മുകേഷ് കുമാര് സിങ് സംവിധാനം ചെയ്യുന്ന പാന് ഇന്ത്യന് ചിത്രത്തിന് മുകേഷ് കുമാര് സിങ്, വിഷ്ണു മഞ്ചു, മോഹന് ബാബു എന്നിവര് ചേര്ന്നാണ് സംഭാഷണം ഒരുക്കിയിരിക്കുന്നത്. ബോളിവുഡ് സംവിധായകനും നിര്മാതാവുമായ മുകേഷ് കുമാര് സിങ്ങിന്റെ തെലുങ്കിലെ അരങ്ങേറ്റ ചിത്രം കൂടിയാണ് ‘കണ്ണപ്പ’.
മോഹന്ലാല്, പ്രഭാസ്, അക്ഷയ്കുമാര്, മോഹന്കുമാര്, ശരത്കുമാര്, കാജല് അഗര്വാള് തുടങ്ങിയ വമ്പന് താരനിര ഒരുമിക്കുന്ന ചിത്രം തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളിലായി ജൂണ് 27-നാണ് റിലീസിനെത്തുന്നത്. ഇന്ത്യന് പുരാണങ്ങളുടെയും ഭക്തിയുടെയും പശ്ചാത്തലത്തില്, ശിവനോടുള്ള അചഞ്ചലമായ സ്നേഹവും ഭക്തിയുടെ അനശ്വര പ്രതീകമാക്കി മാറ്റിയ ഇതിഹാസ ഭക്തന്റെ യാത്രയുമാണ് കണ്ണപ്പ പറയുന്നത്. കാലാതീതമായ വിശ്വാസത്തിനും വീരോചിതമായ ത്യാഗത്തിനും ഊന്നല് നല്കിയ ചിത്രം വിഷ്ണു മഞ്ചുവാണ് നിര്മിക്കുകയും പ്രധാന വേഷത്തില് അഭിനയിക്കുകയും ചെയ്യുന്നത്.
ഹോളിവുഡ് ഛായാഗ്രാഹകന് ഷെല്ഡന് ചാവു ആണ് ‘കണ്ണപ്പ’യ്ക്ക് ക്യാമറ ചലിപ്പിച്ചിരിക്കുന്നത്. കെച്ചയാണ് ആക്ഷന് കൊറിയോഗ്രാഫര്. സംഗീതം: സ്റ്റീഫന് ദേവസി, എഡിറ്റര്: ആന്റണി ഗോണ്സാല്വസ്, പ്രൊഡക്ഷന് ഡിസൈനര്: ചിന്ന, എക്സിക്യൂട്ടീവ് പ്രൊഡ്യൂസര്: വിനയ് മഹേശ്വര്, ആര് വിജയ് കുമാര്, പിആര്ഒ: ആതിര ദില്ജിത്ത്.