നായകനെക്കാൾ കൂടുതൽ വില്ലനെ ആഘോഷിക്കുന്ന കാലഘട്ടത്തിലാണ് ഇന്ന് പ്രേക്ഷകർ. എന്നാൽ ഒരു രണ്ടു പതിറ്റാണ്ടു മുന്നേ അത്തരത്തിലൊരു ആഘോഷത്തിന്റെ തുടക്കം കുറിച്ച നടനുണ്ടായിരുന്നു മലയാള സിനിമയിൽ. നായകനായും, പ്രതിനായകനായും മലയാള സിനിമയുടെ മുഖമായിരുന്നു വെള്ളാരം കണ്ണുള്ള നായകൻ “രതീഷ്”. ‘മോഹൻ തോമസെന്ന’ രതീഷ് അവിസ്മരണീയമാക്കിയ വില്ലൻ കഥാപാത്രം ഇന്നും തീക്ഷണതയുള്ള പ്രതിനായകന്റെ പ്രതിരൂപമാണ്. അനശ്വര നായകന്റെ വേർപാടിന്റെ ശൂന്യത ഭീകരമായി നില നിൽക്കുമ്പോഴും അദ്ദേഹം പകർന്നു വെച്ച ഒരു പിടി മികച്ച കഥാപാത്രങ്ങൾ ഇന്നും നില നിൽക്കുന്നുണ്ട്. മലയാളത്തിന്റെ എക്കാലത്തെയും മികച്ച പ്രതിഭ “രതീഷിന്” ഹൃദയം നിറഞ്ഞ ജന്മദിനാശംസകൾ.
ആലപ്പുഴ ജില്ലയിലെ കലവൂരിൽ പുത്തൻപുര വീട്ടിൽ എ.വി. രാജഗോപാലന്റെയും പത്മാവതിയമ്മയുടെയും മകനായി 1954 സെപ്റ്റംബർ 11-നാണ് രതീഷിന്റെ ജനനം. ഷേർളി, ലൈല എന്നിവർ സഹോദരിമാരായിരുന്നു. ബാല്യകാലം മുതൽ തന്നെ രതീഷ് കലാരംഗത്തോടും സാംസ്കാരികപ്രവർത്തനങ്ങളോടും ഏറെ ആകർഷണം പുലർത്തിയിരുന്നു. വിദ്യാഭ്യാസം കൊല്ലം ശ്രീനാരായണ കോളേജിലും തുടർന്ന് ചേർത്തല എസ്.എൻ കോളേജിലും പൂർത്തിയാക്കി. കോളജ് പഠനകാലത്തുതന്നെ നാടകങ്ങളിലൂടെയും കലാപരിപാടികളിലൂടെയും അദ്ദേഹത്തിന്റെ കലാസ്നേഹം തെളിഞ്ഞിരുന്നു. മലയാള സിനിമയുടെ കഥ പറയുന്ന രീതിയിൽ വലിയ മാറ്റങ്ങൾ സംഭവിച്ചുകൊണ്ടിരുന്ന കാലഘട്ടത്തിലാണ് രതീഷ് സിനിമയിൽ അരങ്ങേറ്റം കുറിച്ചത്. അതിനാൽ തന്നെ, തന്റെ അഭിനയ വൈവിധ്യവും കരുത്തുറ്റ സ്ക്രീൻ പ്രഭാവവും കൊണ്ട്, രതീഷ് വളരെ കുറച്ചുകാലത്തിനുള്ളിൽ തന്നെ മലയാള സിനിമയിലെ മുൻനിരയിൽ ഇടം പിടിച്ചു.
1977-ൽ പുറത്തിറങ്ങിയ ‘വേഴാമ്പൽ’ എന്ന ചിത്രത്തിലൂടെയാണ് രതീഷ് മലയാള സിനിമയിൽ ആദ്യമായി പ്രത്യക്ഷപ്പെട്ടത്. എന്നാൽ, വലിയൊരു ശ്രദ്ധ നേടിയത് 1979-ൽ കെ.ജി. ജോർജ് സംവിധാനം ചെയ്ത ‘ഉൾക്കടൽ’ എന്ന സിനിമയിലൂടെയായിരുന്നു. മെഡിക്കൽ റെപ്രസന്റേറ്റീവ് “ഡേവിസ്” എന്ന കഥാപാത്രമായി എത്തിയ അദ്ദേഹം, തന്റെ ഭാവവും സംഭാഷണ ശൈലിയും കൊണ്ട് തന്നെ പ്രേക്ഷകർക്ക് പുതുമയായിരുന്നു. 1980-കളിൽ നായകനും സഹനായകനുമായി എത്തിയെങ്കിലും, 1981-ൽ ഐ.വി. ശശിയുടെ തുഷാരം ആണ് അദ്ദേഹത്തെ നായകനായി ഉറപ്പിച്ചത്.
ജയന്റെ അകാലമരണത്തിനു ശേഷമുള്ള കാലഘട്ടത്തിൽ, മലയാള സിനിമയിൽ ആക്ഷൻ നായകന്റെ സ്ഥാനം ഏറ്റെടുത്തത് രതീഷായിരുന്നു. കരുത്തുറ്റ ശരീരവും ആകർഷകമായ രൂപവും അദ്ദേഹത്തിന് നായക വേഷങ്ങളിൽ മാത്രമല്ല, നെഗറ്റീവ് കഥാപാത്രങ്ങളിലും വലിയ വിജയമൊരുക്കി.
1981 മുതൽ 1988 വരെയുള്ള കാലഘട്ടം രതീഷിന്റെ കരിയറിലെ സ്വർണ്ണകാലമായി കണക്കാക്കാം. ഈ കാലത്ത് അദ്ദേഹം നായകനായും പ്രമുഖ താരങ്ങളോടൊപ്പം സഹനടനായും നിരവധി ശ്രദ്ധേയ ചിത്രങ്ങളിൽ അഭിനയിച്ചു. ‘ഈ നാട്, രാജാവിന്റെ മകൻ, വഴിയോരക്കാഴ്ചകൾ, അബ്കാരി, ഉണരൂ, ജോൺ ജാഫർ ജനാർദ്ദനൻ, തന്ത്രം’ തുടങ്ങിയ സിനിമകളിലെ കഥാപാത്രങ്ങൾ അദ്ദേഹത്തെ ജനഹൃദയങ്ങളിൽ സ്ഥിരം ഇടംനൽകി.
വലിയ താരങ്ങളായ മമ്മൂട്ടിയോടും മോഹൻലാലിനോടും ചേർന്നും മത്സരിച്ചും അദ്ദേഹം തന്റെ നിലപാട് ഉറപ്പിച്ചു. നായക വേഷങ്ങളിൽ നിന്ന് വില്ലൻ കഥാപാത്രങ്ങളിലേക്ക് മാറിയിട്ടും അദ്ദേഹത്തിന്റെ ജനപ്രീതി കുറയാതെ തുടർന്നു.
1990-ഓടെ രതീഷ് സിനിമാരംഗത്ത് നിന്ന് കുറച്ചു വിട്ടുനിന്നെങ്കിലും, 1994-ൽ ഷാജി കൈലാസ് സംവിധാനം ചെയ്ത ‘കമ്മീഷണർ’ എന്ന സിനിമയിലൂടെയാണ് അദ്ദേഹം വില്ലനായും കരുത്തുറ്റ തിരിച്ചുവരവ് നടത്തിയത്. ‘മോഹൻ തോമസ്’ എന്ന രാഷ്ട്രീയവില്ലന്റെ വേഷം രതീഷിന്റെ കരിയറിൽ മറ്റൊരു വലിയ ചുവടുവയ്പ്പായിരുന്നു.
തുടർന്ന് ‘കാശ്മീരം, നിർണ്ണയം, അഗ്നിദേവൻ, തക്ഷശില, യുവതുർക്കി, ഏപ്രിൽ 19, ഹിറ്റ്ലിസ്റ്റ്, ഗംഗോത്രി’ തുടങ്ങിയ സിനിമകളിൽ വില്ലൻ വേഷങ്ങളിൽ തിളങ്ങി. 2001-ലെ രാവണപ്രഭുവിലെ മനിയമ്പ്ര പുരുഷോത്തമൻ, 2002-ലെ ഡാനിയിലെ ഡോ. രഞ്ജി തോമസ് എന്നീ വേഷങ്ങൾ അദ്ദേഹത്തിന്റെ കരിയറിലെ മികച്ച പ്രകടനങ്ങളായി ഇന്നും ഓർക്കപ്പെടുന്നു.
സിനിമയിൽ മാത്രം ഒതുങ്ങാതെ, രതീഷ് നിർമ്മാണരംഗത്തും സജീവമായിരുന്നു. ‘അയ്യർ ദി ഗ്രേറ്റ്, ചക്കിക്കൊത്തൊരു ചങ്കരൻ, ബ്ലാക്ക് മെയിൽ, റിവഞ്ച്, എന്റെ ശബ്ദം’ എന്നീ സിനിമകൾ അദ്ദേഹം നിർമ്മിച്ചു. 2000-കളുടെ തുടക്കത്തിൽ, മലയാള ടെലിവിഷനിലേക്കും രതീഷ് കടന്നു. സൂര്യ ടി.വിയിലെ ‘വേനൽമഴ, കൈരളി ടി.വിയിലെ അന്ന’ എന്നീ പരമ്പരകളിൽ അദ്ദേഹം ശ്രദ്ധേയമായ വേഷങ്ങൾ ചെയ്തു. ‘വേനൽമഴ’യിലെ നായകകഥാപാത്രം അദ്ദേഹത്തിന് വലിയ ജനപ്രീതി നേടിക്കൊടുത്തു.
1983 സെപ്റ്റംബർ 11-ന് മുൻമന്ത്രി എം.കെ. ഹേമചന്ദ്രന്റെ മകളായ ഡയാനയെ രതീഷ് വിവാഹം കഴിച്ചു. ദമ്പതികൾക്ക് പാർവതി, പത്മരാജ്, പത്മ, പ്രണവ് എന്നിങ്ങനെ നാല് മക്കളുണ്ട്. കുടുംബജീവിതത്തോടും കുട്ടികളോടും അദ്ദേഹം ഏറെ പ്രിയപ്പെട്ടവനായിരുന്നു. 2002 ഡിസംബർ 23-ന് വെറും 48-ാം വയസ്സിൽ ഹൃദയാഘാതത്തെ തുടർന്ന് രതീഷ് അന്തരിച്ചു. അന്ന് അദ്ദേഹം കോയമ്പത്തൂരിലെ വീട്ടിലായിരുന്നു. ഭാര്യ ഡയാന 2014-ൽ അന്തരിച്ചു.
158-ഓളം സിനിമകളിൽ അഭിനയിച്ച രതീഷ്, മലയാള സിനിമയിലെ നായകനും വില്ലനുമായി സമാനമായി തിളങ്ങിയ അപൂർവ്വ താരങ്ങളിൽ ഒരാളാണ്. ജയന്റെ മരണശേഷം നായക സ്ഥാനത്തെത്തിയതും പിന്നീട് മോഹൻലാലിനും മമ്മൂട്ടിക്കും ശക്തമായ എതിരാളിയായി വില്ലൻ വേഷങ്ങളിൽ എത്തിയത് അദ്ദേഹത്തിന്റെ അഭിനയ വൈവിധ്യത്തിന്റെ തെളിവാണ്.
ഇന്ന്, രതീഷിന്റെ ജന്മദിനത്തിൽ, അദ്ദേഹത്തെ മലയാള സിനിമ ഓർക്കുന്നത് ഒരു നടനെന്ന നിലയിൽ മാത്രമല്ല, തന്റെ കരിയറിലൂടെ നായകനും വില്ലനുമായി സമാനമായി ജനഹൃദയങ്ങളിൽ നിറഞ്ഞു നിന്ന അപൂർവ്വ പ്രതിഭയായി കൂടിയാണ്. വെറും 48-ാം വയസ്സിൽ നമ്മെ വിട്ടുപോയെങ്കിലും, ഉൾക്കടൽ മുതൽ രാവണപ്രഭു വരെയുള്ള അദ്ദേഹത്തിന്റെ കഥാപാത്രങ്ങൾ മലയാള സിനിമയുടെ ചരിത്രത്തിൽ എന്നും ജീവിക്കുന്നതാണ്. മലയാളത്തിന്റെ അനശ്വര പ്രതിഭയ്ക്ക് ഒരിക്കൽ കൂടെ ഹൃദയം നിറഞ്ഞ ജന്മദിനാശംസകൾ.