പൃഥ്വിരാജ് സുകുമാരൻ വീണ്ടും ബോളിവുഡിലേക്ക്. “സർസമീൻ” എന്ന് പേരിട്ടിരിക്കുന്ന ചിത്രത്തിൽ കാജോളാണ് നായിക. കാശ്മീർ പശ്ചാത്തലമായി ഒരുങ്ങുന്ന ചിത്രത്തിന്റെ ടീസർ റിലീസ് ചെയ്തു. ചിത്രം ജൂലൈ 25ന് ജിയോ ഹോട്സ്റ്റാറിൽ റിലീസ് ചെയ്യും.
സെയ്ഫ് അലിഖാന്റെ മകൻ ഇബ്രാഹിം അലി ഖാൻ നെഗറ്റീവ് റോളിൽ എത്തുന്നുവെന്നാണ് ടീസർ നൽകുന്ന സൂചന. കയൂസ് ഇറാനിയാണ് ചിത്രം സംവിധാനം ചെയ്തിരിക്കുന്നത്. ബോളിവുഡ് താരം ബോമാന് ഇറാനിയുടെ മകനാണ് കയോസ് ഇറാനി. ‘അജീബ് ദാസ്താന്സ്’ എന്ന ആന്തോളജി ചിത്രം കയോസ് സംവിധാനം ചെയ്തിരുന്നു. സൗമിൽ ശുക്ല, അരുൺ സിംഗ് എന്നിവർ ചേർന്നാണ് തിരക്കഥ ചിത്രത്തിന് ഒരുക്കിയിരിക്കുന്നത്. കരണ് ജോഹറിന്റെ നിര്മാണക്കമ്പനിയായ ധര്മ പ്രൊഡക്ഷന്സാണ് അവതരണം ഏറ്റെടുത്തിരിക്കുന്നത്.
അതേസമയം, പൃഥ്വിരാജും കരീന കപൂരും ഒന്നിക്കുന്ന ബോളിവുഡ് പടവും അണിയറയിൽ ഒരുങ്ങുന്നുണ്ട്. ദായ്ര എന്ന് പേരിട്ടിരിക്കുന്ന ചിത്രം മേഘ്ന ഗുൽസാറാണ് സംവിധാനം ചെയ്യുന്നത്.
മോഹൻലാൽ നായകനായെത്തിയ എമ്പുരാന് ആണ് പൃഥ്വിരാജിന്റേതായി ഏറ്റവും ഒടുവില് റിലീസ് ചെയ്ത മലയാള ചിത്രം. ചിത്രം ഇന്റസ്ട്രി ഹിറ്റായി മാറിയിരുന്നു. ലൂസിഫര് എന്ന സൂപ്പര് ഹിറ്റ് ചിത്രത്തിന്റെ രണ്ടാം ഭാഗമായി എത്തിയ ചിത്രത്തില് മഞ്ജു വാര്യര്, ടൊവിനോ തോമസ്, ഇന്ദ്രജിത്ത് സുകുമാരന്, ബൈജു, റിക് യുന് തുടങ്ങി വന് താരനിര അണിനിരന്നിരുന്നു. മുരളി ഗോപിയുടേതായിരുന്നു തിരക്കഥ. സംവിധാനം ചെയ്യുന്നതിനൊപ്പം തന്നെ പൃഥ്വിരാജ് സയ്ദ് മസൂദ് എന്ന കഥാപാത്രത്തെയും എമ്പുരാനില് അവതരിപ്പിച്ചിരുന്നു.