തനിക്കിതുവരെ കിട്ടിയതിൽ നല്ല ശക്തിയുള്ള വേഷമായിരുന്നു ‘പ്രിയദർശിനി രാം ദാസെന്ന്’ തുറന്നു പറഞ്ഞ് നടി മഞ്ജു വാര്യർ. മോഹൻലാലിനെ വെച്ച് പൃഥ്വിരാജ് ഒരു സിനിമ സംവിധാനം ചെയ്യാൻ പോകുന്നുവെന്ന വാർത്ത വന്നപ്പോൾ ആ സിനിമയുടെ ഭാഗമാകാൻ കഴിഞ്ഞിരുന്നുവെങ്കിൽ എന്ന് താൻ കൊതിച്ചിരുന്നുവെന്നും, തന്റെ അഞ്ച് പ്രിയപ്പെട്ട സംവിധായകരുടെ ലിസ്റ്റ് എടുക്കുമ്പോൾ അതിൽ എന്തായാലും പൃഥ്വിരാജ് ഉണ്ടാകുമെന്നും മഞ്ജു വാര്യർ കൂട്ടിച്ചേർത്തു. ദി ആർ ജെ മൈക്ക് ഷോയ്ക്ക് നൽകിയ അഭിമുഖത്തിൽ സംസാരിക്കുകയായിരുന്നു താരം.
‘മോഹൻലാലിനെ വെച്ച് പൃഥ്വിരാജ് ഒരു സിനിമ സംവിധാനം ചെയ്യാൻ പോകുന്നുവെന്ന വാർത്ത വന്നപ്പോൾ ആ സിനിമയുടെ ഭാഗമാക്കാൻ കഴിഞ്ഞിരുന്നുവെങ്കിൽ എന്ന് ഞാൻ കൊതിച്ചിരുന്നു. എന്റെ ഭാഗ്യത്തിന് അതിൽ ഒരു വേഷം ചെയ്യാൻ എന്നെ രാജു വിളിച്ചു. എനിക്ക് ഇതുവരെ കിട്ടിയതിൽ ഒരു നല്ല ശക്തിയുള്ള വേഷമായിരുന്നു പ്രിയദർശിനി രാം ദാസ്. ലൂസിഫറിലും എമ്പുരാനിലും രാജു പറഞ്ഞു തരുന്ന ജോലി ചെയ്യാൻ ശ്രമിക്കുന്ന ആളായിരുന്നു ഞാൻ. കാരണം കൃത്യമായി നല്ല ധാരണ രാജുവിന്റെ മനസിൽ ഉണ്ട്.’ മഞ്ജു വാര്യർ പറഞ്ഞു.
‘എനിക്ക് രാജു എന്ന സംവിധായകനെ മാത്രമേ പരിചയം ഉള്ളൂ. കാരണം ഞാൻ രാജുവിന്റെ ഒപ്പം അഭിനയിച്ചിട്ടില്ല. ഒരുപക്ഷെ രാജു ഇത്രയധികം സിനിമകളിൽ അഭിനയിച്ചിട്ടുള്ളത് കൊണ്ട് അഭിനേതാക്കൾക്ക് വളരെ കംഫോർട്ടബിൾ ആണ്. അത് രാജു നടൻ ആയത് കൊണ്ടാണോ എന്ന് എനിക്ക് അറിയില്ല. അല്ലെങ്കിൽ രാജുവിന്റെ സംസാരം അത്രയും ടോപ് ആയത് കൊണ്ടാണോ എന്നും എനിക്ക് അറിയില്ല. എന്റെ അഞ്ച് പ്രിയപ്പെട്ട സംവിധായകരുടെ ലിസ്റ്റ് എടുക്കുമ്പോൾ അതിൽ എന്തായാലും രാജു ഉണ്ടാകും. എമ്പുരാനിൽ ആണെങ്കിലും ബ്രോ ഡാഡി, ലൂസിഫർ സിനിമകളിൽ പ്രവർത്തിച്ച ആരോട് ചോദിച്ചാലും രാജുവെന്ന സംവിധായകനെക്കുറിച്ച് നൂറു നാവാണ്. എന്നെ സംബന്ധിച്ച് എനിക്ക് അത് മാത്രമേ അറിയുകയുള്ളൂ.’ മഞ്ജു വാര്യർ കൂട്ടിച്ചേർത്തു.
മലയാള സിനിമയിലെ ഏറ്റവും ഉയർന്ന കളക്ഷൻ നേടിയ ചിത്രമാണ് എമ്പുരാൻ. ഈ വർഷം ആദ്യമായിരുന്നു സിനിമ തിയേറ്ററിൽ എത്തിയത്. സിനിമയുടെ ആശയത്തിന് നേരെ സംഘ പരിവാർ ആക്രമണങ്ങൾ നടന്നിരുന്നു, എന്നിട്ടും സിനിമ മികച്ച കളക്ഷനാണ് തിയേറ്ററിൽ നിന്ന് നേടിയത്. സിനിമയുടെ മൂന്നാം ഭാഗവും അണിയറയിൽ ഒരുങ്ങുകയാണ്. മൂന്നാം ഭാഗത്തിൽ വളരെ ശക്തമായ വേഷത്തിലാണ് മഞ്ജു വാര്യർ എത്തുന്നത് എന്ന ഉറപ്പ് നൽകി കൊണ്ടായിരുന്നു എമ്പുരാൻ അവസാനിച്ചിരുന്നത്.