അനുമതിയില്ലാതെ തന്റെ ഗാനം ഉപയോഗിച്ചെന്നുകാണിച്ച് സംഗീതസംവിധായകൻ ഇളയരാജ മദ്രാസ് ഹൈക്കോടതിയിൽ ഹർജി നൽകി. വെള്ളിയാഴ്ച പുറത്തിറങ്ങിയ ‘മിസ്സിസ് ആൻഡ് മിസ്റ്റർ’ എന്ന തമിഴ് ചിത്രത്തിലെ ഗാനത്തിനാണ് ഇളയരാജ ഹർജി നൽകിയിരിക്കുന്നത്. അനുമതിവാങ്ങാതെ വികൃതമാക്കിയാണ് തന്റെ ഗാനം ചിത്രത്തിലുപയോഗിച്ചതെന്ന് ഹർജിയിൽ ആരോപണമുണ്ട്.
കമൽഹാസൻ നാലുവേഷത്തിൽ അഭിനയിച്ച് 1990-ൽ പുറത്തിറങ്ങിയ ‘മൈക്കിൾ മദന കാമ രാജൻ’ എന്ന സിനിമയിലെ ‘ശിവരാത്രി’ എന്ന ഗാനമാണ് ചിത്രത്തിലുള്ളത്. സിനിമയിൽനിന്ന് പാട്ട് നീക്കണമെന്നാണ് ഇളയരാജയുടെ ആവശ്യം.
താൻ സംഗീതംനൽകിയ ഗാനം അനുവാദംകൂടാതെ ഉപയോഗിച്ചെന്നുകാണിച്ച് ‘മഞ്ഞുമ്മൽ ബോയ്സ്’ ഉൾപ്പെടെയുള്ള സിനിമകൾക്കെതിരേ ഇളയരാജ ഇതിനു മുന്നേ നിയമനടപടി സ്വീകരിച്ചിരുന്നു.