സുന്ദർ സി – വടിവേലു കോമ്പിനേഷനിൽ പുറത്തിറങ്ങുന്ന ഏറ്റവും പുതിയ കോമഡി ചിത്രമാണ് ഗ്യാങ്ങേഴ്സ്. സിനിമയുടെ പ്രൊമോഷനുമായി ബന്ധപ്പെട്ട അഭിമുഖത്തിൽ നടൻ വടിവേലു പറഞ്ഞ വാക്കുകളാണ് സോഷ്യൽ മീഡിയയിലെ ചർച്ചാവിഷയം.വെക്കേഷന് കുടുംബവുമൊത്ത് ടൂർ പോകുന്നതിന് പകരം ഗ്യാങ്ങേഴ്സ് കാണാൻ പോയാൽ നിങ്ങൾക്ക് മറ്റൊരിടത്തും പോകേണ്ട ആവശ്യം വരില്ലെന്നാണ് വടിവേലു പറയുന്നത്. കാതറിൻ ട്രീസ, വാണി ഭോജൻ, ഭഗവതി പെരുമാൾ എന്നിവരാണ് ചിത്രത്തിൽ മറ്റു പ്രധാന വേഷങ്ങളിൽ എത്തുന്നത്. ചിത്രം ഏപ്രിൽ 24 ന് തിയേറ്ററിലെത്തും.
‘ഏപ്രിലിൽ വെക്കേഷൻ സമയത്ത് കുടുംബങ്ങൾ എല്ലാവരും ചേർന്ന് ഊട്ടിയിലും കൊടൈക്കനാലിലും ടൂർ പോകാറുണ്ട്. ഇത്തവണ അവിടെ ഒന്നും പോകണ്ട. ഈ സിനിമ നിങ്ങൾ കുട്ടികളുമായി വന്ന് കണ്ടാൽ നിങ്ങൾക്ക് ഒരിടത്തും പോകേണ്ട ആവശ്യം വരില്ല. തിയേറ്ററിൽ എല്ലാരോടൊപ്പം വന്ന് ചിരിച്ച് സന്തോഷിച്ച് ആരോഗ്യത്തെ നന്നാക്കാം. സുന്ദർ സി – വടിവേലു കോമ്പിനേഷനിൽ എല്ലാവർക്കും തിയേറ്ററിൽ വന്ന് ചിരിച്ച് ഈ സിനിമ ആസ്വദിക്കാം’, വടിവേലു പറഞ്ഞു.
അരൺമനൈ 4 എന്ന സിനിമയ്ക്ക് ശേഷം സുന്ദർ സി സംവിധാനം ചെയ്യുന്ന ചിത്രമാണ് ഗ്യാങ്ങേഴ്സ്. എസി ഷൺമുഖം, എസിഎസ് അരുൺകുമാർ, കുശ്ബു സുന്ദർ എന്നിവർ ചേർന്നാണ് സിനിമയുടെ നിർമ്മാണം. സി.സത്യ സംഗീതം പകർന്ന ചിത്രത്തിന് തിരക്കഥയും സംഭാഷണവും ഒരുക്കിയിരിക്കുന്നത് വെങ്കട്ട് രാഘവനാണ്. ക്യാമറ ഇ.കൃഷ്ണസാമിയും എഡിറ്റിംഗ് പ്രവീൺ ആൻ്റണിയും നിർവ്വഹിച്ചിരിക്കുന്നു. ഏറെ വർഷത്തെ ഇടവേളയ്ക്ക് ശേഷം സുന്ദർ സിയും വടിവേലുവും ഒന്നിക്കുന്ന സിനിമയാണിത്.
സുന്ദർ സിയും വടിവേലുവും ഒന്നിച്ച ജനപ്രിയ ചിത്രങ്ങളിൽ വിന്നർ , ഗിരി , തലൈനഗരം , ലണ്ടൻ എന്നിവ ഉൾപ്പെടുന്നു. 2010 ൽ പുറത്തിറങ്ങിയ നഗരം മരുപ്പക്കം എന്ന ചിത്രത്തിലായിരുന്നു അവർ അവസാനമായി ഒന്നിച്ചത്. ഗ്യാംഗേഴ്സിന്റെ സാങ്കേതിക സംഘത്തിൽ സംഗീതസംവിധായകൻ സി സത്യ, ഛായാഗ്രാഹകൻ ഇ കൃഷ്ണസ്വാമി, എഡിറ്റർ പ്രവീൺ ആന്റണി എന്നിവരാണുള്ളത്. ഖുഷ്ബുവും സുന്ദർ സിയും അവരുടെ അവ്നി സിനിമാക്സ് ബാനറിൽ ചിത്രം നിർമ്മിക്കുന്നു, ബെൻസ് മീഡിയ പ്രൈവറ്റ് ലിമിറ്റഡും എസിഎസ് അരുൺ കുമാറും ഇത് അവതരിപ്പിക്കുന്നു.
ചിത്രത്തിന്റെ കഥാതന്തുവിനെക്കുറിച്ചുള്ള കൂടുതൽ വിവരങ്ങൾ ഇതുവരെ പുറത്തുവന്നിട്ടില്ല.