കരാർ ഉറപ്പിച്ച സിനിമകൾ പൂർത്തിയാക്കി കഴിഞ്ഞാൽ സിനിമാ രംഗത്തു നിന്നും വിരമിക്കാൻ ആഗ്രഹിക്കുന്നുവെന്ന് വ്യക്തമാക്കി സംവിധായകൻ പ്രിയദർശൻ. കൂടാതെ മോഹൻലാലിനെ നായകനാക്കി തന്റെ നൂറാമത്തെ സിനിമയും ചർച്ചയിലാണെന്നും അദ്ദേഹം കൂട്ടിച്ചേർത്തു. ഓൺമനോരമയ്ക്ക് നൽകിയ അഭിമുഖത്തിലാണ് താരത്തിന്റെ വെളിപ്പെടുത്തൽ.
“കരാർ ഉറപ്പിച്ച സിനിമകൾ പൂർത്തിയാക്കി കഴിഞ്ഞാൽ സിനിമാ രംഗത്തു നിന്നും വിരമിക്കാൻ ആഗ്രഹിക്കുന്നു. മോഹൻലാലിനെ നായകനാക്കി എൻ്റെ നൂറാമത്തെ സിനിമയും ചർച്ചയിലാണ്. അതിൻ്റെ തിരക്കഥ പൂർത്തിയാക്കാനുണ്ട്. അടുത്ത വർഷം ചിത്രീകരണം തുടങ്ങാനാണ് പദ്ധതി. എൻ്റെ സിനിമകളുടെ തുടർച്ചകൾ ചെയ്യാൻ എനിക്ക് ഇഷ്ടമല്ല. അതെനിക്ക് വലിയ താല്പര്യമില്ലാത്ത കാര്യമാണ്. പക്ഷേ ‘ഹേരാ ഫേരി’ യുടെ മൂന്നാം ഭാഗം ആലോചനയിലുണ്ട് കാരണം അതിൻ്റെ നിർമാതാക്കൾ വളരെനാളായി അത് ചെയ്യാൻ എന്നെ നിർബന്ധിച്ചുകൊണ്ടിരിക്കുന്നു. ഈ സിനിമയൊക്കെ പൂർത്തിയാക്കി കഴിഞ്ഞാൽ സിനിമയിൽ നിന്നു വിരമിക്കണം എന്നാണ് എന്റെ ആഗ്രഹം, ഒരു വിശ്രമം ആവശ്യമാണെന്ന് തോന്നുന്നു.” പ്രിയദർശൻ പറഞ്ഞു.
പ്രിയദർശൻ തിരക്കഥ എഴുതി സംവിധാനം ചെയ്യുന്ന പുതിയ ത്രില്ലർ സിനിമ ‘ഹൈവാൻ’ ചിത്രീകരണം ആരംഭിച്ചിട്ടുണ്ട്. കെവിഎൻ പ്രൊഡക്ഷൻസ്, തെസ്പിയൻ ഫിലിംസ് എന്നിവയുടെ ബാനറുകളിൽ വെങ്കട് കെ. നാരായണ, ശൈലജ ദേശായി ഫെൻ എന്നിവരാണ് ചിത്രം നിർമിക്കുന്നത്. അക്ഷയ് കുമാർ, സെയ്ഫ് അലിഖാൻ എന്നിവർക്ക് പുറമെ ബൊമൻ ഇറാനി, ഷരിബ് ഹാഷ്മി, അസ്രാണി, സയ്യാമി ഖേർ, ശ്രിയ പിൽഗോൻക തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങൾ. ദിവാകർ മണി ഛായാഗ്രഹണം നിർവഹിക്കുന്ന ചിത്രത്തിന് പ്രൊഡക്ഷൻ ഡിസൈൻ നിർവഹിക്കുന്നത് സാബു സിറിളാണ്. ആദ്യ ഘട്ട ചിത്രീകരണം കൊച്ചിയിൽ ആണ്. വാഗമൺ, ഊട്ടി, മുംബൈ എന്നിവിടങ്ങളും ചിത്രത്തിൻ്റെ പ്രധാന ലൊക്കേഷനുകളാണ്.