അതുല്യമായ ഈണക്കൂട്ടുകൾ കൊണ്ട് മലയാള സംഗീതലോകത്തെ വിസ്മയപ്പെടുത്തിയ രവീന്ദ്രൻ മാസ്റ്ററിന്റെ ജന്മവാർഷികമാണിന്ന്. “രവീന്ദ്ര സംഗീതം” എന്നത് മലയാളികളുടെ ഹൃദയത്തിൽ ഒരു സ്വതന്ത്ര അധ്യായമാണ്. കാലഭേമില്ലാതെ കാതുകളെ കീഴടക്കുന്ന ഹരിമുരളീരവം പോലെ, രവീന്ദ്രൻ മാഷിന്റെ ഓരോ ഗാനവും ഇന്നും മനസ്സിൽ ഒരു നിത്യമധുരമായ പ്രതിധ്വനിയായി മുഴങ്ങുന്നു. ശാസ്ത്രീയതയുടെയും ഭാവാത്മകതയുടെയും അതുല്യമായ സംഗമം സൃഷ്ടിച്ച സംഗീതസംവിധായകനാണ് അദ്ദേഹം. രവീന്ദ്രൻ മാഷിന് സെല്ലുലോയിഡിന്റെ ഹൃദയം നിറഞ്ഞ ജന്മദിനാശംസകൾ
1950 മാർച്ച് 9-ന് കൊല്ലം ജില്ലയിലെ കുളത്തൂപ്പുഴയിൽ ജനിച്ച രവീന്ദ്രൻ, ചെറുപ്പം മുതൽ സംഗീതത്തോടുള്ള ആഴമുള്ള ആസക്തി പ്രകടിപ്പിച്ചിരുന്നു. ദാരിദ്ര്യം നിറഞ്ഞ ബാല്യവും യൗവനവും അദ്ദേഹത്തെ തടഞ്ഞില്ല; മറിച്ച് സംഗീതത്തിലേക്കുള്ള സമർപ്പണം കൂടുതൽ ശക്തമാക്കി. തിരുവനന്തപുരം സ്വാതി തിരുനാൾ സംഗീത കോളജിൽ പഠിച്ച അദ്ദേഹം ശാസ്ത്രീയ സംഗീതത്തിലെ കൃത്യതയും ഭാവഗാധയും ഉൾക്കൊണ്ടു. അന്നത്തെ സഹപാഠിയായിരുന്ന കെ.ജെ. യേശുദാസുമായുള്ള സൗഹൃദം പിന്നീട് മലയാള സിനിമയിലെ സംഗീതചരിത്രം തന്നെ മാറ്റിമറിച്ച ഒന്നായി.
യേശുദാസും രവീന്ദ്രനും — ഈ രണ്ടു പേര്ചേർന്നപ്പോൾ ജനിച്ചത് അനശ്വരമായ ഗാനങ്ങളുടെ ഒരു കാലഘട്ടമാണ്. 1979-ൽ ശശികുമാർ സംവിധാനം ചെയ്ത ചൂള എന്ന ചിത്രത്തിലൂടെയാണ് രവീന്ദ്രൻ മാസ്റ്റർ സിനിമാസംഗീതത്തിലേക്ക് കടന്നത്. അതിനുശേഷം മലയാളചലച്ചിത്ര സംഗീതലോകത്ത് അത്ഭുതങ്ങളായ പാട്ടുകൾ നിരവധിയായി ജനിച്ചു. ഭരതം, അമരം, ഹിസ് ഹൈനസ് അബ്ദുള്ള, ആറാം തമ്പുരാൻ, വടക്കുംനാഥൻ, സൂര്യഗായത്രി — എല്ലാം അദ്ദേഹത്തിന്റെ സംഗീതപ്രതിഭയുടെ സാക്ഷ്യപത്രങ്ങളാണ്.
രവീന്ദ്രൻ മാസ്റ്ററിന്റെ സംഗീതം ഭംഗിയുള്ള ഗൗരവം, ശുദ്ധമായ രാഗഭാവം, ലാളിത്യഭരിതമായ ആലാപന സൗന്ദര്യം എന്നിവയുടെ മിശ്രിതമായിരുന്നു. “പ്രമദവനം വേണം…”, “ഹരിമുരളീരവം…”, “കാർമുകിൽ വർണന്റെ ചുണ്ടിൽ ചാരു ചിരി തൂകുന്നു…”, “ഗംഗേ”, “ദീനദയാലോ രാമാ” എന്നീ ഗാനങ്ങൾ സംഗീതസ്നേഹികൾക്ക് ഇന്നും ആത്മീയമായ ഒരു അനുഭവമാണ്. ഈണങ്ങളെ കെട്ടഴിച്ചു വിട്ട്, അതിനൊപ്പം യേശുദാസിന്റെ ആലാപനമാധുര്യം ചേർത്തപ്പോൾ പിറന്നത് അതുല്യമായ ഗന്ധർവഗാനങ്ങളായിരുന്നു.
രവീന്ദ്രൻ മാഷ് ശാസ്ത്രീയ സംഗീതത്തിന്റെ ആഴങ്ങൾ കൃത്യമായി മനസ്സിലാക്കിയ ഒരാളായിരുന്നു. അതുകൊണ്ടുതന്നെ അദ്ദേഹത്തിന്റെ ഈണങ്ങൾ ഗൗരവമുള്ളതായിരുന്നെങ്കിലും അവ ശ്രോതാക്കളെ ഭ്രമിപ്പിക്കാതെ ആസ്വാദ്യമായി എത്തിയിരുന്നു. “സംഗീതത്തിന്റെ വിഹായസിൽ ഒരു പരുന്തിനെപ്പോലെ പറത്തിവിട്ട സംഗീതസംവിധായകനാണ് രവീന്ദ്രൻ” എന്ന് യേശുദാസിന്റെ വാക്കുകൾ മാഷിന്റെ പ്രതിഭയെ സത്യസന്ധമായി പ്രതിനിധീകരിക്കുന്നു.
രവീന്ദ്രൻ മാഷ് 200-ൽ അധികം സിനിമകൾക്ക് സംഗീതം നൽകി. 1992-ൽ ഭരതം എന്ന ചിത്രത്തിലൂടെ ദേശീയ അവാർഡും 1991-ൽ സംസ്ഥാന പുരസ്കാരവും നേടി. സംഗീത ജീവിതത്തിന്റെ അന്ത്യഘട്ടത്തിൽ നന്ദനം എന്ന ചിത്രത്തിലെ ഗാനങ്ങൾക്കും 2002-ൽ സംസ്ഥാന പുരസ്കാരം ലഭിച്ചു.
2005 മാർച്ച് 3-ന് ചെന്നൈയിൽ അദ്ദേഹം അന്തരിച്ചു. എന്നാൽ അദ്ദേഹത്തിന്റെ സംഗീതം മരണത്തെ മറികടന്ന് ഇന്നും ജീവിക്കുന്നു. ഓരോ പാട്ടും ഒരുപാട് ഓർമ്മകളെ ഉണർത്തുന്ന സംഗീതയാത്രകളാണ്.
ഇന്ന് രവീന്ദ്രൻ മാഷിന്റെ ജന്മദിനത്തിൽ, അദ്ദേഹത്തിന്റെ സംഗീതം നമ്മെ ഓർമ്മപ്പെടുത്തുന്നത് സംഗീതം ഒരു ശാസ്ത്രം മാത്രമല്ല, ആത്മാവിന്റെ ഭാഷയാണെന്നും ആ ഭാഷയിൽ മാഷ് എഴുതിയ ഓരോ വരിയും നിത്യമായിരിക്കും എന്നും തന്നെയാണ്. രവീന്ദ്രൻ മാഷ് — മലയാള സംഗീതത്തിന്റെ നിത്യപ്രകാശം, അനശ്വര ഈണങ്ങളുടെ ശില്പി.