2025ലെ ഇന്ത്യൻ പോപ്പ് കൾച്ചറിനെ നിർവചിച്ച നിമിഷങ്ങളായി വോഗ് മാഗസിൻ പുറത്തുവിട്ട ലിസ്റ്റിൽ “ലോക ചാപ്റ്റർ 1: ചന്ദ്ര” ഉൾപ്പെട്ടതിൽ സന്തോഷം പങ്കുവെച്ച് ദുൽഖർ സൽമാൻ. ചിത്രത്തിന്റെ നിർമ്മാതാവ് കൂടിയാണ് ദുൽഖർ. വോഗിന്റെ പോസ്റ്റ് സ്റ്റോറി ഇട്ടുകൊണ്ടായിരുന്നു ദുൽഖർ സൽമാന്റെ പ്രതികരണം. ‘ചന്ദ്ര യുഗചേതനകളിൽ(Zeitgeists) ഒന്നായി മാറുമെന്ന് ഞാൻ ഒട്ടും പ്രതീക്ഷിച്ചില്ല. 2025ൽ എന്റെ പ്ലാനിൽ എവിടെയും ഇത് ഉണ്ടായിരുന്നില്ല. പക്ഷെ നോക്കൂ എന്താണ് നടന്നത് എന്ന് ദുൽഖർ കുറിച്ചു. ദുൽഖർ സൽമാന്റെ സ്റ്റോറി ‘So Cool’ എന്ന ക്യാപ്ഷനോടെ കല്യാണിയും ഷെയർ ചെയ്തിട്ടുണ്ട്.
ഇന്ത്യൻ വനിതാ ക്രിക്കറ്റ് ടീം മുതൽ ഷാരൂഖ് ഖാന്റെ മെറ്റ് ഗാല നിമിഷങ്ങൾ വരെ പ്രധാനപ്പെട്ട 18 സംഭവങ്ങളാണ് വോഗിന്റെ ലിസ്റ്റിൽ ഉൾപ്പെട്ടിരിക്കുന്നത്. ഇതിലാണ് ലോകയും ഉൾപ്പെട്ടിരിക്കുന്നത്. ‘ലോക ചാപ്റ്റർ 1: ചന്ദ്ര’ യിൽ സൂപ്പർഹീറോയായി അഭിനയിച്ചുകൊണ്ട് കല്യാണി പ്രിയദർശൻ പല റെക്കോർഡുകളും തകർത്തെറിഞ്ഞു എന്നാണ് വോഗ് കുറിച്ചത്. ദുൽഖർ സൽമാന്റെ വേഫെറർ ഫിലിംസാണ് ചിത്രം നിർമ്മിച്ചത്. ക ല്യാണി പ്രിയദർശൻ കേന്ദ്ര കഥാപാത്രമായി എത്തിയ ചിത്രം സംവിധാനം ചെയ്തത് ഡൊമിനിക് അരുൺ ആണ്.
അതേസമയം, ലോക രണ്ടാം ഭാഗവും വേഫെറർ ഫിലിംസ് പ്രഖ്യാപിച്ച് കഴിഞ്ഞു. ആദ്യ ഭാഗം അവസാനിക്കുമ്പോൾ തന്നെ ഇതേ കുറിച്ചുള്ള സൂചനകളുണ്ടായിരുന്നു. അഞ്ച് ചിത്രങ്ങളാണ് ലോകയുടെ ഭാഗമായി വരാൻ പോകുന്നത്. ഇതിൽ രണ്ടാം ഭാഗത്തിൽ ചിത്രം ടൊവിനോ തോമസിന്റെ ചാത്തനാണ് പ്രധാന വേഷങ്ങളിൽ എത്തുന്നത്. ചിത്രത്തിൽ ദുൽഖർ സൽമാനും ആദ്യ ഭാഗത്തിലേത് പോലെ അതിഥി വേഷത്തിലുണ്ടാകും എന്നാണ് സൂചനകൾ.
ലോക ചാപറ്റർ 1 : ചന്ദ്രയിൽ കല്യാണിക്കൊപ്പം നസ്ലെൻ, ചന്തു സലിംകുമാർ, അരുൺ കുര്യൻ, സാൻഡി മാസ്റ്റർ, ശരത് സഭ എന്നിവരായിരുന്നു പ്രധാന വേഷത്തിലെത്തിയിരുന്നു. ടൊവിനോയ്ക്കും ദുൽഖർ സൽമാനും ഒപ്പം മമ്മൂട്ടിയും ചിത്രത്തിൽ അതിഥി വേഷത്തിൽ ഉണ്ടായിരുന്നു. മൂത്തോൻ എന്ന കഥാപാത്രമായി, ശബ്ദരൂപത്തിലാണ് മമ്മൂട്ടി എത്തിയത്. വരും ഭാഗങ്ങളിൽ ഈ കഥാപാത്രം കൂടുതൽ സമയം സിനിമകളിലുണ്ടാകും എന്നാണ് കരുതപ്പെടുന്നത്.