കഴിഞ്ഞ ദിവസം സിനിമയുടെ ചിത്രീകരണത്തിനിടെ കാറപകടത്തിൽ മരണപ്പെട്ട സ്റ്റണ്ട്മാൻ മോഹൻരാജിന്റെ കുടുംബത്തിന് ധന സഹായവുമായി നടന്മാരായ സൂര്യയും ചിമ്പുവും. ഒരു തമിഴ് മാധ്യമത്തിന് നൽകിയ അഭിമുഖത്തിൽ സംഘട്ടന സംവിധായകൻ സ്റ്റണ്ട് സിൽവയാണ് ഈ കാര്യം വെളിപ്പെടുത്തിയിരിക്കുന്നത്.
മോഹൻരാജിന് അപകടം സംഭവിച്ചെന്നറിഞ്ഞപ്പോൾ വിജയ് സാർ ഫോൺ ചെയ്ത് കാര്യങ്ങൾ അന്വേഷിച്ചിരുന്നു. വിജയ് സാറിന്റെ മിക്ക ചിത്രങ്ങളിലും മോഹൻരാജ് പ്രവർത്തിച്ചിട്ടുണ്ട്. വിവരമറിഞ്ഞ എസ്ടിആർ സാർ തൊട്ടടുത്തദിവസം തന്നെ വലിയൊരു സംഖ്യയുടെ ചെക്കുമായി വന്ന് അദ്ദേഹത്തിന്റെ കുടുംബത്തിന് കൊടുക്കണം എന്ന് പറഞ്ഞു. മോഹൻരാജിന്റെ കുട്ടികളുടെ പഠനച്ചെലവ് മുഴുവൻ ഏറ്റെടുക്കാമെന്ന് സൂര്യ സാറിന്റെ മാനേജറും അറിയിച്ചിട്ടുണ്ട്. സിൽവ പറഞ്ഞു.
പാ രഞ്ജിത്ത്-ആര്യ ചിത്രമായ വേട്ടുവത്തിന്റെ സാഹസികമായ കാര് സ്റ്റണ്ട് ചിത്രീകരണമാണ് അപകടത്തില് കലാശിച്ചത്. എസ്യുവി അതിവേഗത്തില് ഓടിച്ചുവന്ന് റാമ്പില് കയറ്റി പറപ്പിക്കുന്ന രംഗം ചിത്രീകരിക്കുന്നതിനിടെ നിയന്ത്രണം നഷ്ടപ്പെട്ട് വാഹനം അപകടത്തില് പെടുകയായിരുന്നു. വായുവില് ഒരുതവണ മലക്കം മറിഞ്ഞ വാഹനം ഇടിച്ചുകുത്തി നിലംപതിക്കുകയായിരുന്നു. അപകടത്തിന് പിന്നാലെ ക്രൂ അംഗങ്ങള് ഓടിയെത്തി കാറില് നിന്ന് രാജുവിനെ പുറത്തെടുത്ത് ആശുപത്രിയിലേക്ക് കൊണ്ടുപോയെങ്കിലും ജീവന് രക്ഷിക്കാനായില്ല. അപകടത്തിന്റെ നടുക്കുന്ന വീഡിയോ ദൃശ്യങ്ങളും പുറത്തുവന്നിരുന്നു.