സിനിമാ-എന്റർടെയ്ൻമെന്റ് മേഖലയിലെ പുതിയ പ്രതിഭകളെ കണ്ടെത്താനും അവർക്ക് മികച്ച അവസരങ്ങൾ ഉറപ്പാക്കാനുമായി ടാലന്റ് മാനേജ്‌മെന്റ് ആൻഡ് കാസ്റ്റിങ് ഏജൻസിയായ ’22 ഫ്രെയിംസ്’ പ്രവർത്തനം ആരംഭിച്ചു. ടാലന്റ് മാനേജ്‌മെന്റും കാസ്റ്റിംഗും ഒരേ കുടക്കീഴിൽ കൊണ്ടുവരുന്ന സംരംഭമാണിത്.
പനോരമ സ്റ്റുഡിയോസും ഉണ്ണി മുകുന്ദൻ ഫിലിംസും (യുഎംഎഫ്) ചേർന്ന് നിർമിക്കുന്ന, ഉണ്ണി മുകുന്ദൻ ആദ്യമായി സംവിധാനം ചെയ്യുന്ന ചിത്രവുമായുള്ള സഹകരണത്തോടെയാണ് 22 ഫ്രെയിംസ് എൽഎൽസി ലോഞ്ച് ചെയ്യുന്നത്. സംരംഭത്തിന് നടനും സംവിധായകനുമായ ഉണ്ണി മുകുന്ദൻ ആശംസകൾ നേർന്നു. സ്റ്റോറീസ് സോഷ്യൽ സ്ഥാപക ഡോ. സംഗീത ജനചന്ദ്രനാണ് 22 ഫ്രെയിംസിന്റെ മാനേജിങ് പാർട്ണർ.
അഭിനേതാക്കളെയും മറ്റു പ്രതിഭകളെയും സിനിമ, ഒടിടി പ്ലാറ്റ്‌ഫോമുകൾ, ബ്രാൻഡുകൾ എന്നിവയുമായി ബന്ധിപ്പിക്കുന്ന പ്രൊഫഷണൽ സംവിധാനമാണ് ഏജൻസി ഒരുക്കുന്നത്. കലാകാരന്മാരുടെ ദീർഘകാല കരിയർ വളർച്ചയ്ക്കൊപ്പം വിവിധ പ്രോജക്ടുകൾക്കായുള്ള കാസ്റ്റിങ് പ്രവർത്തനങ്ങളും ഏജൻസി ഏറ്റെടുക്കും. ഓഡിഷൻ നടപടികൾ, തിരഞ്ഞെടുപ്പ്, പ്രൊഫഷണൽ കരാറുകൾ എന്നിവയിൽ പൂർണ്ണ സുതാര്യതയും വ്യക്തതയും ഉറപ്പാക്കുമെന്നും മികച്ചൊരു ടാലന്റ് ഇക്കോസിസ്റ്റം രൂപപ്പെടുത്തുകയാണ് ലക്ഷ്യമെന്നും അണിയറപ്രവർത്തകർ വ്യക്തമാക്കി.
സാധാരണയായി ടാലന്റ് മാനേജ്‌മെന്റ് സ്ഥാപനങ്ങൾ കലാകാരന്മാരുടെ കരിയർ വളർച്ചയ്ക്കും പ്രൊഫഷണൽ പ്രാതിനിധ്യത്തിനുമാണ് പ്രാധാന്യം നൽകുന്നത്. അതേസമയം, ഓരോ പ്രോജക്ടിനും അനുയോജ്യരായ അഭിനേതാക്കളെ കണ്ടെത്തുന്നതിലാണ് കാസ്റ്റിംഗ് ഏജൻസികളുടെ ശ്രദ്ധ. ഈ രണ്ട് സേവനങ്ങളും ഒരുമിച്ച് ലഭ്യമാക്കുന്നതിലൂടെ നിലവിൽ പ്രവർത്തിക്കുന്ന കലാകാരന്മാർക്ക് മികച്ച പ്രൊഫഷണൽ പിന്തുണ നൽകുന്നതിനൊപ്പം പുതിയ പ്രതിഭകളെ കണ്ടെത്തി അവർക്ക് അനുയോജ്യമായ അവസരങ്ങളിലേക്ക് എത്തിക്കാനും 22 ഫ്രെയിംസ് ലക്ഷ്യമിടുന്നു. സജീവമായ പ്രൊഡക്ഷൻ സംവിധാനവുമായുള്ള ബന്ധം കണ്ടെത്തുന്ന പ്രതിഭകൾക്ക് സിനിമാ പ്രോജക്ടുകളിലേക്കും വ്യവസായത്തിലെ കൂടുതൽ അവസരങ്ങളിലേക്കും എത്താനുള്ള വഴിയൊരുക്കുകയും ചെയ്യും.
കഴിവുള്ളവർക്ക് ശരിയായ വേദിയും അവസരങ്ങളും ലഭിക്കേണ്ടത് പ്രധാനമാണെന്നും പുതിയ ആശയങ്ങൾക്കും പ്രതിഭകൾക്കും മുന്നോട്ടുള്ള വഴിയൊരുക്കാൻ 22 ഫ്രെയിംസിന് കഴിയുമെന്നാണ് പ്രതീക്ഷിക്കുന്നതെന്നും ഉണ്ണി മുകുന്ദൻ പറഞ്ഞു. പ്രതിഭകൾക്ക് ശരിയായ പ്രാതിനിധ്യവും അർഹമായ അവസരങ്ങളും ലഭ്യമാക്കുന്നതിനൊപ്പം വ്യവസായ മേഖലയുമായി മികച്ച ബന്ധങ്ങൾ സ്ഥാപിക്കാനും 22 ഫ്രെയിംസ് ലക്ഷ്യമിടുന്നതായി ഡോ. സംഗീത ജനചന്ദ്രൻ പറഞ്ഞു. കേവലം ഒരു ടാലന്റ് ഏജൻസി എന്നതിലുപരി, പ്രതിഭകളെ കണ്ടെത്തി പിന്തുണച്ച് അവർക്ക് പുതിയ അവസരങ്ങളിലേക്ക് വഴിയൊരുക്കുന്ന സംവിധാനമായി 22 ഫ്രെയിംസിനെ വളർത്തിയെടുക്കാനാണ് ആഗ്രഹിക്കുന്നതെന്നും അവർ കൂട്ടിച്ചേർത്തു.
ഓഡിഷൻ നടപടികൾ, തിരഞ്ഞെടുപ്പ്, പ്രൊഫഷണൽ കരാറുകൾ തുടങ്ങി പ്രവർത്തനത്തിന്റെ ഓരോ ഘട്ടത്തിലും വ്യക്തതയും സുതാര്യതയും ഉറപ്പാക്കുന്നതിനാണ് 22 ഫ്രെയിംസ് പ്രാധാന്യം നൽകുന്നത്. കലാകാരന്മാർക്ക് സംശയങ്ങളും പരാതികളും അറിയിക്കുന്നതിനും ആവശ്യമായ പിന്തുണ ലഭിക്കുന്നതിനും വ്യക്തമായ ആശയവിനിമയ സംവിധാനവും ഏജൻസി ഒരുക്കും. ഉത്തരവാദിത്തത്തോടെയുള്ള പ്രവർത്തനരീതിയിലൂടെ കൂടുതൽ പ്രൊഫഷണലും എല്ലാവർക്കും പ്രാപ്യവുമായ ടാലന്റ് ഇക്കോസിസ്റ്റം രൂപപ്പെടുത്തുകയാണ് ലക്ഷ്യം. പ്രതിഭകളെ കണ്ടെത്തുന്നതിനും അവരെ പരിപോഷിപ്പിക്കുന്നതിനും സിനിമാ, എന്റർടെയ്ൻമെന്റ് മേഖലയിലെ അവസരങ്ങളുമായി ബന്ധിപ്പിക്കുന്നതിനും പ്രാധാന്യം നൽകിക്കൊണ്ട് ഇന്ത്യൻ വിനോദ വ്യവസായത്തിൽ പുതിയ സാധ്യതകൾ തുറക്കാനാണ് 22 ഫ്രെയിംസ് ലക്ഷ്യമിടുന്നത്.
22 ഫ്രെയിംസിനെക്കുറിച്ച്
22 ഫ്രെയിംസ് എൽഎൽസി ഇന്ത്യൻ എന്റർടെയ്ൻമെന്റ്, മീഡിയ മേഖലകളിൽ ടാലന്റ് മാനേജ്‌മെന്റ്, കാസ്റ്റിങ് സേവനങ്ങൾ നൽകുന്ന സ്ഥാപനമാണ്. സിനിമാ പ്രവർത്തകർ, നിർമാണ കമ്പനികൾ, ഒടിടി പ്ലാറ്റ്‌ഫോമുകൾ, ബ്രാൻഡുകൾ എന്നിവർക്കായി കാസ്റ്റിങ് സേവനങ്ങൾ ലഭ്യമാക്കുന്നതിനൊപ്പം അഭിനേതാക്കളെയും മറ്റ് പ്രതിഭകളെയും കണ്ടെത്തി പ്രൊഫഷണലായി പ്രതിനിധീകരിക്കുകയും ചെയ്യുന്നു. പ്രതിഭകളെ കണ്ടെത്തുന്നതിനും അവർക്ക് മികച്ച പ്രാതിനിധ്യം ഉറപ്പാക്കുന്നതിനും സുതാര്യമായ പ്രവർത്തനരീതി പിന്തുടരുന്നതിനുമാണ് സ്ഥാപനം പ്രാധാന്യം നൽകുന്നത്.