നിതീഷ് തിവാരി സംവിധാനം ചെയ്യുന്ന ബിഗ് ബജറ്റ് ചിത്രം ‘രാമായണ’ത്തെക്കുറിച്ചുള്ള വിവാദങ്ങളിൽ പ്രതികരണവുമായി നടനും ചിത്രത്തിന്റെ സഹനിർമാതാവുമായ യഷ്. 4,000 കോടി രൂപയുടെ വലിയ ബജറ്റിനെക്കുറിച്ച് വിമർശനങ്ങൾ ഉയർത്തുന്നതിന് പകരം, ഇന്ത്യൻ സിനിമയെ ആഗോളതലത്തിൽ പ്രതിനിധീകരിക്കുന്ന ഈ സ്വപ്ന പദ്ധതിയെ രാജ്യം ഒറ്റക്കെട്ടായി പിന്തുണയ്ക്കണമെന്ന് ബെംഗളൂരുവിൽ നടന്ന ട്രെയിലർ ലോഞ്ചിൽ അദ്ദേഹം അഭ്യർത്ഥിച്ചു.
ചിത്രത്തിൽ രാവണന്റെ വേഷത്തിലാണ് യഷ് എത്തുന്നത്. നമ്മുടെ മണ്ണിൽ നിന്ന് രൂപപ്പെട്ട് ലോകമെമ്പാടുമുള്ള പ്രേക്ഷകരിലേക്ക് എത്തുന്ന ഈ മഹാകാവ്യം രാജ്യത്തിന് മുഴുവൻ അഭിമാനമായി മാറുമെന്നും, തന്നിലർപ്പിച്ചിരിക്കുന്ന വലിയ ഉത്തരവാദിത്തം ഏറ്റവും മികച്ച രീതിയിൽ പൂർത്തിയാക്കാൻ കഠിനമായി പരിശ്രമിക്കുമെന്നും കന്നഡ സൂപ്പർതാരം വ്യക്തമാക്കി.
“നിങ്ങൾ എന്നിൽ ഏൽപ്പിച്ചിരിക്കുന്ന ഉത്തരവാദിത്തം മികച്ച രീതിയിൽ നിറവേറ്റാൻ ഞാൻ കഠിനമായി പരിശ്രമിക്കും. നിങ്ങൾക്ക് ഈ സിനിമയെക്കുറിച്ച് (രാമായണം) അഭിമാനത്തോടെ സംസാരിക്കാം. ഞാൻ ഈ പ്രോജക്റ്റിന്റെ നിർമ്മാതാവാണ്. നമ്മുടെ ഇടയിൽ നിന്ന് ജന്മമെടുത്ത് ലോകമെമ്പാടും എത്തുന്ന ഒരു സൃഷ്ടിയാണിത്.” യാഷ് പറഞ്ഞു.
നമിത് മൽഹോത്രയ്ക്കൊപ്പം യഷും കൂടി പങ്കാളിയാകുന്ന രാമായണം രണ്ട് ഭാഗങ്ങളായാണ് തിയേറ്ററുകളിലെത്തുന്നത്. രൺബീർ കപൂർ (ശ്രീരാമൻ), സായ് പല്ലവി (സീത), സണ്ണി ഡിയോൾ (ഹനുമാൻ), രവി ദുബെ (ലക്ഷ്മണൻ) എന്നിങ്ങനെ വമ്പൻ താരനിര അണിനിരക്കുന്ന ചിത്രത്തിന്റെ ആദ്യഭാഗം 2026 നവംബർ 5-നും രണ്ടാം ഭാഗം 2027 ദീപാവലിക്കും റിലീസ് ചെയ്യാനാണ് അണിയറപ്രവർത്തകരുടെ തീരുമാനം.
തന്റെ മുൻ ചിത്രമായ ‘ടോക്സിക്: എ ഫെയറി ടെയിൽ ഫോർ ഗ്രോൺ-അപ്സ്’ നേരിട്ട തിരിച്ചടികളെക്കുറിച്ചും ചടങ്ങിൽ യഷ് തുറന്നുപറഞ്ഞു. ഗീതു മോഹൻദാസ് സംവിധാനം ചെയ്ത ചിത്രം 500 കോടി ബജറ്റിലാണ് ഒരുങ്ങിയതെങ്കിലും ബോക്സ് ഓഫീസിൽ ഏകദേശം 330 കോടി രൂപ മാത്രമാണ് നേടാനായത്. നെഗറ്റീവ് റിവ്യൂകളും ഓൺലൈൻ വിമർശനങ്ങളും സിനിമയുടെ കളക്ഷനെ ബാധിച്ചപ്പോഴും തനിക്കൊപ്പം ഉറച്ചുനിന്ന ആരാധകരോട് താരം വികാരഭരിതനായി നന്ദി അറിയിച്ചു.