ബിഗ് ബോസ് റിയാലിറ്റി ഷോയ്ക്കുള്ളിൽ മത്സരാർത്ഥികളായ റിനി ആൻ ജോർജും രാഹുൽ ഈശ്വറും തമ്മിൽ കടുത്ത വാക്ക് തർക്കവും വൈകാരിക പ്രകടനങ്ങളും. പൂർവ്വവൈരാഗ്യത്തിന്റെ പശ്ചാത്തലത്തിൽ വീടിനുള്ളിലെത്തിയ ഇരുവർക്കുമിടയിലുണ്ടായ തർക്കത്തിനൊടുവിൽ, മാനസികമായി തകർന്ന റിനി ആൻ ജോർജ് പൊട്ടിക്കരഞ്ഞുകൊണ്ട് ഷോയിൽ നിന്ന് പുറത്തുപോകാൻ സന്നദ്ധത അറിയിച്ചു. തന്റെ കരിയറും രാഷ്ട്രീയ ജീവിതവും തകർത്തത് രാഹുലാണെന്നും, അദ്ദേഹം കാരണമുണ്ടായ ട്രോമയിൽ നിന്ന് താനിപ്പോഴും മുക്തയായിട്ടില്ലെന്നും റിനി ആരോപിച്ചു.
തനിക്കെതിരെ ഉണ്ടായ സൈബർ ആക്രമണങ്ങളും രാഷ്ട്രീയ പ്രസ്ഥാനത്തിൽ നിന്നുള്ള പുറത്താക്കലും ചൂണ്ടിക്കാട്ടിയ റിനി, കടുത്ത സാമ്പത്തിക പ്രതിസന്ധി മൂലമാണ് ബിഗ് ബോസിലേക്ക് എത്തേണ്ടി വന്നതെന്നും തുറന്നുപറഞ്ഞു. ഒരു സ്ത്രീയോട് ചെയ്യാവുന്നതിന്റെ പരമാവധി ഉപദ്രവങ്ങൾ സമൂഹം തന്നോട് ചെയ്തുവെന്നും, തനിക്ക് കുറച്ചു പണം തന്നാൽ ഷോ ഉപേക്ഷിച്ച് പുറത്തുപോകാൻ തയ്യാറാണെന്നുമാണ് റിനി പൊട്ടിക്കരഞ്ഞുകൊണ്ട് തർക്കത്തിനിടെ വ്യക്തമാക്കിയത്.
എന്നാൽ ബിഗ് ബോസ് കേവലം ഒരു ഗെയിം മാത്രമാണെന്നും റിനിയുടെ നിലപാടുകളോടാണ് തനിക്ക് ഭിന്നതയുള്ളതെന്നുമാണ് രാഹുൽ ഈശ്വർ സംഭവത്തിൽ പ്രതികരിച്ചത്.
നേരത്തെ, സ്ത്രീവിരുദ്ധ പ്രസ്താവന നടത്തിയെന്ന് ആരോപിച്ച് രാഹുൽ ഈശ്വറിനെതിരെ റിനിയും, തനിക്കെതിരെ വ്യാജപ്രചാരണം നടത്തിയെന്ന് ആരോപിച്ച് റിനിക്കെതിരെ രാഹുലും പോലീസ് സ്റ്റേഷനിൽ പരാതി നൽകിയിരുന്നു. ഈ കടുത്ത നിയമപോരാട്ടങ്ങളും ഭിന്നതകളും നിലനിൽക്കെയാണ് ഇരുവരും ഒരേസമയം ബിഗ് ബോസ് വീടിനുള്ളിലേക്ക് മത്സരാർത്ഥികളായി എത്തിയത്.