ഡൽഹി ജന്തർ മന്തറിൽ നടന്ന വിദ്യാർഥി പ്രതിഷേധത്തെ അധിക്ഷേപിച്ച സംഭവത്തിൽ മുൻ നിലപാടുകൾ ന്യായീകരിച്ച് ബി.ജെ.പി. എം.പിയും നടിയുമായ കങ്കണ റണൗട്ട് വീണ്ടും രംഗത്ത്. സമരത്തിൽ പങ്കെടുത്തവരിൽ ഭൂരിഭാഗവും മുതിർന്ന നടി ഷബാന ആസ്മിയുടെ പ്രായമുള്ളവരാണെന്നും അതിനാൽ ഇതിനെ രാജ്യത്തെ ‘ജെൻ സി’ യുവത്വത്തിന്റെ പ്രതിഷേധമായി വിശേഷിപ്പിക്കാനാകില്ലെന്നും കങ്കണ അവകാശപ്പെട്ടു. ഇൻസ്റ്റഗ്രാം സ്റ്റോറിയിലൂടെ പങ്കുവെച്ച പുതിയ വീഡിയോയിലാണ് കങ്കണയുടെ വിവാദ പ്രതികരണം.
നീറ്റ് ചോദ്യപേപ്പർ ചോർച്ചയുമായി ബന്ധപ്പെട്ട് ജൂലൈ 20-നാണ് ജന്തർ മന്തറിൽ പാർലമെന്റ് മാർച്ച് സംഘടിപ്പിച്ചത്. പ്രക്ഷോഭത്തിൽ പങ്കെടുത്തവരെ കങ്കണ നേരത്തെ ‘ജനറേഷൻ ഗട്ടർ’ എന്ന് ആക്ഷേപിച്ചത് വലിയ പ്രതിഷേധത്തിന് വഴിവെച്ചിരുന്നു. ഈ വിവാദങ്ങളോട് പ്രതികരിക്കവെയാണ് കങ്കണ പുതിയ വാദങ്ങൾ ഉന്നയിച്ചത്. രാജ്യത്ത് 30 മുതൽ 35 കോടിയോളം വരുന്ന ജെൻ സി വിഭാഗക്കാരുണ്ടായിരിക്കെ, ജന്തർ മന്തറിൽ തടിച്ചുകൂടിയ പതിനായിരത്തോളം പേരിൽ രണ്ടായിരത്തോളം പേർ മാത്രമാണ് യുവാക്കളായി ഉണ്ടായിരുന്നതെന്നാണ് കങ്കണയുടെ കണക്കുകൂട്ടൽ. ബാക്കിയുള്ളവരിൽ പകുതിയിലധികവും ഷബാന ആസ്മിയുടെ പ്രായത്തിലുള്ളവരുൾപ്പെടെ വിവിധ പ്രായക്കാരായിരുന്നുവെന്നും അതിനാൽ ഇത് മുഴുവൻ യുവാക്കളുടെയും ശബ്ദമല്ലെന്നും അവർ പറഞ്ഞു.
താൻ യുവാക്കൾക്ക് എതിരല്ലെന്നും ഒരു തലമുറയെയും അധിക്ഷേപിച്ചിട്ടില്ലെന്ന് തെളിയിക്കാൻ വെല്ലുവിളിക്കുന്നുവെന്നും കങ്കണ കൂട്ടിച്ചേർത്തു. സ്വയം ‘കീടങ്ങൾ’ എന്ന് വിശേഷിപ്പിച്ച ഒരു പ്രത്യേക വിഭാഗത്തിനെതിരെ മാത്രമാണ് താൻ സംസാരിച്ചതെന്നാണ് കങ്കണയുടെ ന്യായീകരണം. അതേസമയം, സമരത്തിന് പിന്തുണയുമായി 75-കാരിയായ ഷബാന ആസ്മിയും നടൻ പ്രകാശ് രാജും ജന്തർ മന്തറിലെത്തിയിരുന്നു. ഷബാന ആസ്മി ട്രക്കിൽ സഞ്ചരിക്കുന്നതിന്റെയും ബാരിക്കേഡുകൾ മറികടക്കുന്നതിന്റെയും ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതിന് പിന്നാലെയാണ് സമരക്കാരെ ലക്ഷ്യമിട്ട് കങ്കണ വീണ്ടും രംഗത്തെത്തിയത്.