ടൊവിനോ തോമസ് ചിത്രം തല്ലുമാല ദുൽഖറിനെ നായകനാക്കി ചെയ്യാൻ എഴുതിയ തിരക്കഥയായിരുന്നുവെന്ന് തുറന്നു പറഞ്ഞ് നിർമ്മാതാവ് സന്തോഷ് ടി കുരുവിള. കഥ പൂർത്തിയായപ്പോൾ ദുൽഖറിന് ഇഷ്ടപ്പെടാത്തത് കൊണ്ടാണ് ടൊവിനോയിലേക്കെത്തിയതെന്നും സന്തോഷ് ടി കുരുവിള പറഞ്ഞു.
‘എനിക്ക് വളരെ ഇഷ്ടമുള്ള, വളരെ എനർജിയുള്ള ഒരു നടനാണ് ദുൽഖർ. ദുൽഖറിന് വേണ്ടി നമ്മൾ എഴുതിയ കഥയാണ് തല്ലുമാല. നമ്മുടെ കമ്പനി, ദുൽഖറിന് വേണ്ടി എഴുതിച്ച കഥയാണ്. ബോൾഗാട്ടി പാലസിൽ റൂമെടുത്ത് കൊടുത്ത്, ഒത്തിരി നാളെഴുതി. അവസാനം ദുൽഖറിന് ആ കഥ പൂർത്തിയായപ്പോൾ ഇഷ്ടപ്പെടാതെ വന്നപ്പോഴാണ് ആ കഥ ഡയറക്ടറോട് എടുത്തോളാൻ പറയുന്നത്.’ സന്തോഷ് ടി കുരുവിള പറഞ്ഞു.
ടൊവിനോ തോമസിനെ നായകനാക്കി ഖാലിദ് റഹ്മാൻ സംവിധാനം ചെയ്ത ആക്ഷൻ കോമഡി ചിത്രമായിരുന്നു ‘തല്ലുമാല’. മികച്ച പ്രതികരണങ്ങൾ സ്വന്തമാക്കിയ ചിത്രം ബോക്സ് ഓഫീസിലും കോടികളാണ് കൊയ്തത്. മുഹ്സിൻ പരാരി, അഷ്റഫ് ഹംസ എന്നിവർ ചേർന്ന് തിരക്കഥ എഴുതിയ ചിത്രം 71 കോടിയോളമാണ് ബോക്സ് ഓഫീസിൽ നിന്ന് വാരിക്കൂട്ടിയത്. ലുക്മാൻ, ഷൈൻ ടോം ചാക്കോ, കല്യാണി പ്രിയദർശൻ, ജോണി ആന്റണി, ചെമ്പൻ വിനോദ് ജോസ് എന്നിവരായിരുന്നു ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചത്. സംവിധായകൻ ലോകേഷ് കനകരാജ് ഉൾപ്പടെ നിരവധി പേർ ചിത്രത്തിന്റെ കഥപറച്ചിലിനെയും എഡിറ്റിംഗിനെയും പുകഴ്ത്തി രംഗത്തെത്തിയിരുന്നു.
രാജേഷ് മാധവൻ ഒരുക്കിയ പെണ്ണും പൊറാട്ടും ആണ് സന്തോഷ് ടി കുരുവിളയുടെ നിർമാണത്തിൽ അവസാനം പുറത്തുവന്ന സിനിമ. നൂറിലധികം പുതുമുഖങ്ങളും നാനൂറിലധികം പക്ഷിമൃഗാദികളും അണിനിരക്കുന്നു എന്നതാണ് ഈ ചിത്രത്തിന്റെ ഏറ്റവും വലിയ കൗതുകം. ഗോവയിൽ നടന്ന ഇന്ത്യൻ ഇൻ്റർനാഷണൽ ഫിലിം ഫെസ്റ്റിവലിൽ ആയിരുന്നു ചിത്രത്തിന്റെ പ്രീമിയർ അരങ്ങേറിയത്. ഗോവയിൽ വലിയ പ്രേക്ഷക പിന്തുണയോടെ ആണ് ചിത്രത്തിന്റെ പ്രീമിയർ നടന്നത്. വലിയ പ്രശംസയാണ് അവിടെ ചിത്രം സ്വന്തമാക്കിയത്.