വിവാദങ്ങള് നേരിടേണ്ടി വന്ന സമയത്ത് പ്രേക്ഷകരുടെ സ്നേഹം തൊട്ടറിഞ്ഞൊരു അനുഭവം തനിക്കുണ്ടായിരുന്നെന്ന് തുറന്നു പറഞ്ഞ് നടൻ നിവിൻ പോളി. “വീട്ടിലേക്ക് പോകുമ്പോൾ സ്കൂട്ടറില് വന്ന ഒരു കുടുംബം കാറിനു വട്ടം വച്ച് നിർത്തിയെന്നും, ഞങ്ങളുണ്ട് കൂടെ, ഇതിലൊന്നും തളരരുത്. ധൈര്യമായി മുന്നോട്ടു പോകണം എന്നാ കുടുംബം തന്നോട് പറഞ്ഞുവെന്നും നിവിൻ പോളി പറഞ്ഞു. നോരമ ഓണ്ലൈനിന് നല്കിയ അഭിമുഖത്തില് സംസാരിക്കുകയായിരുന്നു അദ്ദേഹം.
”എന്റെ ജീവിതത്തില് ഏറ്റവും കടുപ്പമേറിയ ചില ദിവസങ്ങള് ഉണ്ടായിരുന്നു. എനിക്കെതിരെ കെട്ടിച്ചമച്ച ആരോപണങ്ങളുമായി ഒരാള് വന്ന സമയം, കലൂരിലെ വീട്ടിലേക്കു പോകുമ്പോള് സ്കൂട്ടറില് വന്ന ഒരു കുടുംബം എന്റെ കാറിനു വട്ടം വച്ചു നിര്ത്തി. ആ ഭാര്യയും ഭര്ത്താവും എന്നോടു പറഞ്ഞു, ‘ഞങ്ങളുണ്ട് കൂടെ. ഇതിലൊന്നും തളരരുത്. ധൈര്യമായി മുന്നോട്ടു പോകണം’. എന്റെ കണ്ണു നിറഞ്ഞു പോയി. എന്റെ ആരാണവര്? അവര്ക്കു വണ്ടി ഓടിച്ചു നേരെ വീട്ടില് പോയാല് പോരെ? പക്ഷേ, ഞാന് ചെയ്ത ചില സിനിമകള് അവരെ സന്തോഷിപ്പിച്ചിട്ടുണ്ടാവും. അതുകൊണ്ടാവും വണ്ടി നിര്ത്തി അടുത്തേക്കു വരാന് തോന്നിയത്.” നിവിൻ പോളി പറഞ്ഞു.
ഏറെ നാളുകള്ക്ക് ശേഷമാണ് നിവിന് പോളിയുടെ ഒരു സിനിമ ബോക്സ് ഓഫീസില് വിജയം നേടുന്നത്. 600 ദിവസത്തെ ഇടവേളയ്ക്ക് ശേഷം തിയേറ്ററിലെത്തിയ നിവിന് പോളി ചിത്രമാണ് സര്വ്വം മായ. അഖില് സത്യനൊരുക്കിയ ചിത്രം പത്ത് ദിവസം കൊണ്ട് തന്നെ നൂറ് കോടി ക്ലബ്ബില് ഇടം നേടുകയും ചെയ്തു സര്വ്വം മായയുടെ വിജയത്തിന് പിന്നാലെ, മോശം സമയത്തും തനിക്ക് പിന്തുണ നല്കി കൂടെ നിന്ന പ്രേക്ഷകര്ക്ക് നിവിന് പോളി നന്ദി പറഞ്ഞിരുന്നു. കരിയറില് പ്രശ്നങ്ങളും ബുദ്ധിമുട്ടുകളും നേരിടേണ്ടി വന്നപ്പോള് ദൈവത്തെപ്പോലെ കൂടെ നിന്നത് പ്രേക്ഷകരാണെന്നാണ് നിവിന് പോളി പറഞ്ഞത്.
അഖില് സത്യന് ഒരുക്കിയ സര്വ്വം മായയിലെ നായിക റിയ ഷിബുവാണ്. അജു വര്ഗീസും നിവിന് പോളിയും വര്ഷങ്ങള്ക്ക് ശേഷം ഒരുമിച്ച ചിത്രം കൂടിയാണ് സര്വ്വം മായ. ജനാര്ദ്ദനന്, പ്രീതി മുകുന്ദന്, മധു വാര്യര് തുടങ്ങിയവരും ചിത്രത്തില് പ്രധാന വേഷങ്ങളിലെത്തുന്നുണ്ട്. ഹൗസ്ഫുള്ളായി ഇപ്പോഴും പ്രദര്ശനം തുടരുകയാണ് സര്വ്വം മായ.