കല്യാണി പ്രിയദർശൻ സമ്മാനിച്ച ആഡംബര വാച്ചിനെ കുറിച്ച് കുറിപ്പ് പങ്കുവെച്ച് ഛായാഗ്രാഹകൻ നിമിഷ് രവി. കഠിനാധ്വാനം എപ്പോഴും നല്ല കാര്യങ്ങളിലേക്ക് നയിക്കുമെന്ന് ഓർമപ്പെടുത്തുന്നതാണ് സമ്മാനമെന്നാണ് നിമിഷ രവി കുറിച്ചിരിക്കുന്നത്. ഏകദേശം 9.8 ലക്ഷം രൂപ വിലയുള്ള ഒമേഗയുടെ സ്പീഡ്മാസ്റ്റർ സീരീസിലുള്ള വാച്ചാണ് കല്യാണി നിമിഷിന് സമ്മാനിച്ചിരിക്കുന്നത്. വാച്ച് കെട്ടി നിൽക്കുന്ന കയ്യുടെ ചിത്രനൊപ്പമായിരുന്നു നിമിഷിന്റെ കുറിപ്പ്.
‘പ്രിയ കല്യാണി, ഈ സമ്മാനം നിങ്ങളുടെ മഹത്തായ മനസ്സിന്റെ തെളിവാണ്. വളരെയധികം നന്ദി. ഈ നിറം നേരിട്ട് എന്നെ ലോകയുമായും ചന്ദ്രയുമായും ബന്ധിപ്പിക്കുന്നു. എല്ലാത്തിനുമുപരി, തുടർച്ചയായ കഠിനാധ്വാനം എപ്പോഴും നല്ല കാര്യങ്ങളിലേക്കാണ് നയിക്കുന്നതെന്ന് ഇതെന്നെ ഓർമപ്പെടുത്തും. ഈ സിനിമയും അതുമായി ബന്ധപ്പെട്ടിരിക്കുന്ന ആളുകളും അക്കാര്യം എന്നും ഓർമപ്പെടുത്തിക്കൊണ്ടേയിരിക്കും. അതിനാൽ ഈ സമ്മാനം ആ കഠിനാധ്വാനത്തിന് ഉള്ളതാണ്. ഒരുപാട് സ്നേഹം കല്യാണി.’
മുൻപ് ‘ലക്കി ഭാസ്കറി’ന്റെ വിജയത്തിൽ ദുൽഖർ സൽമാനും നിമിഷിന് ആഡംബര വാച്ച് സമ്മാനിച്ചിരുന്നു. . ‘നിങ്ങൾ മികച്ചതിനേക്കാൾ മികച്ചത്’ എന്നായിരുന്നു പോസ്റ്റിന് കല്യാണിയുടെ കമൻ്റ്. ടൊവീനോ തോമസ്, അഹാന കൃഷ്ണ തുടങ്ങിയവരും നിമിഷിന് സ്നേഹം അറിയിച്ച് കമന്റ് രേഖപ്പെടുത്തിയിരുന്നു.
മലയാള സിനിമാ ചരിത്രത്തിൽ റെക്കോർഡുകൾ തകർത്ത് മുന്നേറുകയാണ് ‘ലോക – ചാപ്റ്റർ വൺ:ചന്ദ്ര’. 35 ദിവസം കൊണ്ട് 1 കോടി 18 ലക്ഷം പ്രേക്ഷകരാണ് ചിത്രം ആഗോള തലത്തിൽ കണ്ടത്. 21-ാം നൂറ്റാണ്ടിൽ ഏറ്റവും അധികം പ്രേക്ഷകർ കണ്ട ചിത്രമായി ഇതോടെ ‘ലോക’ മാറി. കേരളത്തിലെ തിയേറ്ററുകളിൽ നിന്ന് മാത്രം ആദ്യമായി 50,000 ഷോകൾ പിന്നിടുന്ന ചിത്രം എന്ന റെക്കോർഡും ചിത്രത്തിനുണ്ട്. ദുൽഖർ സൽമാൻ്റെ വേഫെറർ ഫിലിംസ് നിർമിച്ച ഏഴാമത്തെ ചിത്രമായ ‘ലോക’ 290 കോടിക്ക് മുകളിൽ ആഗോള ഗ്രോസ് നേടി കുതിപ്പ് തുടരുകയാണ്.