തമിഴ് ചിത്രം “കൂലി”യുടെ റിലീസ് ആഘോഷിക്കാൻ കമ്പനി ജീവനക്കാർക്ക് ഒരു ദിവസത്തെ അവധിയും സൗജന്യ ടിക്കറ്റുകളും പ്രഖ്യാപിച്ച് തമിഴ്നാട്ടിലെ പ്രമുഖ സ്ഥാപനം. മധുര ആസ്ഥാനമായി പ്രവർത്തിക്കുന്ന, ദക്ഷിണേന്ത്യയിൽ പലയിടങ്ങളിലും ശാഖകളുള്ള ‘യുനോ അക്വാ കെയർ’ എന്ന സ്ഥാപനമാണ് ജീവനക്കാർക്ക് സൗകര്യം ഒരുക്കിയത്.
ഇതുസംബന്ധിച്ച് കമ്പനി ചെന്നൈ, ബെംഗളൂരു, തിരുച്ചിറപ്പളളി, തിരുനെൽവേലി, ചെങ്കൽപ്പെട്ട് തുടങ്ങിയ ശാഖകൾക്ക് സർക്കുലർ അയച്ചിട്ടുണ്ട്.
അന്ന് തന്നെ അനാഥാലയങ്ങൾക്കും വൃദ്ധസദനങ്ങൾക്കും ഭക്ഷണവും സംഭാവനകളും ജനങ്ങൾക്ക് മധുരവും വിതരണം ചെയ്യുമെന്നും കമ്പനി പ്രഖ്യാപിച്ചിട്ടുണ്ട്.
വ്യാഴാഴ്ചയാണ് കൂലി പ്രദർശനത്തിനെത്തുന്നത്. ലോകേഷ് കനകരാജും- രജനികാന്തും ആദ്യമായി ഒന്നിക്കുന്ന ചിത്രമാണ് കൂലി. കൂലിയുടെ ആദ്യ പ്രദർശനം ഇന്ത്യൻ സമയം പുലർച്ചെ 4.01 ന് ആരംഭിക്കും. കേരളത്തിൽ രാവിലെ ആറ് മണി മുതലാണ് കൂലിയുടെ ഷോ ആരംഭിക്കുന്നത്. എച്ച്എം അസോസിയേറ്റ്സ് ആണ് സിനിമ കേരളത്തിൽ എത്തിക്കുന്നത്. ചിത്രം ആഗസ്റ്റ് 14 ന് പുറത്തിറങ്ങും. സൺ പിക്ചേഴ്സിന്റെ ബാനറിൽ കലാനിധി മാരനാണ് കൂലിയുടെ നിർമ്മാണം. ചിത്രത്തിൽ അതിഥി താരമായി ബോളിവുഡ് താരം ആമിർ ഖാൻ എത്തുന്നുണ്ട്. ഗിരീഷ് ഗംഗാധരൻ ക്യാമറ കൈകാര്യം ചെയ്യുന്ന ചിത്രത്തിന്റെ എഡിറ്റിംഗ് നിർവഹിക്കുന്നത് ഫിലോമിൻ രാജ് ആണ്.